Coronavirus ta lakume sabbin rayuka a China da Amurka

A yau Laraba kasar China ta sanar da sabbin mutane 38 da cutar Coronavirus ta kashe duk da cewa, an samu raguwar yaduwar cutar cikin kwanaki uku a jere.

Wasu daga cikin masu dauke da Coronavirus aparat.com/ mahlatm

A jumulce dai, mtane 2,981 ne Coronavirus ta kashe a China kadai kamar yadda Hukumar Lafiyar Kasar ta bayyana, sannan fiye da dubu 80 da 200 sun kamu da annubar.

Kodayake a ‘yan kwanakin nan, an samu sassaucin yaduwar cutar sakamakon kwararan matakan killace jama’a da gwamnatin China ta dauka.

Sai dai har yanzu, ana ci gaba da dari-darin cewa, baki daga wasu kasashen ketare ka iya dakon cutar daga wasu wurare zuwa cikin China.

A bangare guda, Amurka ta daura damarar jan ragama wajen fatattakar wannan annuba daga doran-kasa musamman ganin yadda take barazana ga tattalin arzikin duniya.

A halin yanzu, Amurkawa guda 9 aka tabbatar da mutuwarsu sakamakon annubar, sannan fiye da 100 sun kamu da ita a kasar.

Shi ma Bankin Duniya ya kaddamar da tallafin Dala biliyan 12 domin agaza wa kasashen da cutar ta yi wa dirar mikiya.