Mamatan corona sun haura dubu 660

Yawan mutanen da annobar coronavirus ta halaka a sassan duniya ya haura dubu 660, yayin da adadin wadanda suka kamu da cutar ya haura miliyan 16 da dubu 750, bayan shafe watanni 7 da bullar annobar daga China.

Jami'an yaki da cutar coronavirus William WEST / AFP

Sabbin alkalumman hukumomin lafiya sun nuna cewar tun bayan bullar cutar a watan Disambar bara, akalla rayuka dubu 660 da 787 coronavirus ta lakume a duniya, daga cikin miliyan 16 da dubu 789 da 80 da suka kamu, sai dai daga cikinsu, miliyan 9 da dubu 555 da 900 sun warke.

Har yanzu Amurka ke kan gaba a tsakanin kasashen da cutar ta fi yin ta’adi, inda ta halaka sama da mutane dubu 149 da 200, daga cikin mutane kusan miliyan 4 da dubu 400 da suka kamu, yayin da akalla miliyan 1 da dubu 355 da 363 suka warke.

A Brazil mutane dubu 88 da 539 annobar ta COVID-19 ta kashe, a Birtaniya rayuka dubu 45 da 878, sai Mexico da ta rasa akalla mutane dubu 44 da 876.

A nahiyar Afrika, yawan rayukan da cutar ta salwantar a yanzu ya kai akalla dubu 18 da 496 daga cikin mutane dubu 875 da 652 da suka kamu, sai dai fiye da rabinsu sun warke.