A karon farko 'yan Najeriya sama da 750 sun kamu da coronavirus a rana 1

A Karon farko Najeriya ta samu mutane mafi yawa da suka kamu da cutar coronavirus a rana guda, inda a jiya aka samu mutane 790, abinda ya kawo adadin Yan kasar da suka harbu da cutar zuwa 26,484, kana kuma 603 sun mutu.

Wasu 'yan Najeriya a Abuja yayin jiran yi musu gwajin cutar coronavirus. AFP

Hukumar yaki da cututtukan kasar tace daga cikin sabbin mutanen 790, 166 sun fito ne daga Jihar Delta, sai 120 a Lagos, 66 a Enugu, 65 a Abuja, 60 a Edo, 43 a Ogun da kuma 41 a Kano.

Sauran sun hada da 39 a Kaduna, 33 a Ondo, 32 a Rivers, 29 a Bayelsa, 21 a Katsina, 20 a Imo, 18 a Kwara, 11 a Oyo, 10 a Abia, 6 a Benue, 4 a Gombe, 2-2 a Yobe da Bauchi da Kebbi.