Abin da ya faru bayan auren Hameed Ali a Kano

Mutumin da shugaban Hukumar Kwastam ta Najeriya Kanar Hameed Ali ya kasa a neman aure a ‘yan kwanakin nan a jihar Kano, ya musanta cewa, yana da masaniya kan wata takardar wasika da aka yada a kafafen labarai da ke neman a biya shi daukacin kudaden da ya kashe wa amaryar.

Hameed Ali tare da sabuwar amaryarsa Zainab Yahya RFI Hausa/Dandago

Zabairu Dalhatu Malami ya ce, ba da yawunsa aka fitar da wannan wasika ba da ke neman a biya shi Naira milyan 9.

A ranar Litinin takardar wasikar ta karade kafafen sada zumunta, inda ta yi bayai dalla-dalla kan kudaden da aka ce Malami ya kashe wa Zainab Yahya kafin shugaban kwastam din ya kasa shi.

A cikin sabuwar sanarwar da ya fitar da ke musanta ikirarin farko, Malami ya ce “ Ni Zubairu Malami mazaunin lamba 224 unguwar Durimin Zungura a jihar Kano, ina sanar da jama’a cewa takardar da aka wallafa a Sahara Reporters da sauran kafafen yada labarai, ba da yawuna aka fitar ba.

« Zainab ta kasance wadda na nemi aurenta amma Allah bai nufa ba, don haka ina mata fatan alkhairi da fatan zuriya dayyiba”