Kasashen duniya sun fara maido da dokokin yaki da coronavirus

Kasashen duniya da dama sun fara maido da dokar takaita zirga-zirga a wannan mako, a daidai lokacin da duniya ke fuskantar barazanar sake bazuwar cutar coronavirus a karo na biyu.

China da ta kasance makyankyasar coronavirus na fuskantar sabuwar barazanar sake yaduwar cutar a karo na biyu tsakanin al'ummarta. NICOLAS ASFOURI / AFP

Rahotanni na cewa, cutar coronavirus ta ta’azzara hatta a kasashen da suka samu nasarar takaita yaduwarta a kwanakin baya.

Australia ta sanar da karuwar mutanen da cutar ke harba a kowacce rana , yayin de Vietnam ke tilasta wa dubban masu yawon bude ido ficewa daga tsakiyar birnin Danang saboda bazuwar cutar, inda a China aka tabbatar cewa, coronavirus na ci gaba da yaduwa tsakanin jama’ar kasar.

Hukumomin Hong Kong kuwa, sun haramta taruwar mutane fiye da biyu a wuri guda, baya ga sake rufe gidajen kalace tare da wajabta amfani da kyallen rufe fuska.

Kazalika wannan cuta ta sake ta’azzara a Spain, kasar da ta taba kasancewa cibiyar annobar covid-19, lamarin da ya sa a yanzu, Birtaniya ta wajebta killace duk wani matafiyi da ya yi balaguro daga kasar har tsawon makwanni biyu.

Hukumar Lafiya ta Duniya WHO ta sake nanata cewa, takaita zirga-zirga kadai, ba za ta rage bazuwar wannan annoba ba, har sai an hada da tsarin nesa nesa da juna da rufe baki da hanci .

Cutar coronavirus ta lakume rayukan mutane fiye da dubu 654, kuma nahiyar Turai ke da kashi daya bisa uku na wannan adadin mamatan.