Kwallon Kafa

Spain ta doke Serbia amma Jamus da Holland sun sha kashi

Wallafawa ranar: 28/05/2012 - 12:32

'Yan wasan Faransa Adil Rami da Philippe Mexes a lokacin da suke murnanr zira kwallo a ragar Iceland a wasan sada zumunci da Faransa ta samu nasara da ci 3-2 REUTERS/Charles Platiau

Kasar Spain mai rike da kofin Turai ta nuna a shirye take domin ta lallasa kasar Serbia ci 2-1 a wasannin sada zumunci da kasashe suka gudanar a karshen mako, makwanni biyu masu zuwa a fara fafata gasar cin kofin Turai.

Talla

Sai dai Holland da Jamus basu sha da dadi ba, domin Jamus tasha kashi hannnun Switzerland ci 5-3. Bulgaria kuma ta doke Holland ci 2-1.

Jamus da Hollande dai a rukuni daya aka hada su a gasar Turai, Tare da Portugal da Denmark.

Sai dai wasa tsakanin Portugal da Macedonia an tashi ne babu ci 0-0. Brazil kuma ta lallasa Denmark ci 3-1.

Faransa dai tasha da kyar ne hannun Iceland domin an tashi wasan ne ci 3-2.
Tun da farkon fara wasan ne dai Iceland ta zira kwallaye biyu a ragar Faransa kafin daga bisani Faransa ta barke kwallaye tare da sake zira kwallo ta uku.

Ingila kuma ta samu galabar Norway ci 1-0 kuma wannan ita ce nasara ta farko Roy Hudgson ya samu a fara aikin horar da ‘yan wasan Ingila.

Wasannin sada zumunci da aka gudanar dai wata dama ce ga kasashen domin tantance ‘yan wasan da suka dace su haska a gasar cin kofin Turai da za’a gudanar a kasashen Polande da Ukraine.