Najeriya ta yi asarar Dala miliyan 48 a satar man fetur

Najeriya ta yi asarar Dala miliyan 48 a satar man fetur REUTERS/Afolabi Sotunde

Katafaren Kamfanin Mai na Najeriya NNPC ya ce, kasar ta yi asarar kudin da ya kai Dala miliyan 48 ko kuma Naira biliyan 17 wajen satar mai a cikin wannan shekara.

Shugaban kamfanin man, Mele Kyari ya bayyana haka a wani taro da ya gudanar a Majalisar Dattawa kan tallafin man da gwamnati ke sanyawa da kuma bukatar tace man a cikin gida.

Kyari ya ce, wannan adadi na Dala miliyan 48 ya sha banban da asarar da Najeriya ta yi ta Dala miliyan 825 a shekarar 2018 da Dala biliyan 725 a shekarar da ta gabata.

Shugaban kamfanin ya ce, matakan da suke dauka wajen gadin bututun man ya taimaka wajen hana barayi fasawa suna satar man.