Girka ba za ta samu taimako na uku ba, inji Jamus

Ministan kudin kasar Jamus, Wolfgang Schaeuble, ya ce kasar Girka ba za ta samu taimakon ceto tattalin arzikinta ba a karo na uku, sai dai ya jaddada cewa, kasar ta Girka za ta cigaba da kasancewa a yankin na kasashen da ke amfani da kudin bai daya na euro. 

Ministan kudin kasar Jamus, Wolfgang Schaeuble REUTERS/Thomas Peter

Schaeuble ya fadi hakan ne a wata hira da gidan Radiyon kasar Jamus ta yi inda ya ce kudaden da ake bin kasar ta girka ya yi yawa.

A wataN Mayun shekarar 2010 ne kasar ta Girka ta zamanto kasa ta farko a yankin da ta samu taimakon kudin euro biliyan 110 da sharadin cewa za ta dauki matakan tsuke bakin aljihunta.

A watan Oktoba 2011 kuma, aka kara ba kasar ta Girka kudin euro biliyan 130 aka kuma yafe mata bashin kudin euro biliyan 100.

Amma a yanzu haka kasar na bukatar ta biya bukatin masu bata bashi wadanda akewa lakabi da “Troika” inda ta ke bukatar wasu kudade.

“yanzu dole ne sai Troika sun bamu rahoto a watan Oktoba” inji Schaeuble.

Ya kuma kara da cewa dole ne kasar ta Girka ta cigaba da kasancewa a cikin kasashe 17 dake amfani da kudin na euro, inda ya kara da cewa, “babu mafita ga kasar ta Girka.”