Najeriya-Tattalin arziki-Atiku

Atiku ya jaddada matsayinsa a kan sayar da NNPC

Atiku Abubakar, tsohon mataimakin shugaban Najeriya.
Atiku Abubakar, tsohon mataimakin shugaban Najeriya. REUTERS/Temilade Adelaja

Tsohon mataimakin shugaban Najeriya, Atiku Abubakar ya sake yin kir da a sayar da kamfanin man fetur na NNPC da matatun man kasar.

Talla

A ranar Lahadi ne Atiku ya jaddada wannan kira a matsayin daya daga cikin shawarwarinsa a game da yadda za  a shawo kan matsalar rashin aikin yi a kasar.

Kalaman na sa na zuwa ne  a matsayin martani  ga wani rahoton da kafar yada labaran tattalin arziki na Bloomberg Business ya ruwaito a ranar Asabar da ke cewa nan ba da jimawa ba Najeriya za ta kasance kasar da ta fi kwacce yawan masu zaman kashe wando a duniya da sama da kashi 33 cikin 100.

Hukumar kididdiga ta Najeriya ta ce rashin aikin yi a kasar ya tashi da kashi 33.3 cikin 100 a rubu’in karshe na shekarar da ta gabata, abin da ke nuni da cewa mutane miliyan 23 da dubu dari 2, ko kuma mutum 1 cikin 3 na wadanda suka kai munzulin gabatar da aiki a kasa ba shi da aikin yi ko wata sana’a.

Wannan adadi shine mafi muni a cikin shekaru 13, kuma na 2 a duniya.

A cikin sanarwa da ya fitara  ranar Lahadi, Atiku ya ce rahoton na Bloomberg ya nuna cewa bai yi kuskure ba a kan tsokacin da yake yi a game da tattalin arzikin Najeriya.

Atiku ya ce ya sha yin kashedi a game da haka amma aka yi ta jifarsa da munanan kalamai.

 

 

 

 

LabaranSamun Labaran RFI, Hirarraki, Rubattattuun Labarai, Labarai game da wani, shirye-shirye.