Sabon shugaban bankin duniya, Kim ya fara ziyararsa da nahiyar Afrika

Sabon shugaban bankin duniya, Jim Yong Kim, ya fara ziyararsa da nahiyar Afrika inda ya fara yada zango a kasar Cote d’Ivoir domin tattauna yadda za a habaka harkokin kasuwanci a yankin.Kim ya karbi shugabancin bankin na duniya ne a farkon watan Yunin bana, a ziyara tasa ya kuma gana da shugaban kasar Alassane Ouattara, inda daga baya su ka yi wata liyafa. 

Shugaban Bankin Duniya, Jim Yong Kim, a lokacin ziyararsa a kasar Cote d'Ivoir REUTERS/Luc Gnago

Shugaban bankin na duniya kuma, ya fara da kasar ne domin tattaunawa akan muhimmancin zaman lafiya.

“Ga alama ina ganin cewa yanzu akwai zaman lafiya, za kuma a sami cigaba ta fannin kasuwanci ne, idan akwai zaman lafiya”, inji Kim

Ya kuma kara da cewa, idan kuma har kasa na so ta samu cigaba mai dorewa, dole ne a saka mata a cikin harkokin kasuwanci, musamman matasa.

Ouattara ana shi bangaren, ya yi farin ciki da Kim ya fara ziyararsa da nahiyar ta Afrika, a sabon aikin nasa.
 

Ya kuma kara da nuna kyakyawan zaton cewa bankin na duniya zai nuna sassauci ta inda kasar ta Cote d’Ivoir da nahiyar ta Afrika za su cigaba.