Holko waɗii ɓee heɓuɓe ñawu koronawiris so cafraama haa celli haa ngartii e galleeji mum'en yimɓe ina ndoga ɗumen. Ɓe ina paltoo ɓe ina cerndita ɓee to ina mbaɗa goɗɗum. Ko mankude pinal, waasde faamde waasde anndude rafi koronawiris walla ko waasde yurmeende.
Ngal naamdal ina haani ƴoƴƴiineede e ndingiral ngal sabu hannde won ko yi'aa e rendo ngoo haanaani sakiraaɓe. On paami kaalaten ko haala paltiingu wooɗungu e ñawu Koronawiris. A yi'an neɗɗo ñawa haa sella, hoddiiɓe mum, koreeji mum ina ndoga ɗum. Holko addi faltaare ndee ? Mate oɗon hannde fawi hoore mum ñawu nguu ?
Ngam yeewtidude e ndee toɓɓere en njaɓɓoto bi'eteeɗo Ummu Kebe. Oo ko keɓunooɗo ñawu Koronaawiris. Hannde o sellii, kono o wuuri ko muusi e ñawu nguu. Ma en keɗoo yewtere makko.
So ɗum yawtii, ma en keɗoo Hawa Bokar Lih Taal. Oo ko neɗɗiyanke, ko o bindoowo ko o bittiyankeejo. Omo humpitii kala ko faati e safaa renndooji e darnde rewɓe e renndo ngoo. Kadi e taarinnde (piilki) e ko nanndi mum.
E rogere Humpito e ko feewti e Koronawiris Doktoor Aamadu Soh maa haalu mate nguleeki ina haɗa ɓii ñawu Koronawiris layde.