Saudiya-Hajji

Mahajjata sun jefi shaidan da tsakuwa mai magani

Daya daga cikin mahajjata na jifan shaidan da dutsen da aka yi masa feshin maganin kashe kwayar cuta
Daya daga cikin mahajjata na jifan shaidan da dutsen da aka yi masa feshin maganin kashe kwayar cuta SPA/AFP

Mahajjatan bana  sun yi amfani da tsakuwar da aka feshe ta da maganin kashe kwayar cuta wajen jifan shaidan a wannan Talatar tare da mutunta ka’idojin yaki da annobar Korona.

Talla

Da safiyar yau ne, wani karamin adadi na mahajjatan ya doshi Jamratul Aqabah na Mina da ke kusa da birnin Makka domin jifan shaidan.

Mahajjatan sanye da takunkumi da kuma hirami, kowannensu ya yi amfani da tsakuwa bakwai-bakwai wajen jifan shaidan, tsakuwar da aka killace ta a cikin kananan jakunkuna.

A wasu shekarun baya, an samu asarar dubban rayukan mahajjata a wurin jifan shaidan a sanadiyar turmutsitsi da aka samu, amma a bana ba a samu irin wannan matsalar ba, inda ma Alhazan suka samu damar walawa sosai tare da ba su kwarya-kwaryar kariya.

Shekaru biyu kenan a jere da mahukuntan Saudiya suka takaita adadin mahajjata zuwa dubu 60 da zummar dakile yaduwar cutar Korona.

Aikin hajji dai, daya ne daga cikin shika-shikan Musuluci biyar wanda ke zama wajibi ga Musulmin da ya samu iko kuma sau daya tal a rayuwarsa.

LabaranSamun Labaran RFI, Hirarraki, Rubattattuun Labarai, Labarai game da wani, shirye-shirye.