Isa ga babban shafi
Najeriya-Nijar

Jami’an tsaron Najeriya sun karbi Maina daga takwarorinsu na Nijar

AbduRasheed Maina tsohon shugaban kwamitin kula da kudaden fanshon Najeriya
AbduRasheed Maina tsohon shugaban kwamitin kula da kudaden fanshon Najeriya The Eagle Online
Zubin rubutu: Nura Ado Suleiman
Minti 2

Rundunar ‘yan sandan Najeriya ta maida AbduRasheed Maina tsohon shugaban kwamitin kula da kudaden fanshon kasar gida, bayan karbo shi daga hannun jami’an tsaron Jamhuriyar Nijar da suka kama shi a ranar Talatar da ta gabata.

Talla

Sanarwa mai dauke da sa hannun kakakin rundunar ‘yan sandan Najeriya Frank Mba a yau ce ta sanar da samun nasarar sake kame Maina da jami’an tsaron Najeriyar suka yi.

Jami’an tsaron Nijar sun cafke Maina ne bayan shelar neman sa ruwa a jallo tare da bada sammacin kamo shi da babbar kotun Najeriya ta yi, dangane da jerin tuhume-tuhumen da yake fuskanta kan almundahanar makudan kudaden fansho.

A watan Satumban shekarar 2019 Maina ya daina halartar zaman kotu, bayan bada shi beli yayin da yake fuskantar tuhume-tuhume 12 kan halasta kudaden haramun na fansho da yawansu ya kai naira biliyan 2.

Wannan ce ta sanya babbar kotun Najeriya ta bada umarnin tsare Sanata Ali Ndume da a baya ya tsayawa Maina kafin bada shi Beli, sai dai bayan shafe wasu ‘yan kwanaki a tsare, kotun ta bada belin Sanatan a ranar Juma’ar da ta gabata.

LabaranSamun Labaran RFI, Hirarraki, Rubattattuun Labarai, Labarai game da wani, shirye-shirye.

Babu shafi

Babu bayanan da ka bukata ko kuma sam babu su.