Najeriya za ta hukunta duk wanda ya kawo cikas kan rufe iyakokinta

A wani mataki na tabbatar da cewa iyakokin Najeriya sun ci gaba da kasancewa a garkame, shugaban kasar Muhammadu Buhari ya umurci da a gaggauta janye jami’an tsaron da ke yin zagon kasa ga manufar rufe iyakokin.

Shugaban Najeriya Muhammadu Buhari. oodweynemedia

A wata sanarwa da kakakin gwamnatin, Femi Adesina ya raba a birnin Abuja, shugaba Buhari ya umurci hukumomin tsaron da ke da ruwa da tsaki a sha’anin kula da iyakokin da su yi hukuncin da ya dace ga duk wani jami’insu da aka samu da laifin yin kafar ungulu a aikin tsaron iyakokin.

A shekarar da ta gabata ne gwamnatin kasar ta rufe iyakokinta, lamarin da ya janyo cece kuce a ciki da wajen kasar, duba da irin kalubalen da matakin ya taho da su.

Kwamitin da shugaban kasar ya nada don binciko batun zagon kasa ga kudirin rufe iyakokin kasar, a karkashin mai baiwa shugaban shawara a fannin tsaro Janar Babagana Munguno ya shawarci da a hukunta duk jami’in soji ko na farar hula da aka samu da hannu wajen kawo cikas a tsaron kan iyakokin, da rufe iyakokin ma.