Gindauniyar Dangote ta bada naira miliyan 200 domin yaki da cutar coronavirus

Gidauniyar Hamshakin attajirin Najeriya Aliko Dangote tayi alkawarin bada gudumawar naira miliyan 200 domin yaki da cutur coronavirus dake cigaba da hallaka rayukan jama’a a Duniya.

Hamshakin attajirin nahiyar Afrika, Alhaji Aliko Dangote. REUTERS/Denis Balibouse

Jami’ar kamfanin Maryam Shehu Buhari ta sanar da tallafin a wajen taron gidauniyar da akayi a Abuja.

Wannan gudumawa itace mafi girma da wani mutum ya bayar domin yaki da cutar wadda aka samu mutum guda da ya kamu da ita a Najeriya.

Gidauniyar Aliko Dangote wadda ta bada naira biliyan guda wajen yaki da cutar ebola a Afirka na daga cikin sahun gaba gaba dake taimakawa wajen kula da lafiyar jama’a.