Faransa ta tabbatar da mutuwar ‘Yan kasarta hudu a hadarin rugujewar tsaunukan kankara

Ofishin harkokin wajen kasar Faransa, ya tabbatar da mutuwar mutane hudu, ‘Yan kasar ta Faransa wadanda su ka rasa rayukansu a hadarin rugujewar tsaunukan kankara da ya auku jiya a kasar Nepal.  

Tsaunukan kankarar da suka rushe a kasar Nepal, su ka halaka mutane takwas REUTERS/Simrik Air/Handout

“A irin binciken da mu kayi na farko, ‘Yan kasar Faransa hudu sun rasu a wannan hadari” inji Minista mai kula da Faransawa a kasashen waje, Helene Conway – Mouret, a wata sanarwa da aka fitar.

Masu ayyukan ceto su na ta kokarin nemo biyu daga cikin Faransawa da wani Dan kasar Canada wadanada suna cikin jama’ar da su ka bace a hadarin.

Hukumomi a kasar Nepal a da sun bayyana cewa wadanda hadarin ya rutsa da su sun hada Faransawa hudu, Dan kasar ta Nepal daya, da Dan kasar Spain da wani Bajamush da kuma Dan kasar Italiya.