Ambaliyar ruwa ta shafi mutane dubu 50 a Sudan - MDD

Hoton ambaliyar ruwa a Laberiya AFP PHOTO / STR

Majalisar Dinkin Duniya tace ambaliyar ruwan bana ta shafi akalla mutane sama da 50,000 a kasar Sudan a cikin mako guda da ya gabata.

Kungiyar Jinkai ta Majalisar OCHA tace ruwan saman da ake ta shatatawa a cikin mako guda a sassan kasar ta Sudan ya haifar da ambaliya da zabtarewar kasa da rushewar gidaje da kayan more rayuwa a akalla Jihohi 14 daga cikin 18 dake cikin kasar.

Ministan cikin gida Eltrafi Elsidik yace akalla mutane 5 suka mutu sakamakon ambaliyar, yayin da sama da gidaje 3,500 suka rushe.

Jami’in kungiyar OCHA a Sudan Saviano Abreu, yace a shekarar 2019 mutane sama da 400,000 ambaliya ta shafa a cikin kasar.