WHO-Coronavirus

Sabon nau'in cutar Korona ya bazu zuwa sama da kasashe 60

Misalin kwayar cutar coronavirus da na'urar Komfuta ta fitar.
Misalin kwayar cutar coronavirus da na'urar Komfuta ta fitar. NEXU Science Communication/via REUTERS
Zubin rubutu: Nura Ado Sulaiman
Minti 2

Hukumar Lafiya ta Duniya WHO tace sabon nau’in cutar Coronavirus mai saurin yaduwa da ta soma bayyana a Birtaniya ya bazu zuwa sama da kasashe 60.

Talla

Hukumar ta WHO ta kuma ce sabon nau’in cutar ta Korona da ya bayyana a Afrika ta Kudu ya yadu zuwa kasashe 23 a yanzu.

Rahoton na zuwa ne a yayinda annobar ta lakume rayukan mutane sama da miliyan 2 a fadin duniya, daga cikin kusan miliyan 100 da suka kamu da cutar, shekara guda bayan bullarta a birnin Wuhan na kasar China.

Gano magungunan rigakafin annobar ta Korona da kamfanonin Pfizer, BioNTech, AstraZeneca, Moderna da kuma Jami’ar Oxford suka yi a karshen shekarar 2020 ya baiwa hukumomi kwarin gwiwar fatan kawo karshen cutar a nan kusa.

Sai dai bayyanar sabbin nau’ikan cutar a baya bayan nan, ya haifar da fargaba kan ko alluran rigakafin da aka samar za su yi tasiri wajen dakile su, a dai dai lokacin da hukumomin kasashe a sassan duniya suka tsaurara matakan takaita walwalar jama’a don yakar annobar da sake barkewa a zango na biyu.

A ranar Laraba China da tafi kowace kasa samun nasarar dakile cutar, ta sake kakabawa al’ummar Beijing dokar kullen hanasu fita daga birnin, saboda sake bayyana annobar a yankin Daxing dake kudancin babban birnin kasar.

LabaranSamun Labaran RFI, Hirarraki, Rubattattuun Labarai, Labarai game da wani, shirye-shirye.