Gasar Premier: West Ham ta doke Chelsea, Arsenal ta lallasa Norwich

A cigaba da fafata gasar Premier dake kasar Ingila, West Ham ta haifar da cikas ga burin Chelsea na kammala gasar ta bana a tsakanin kungiyoyi hudu na farko.

Dan wasan kungiyar West Ham Andriy Yarmolenko, yayin murnar jefa kwallo ta 3 a ragar Chelsea. Reuters

Yayin wasan na jiya da suka fafata dai West Ham ta doke Chelsea ne da kwallaye 3-2, abinda ya sa a har yanzu kungiyar ta Chelsea ke mataki na 4 a  tebur da maki 54, maki 2 kacal tsakaninta da Manchester United wadda a baya ta baiwa rata mai yawa.

A nata bangaren kuwa Arsenal lallasa kungiyar Norwich ta yi da kwallaye 4-0.

Wannan nasara dai ta baiwa Arsenal damar komawa matakin ta 7 da maki 46, cike da fatan samun gurbi ko dai a gasar Europa ko kuma ta zakarun turai.

A sauran wasannin da aka fafata AFC Bournemouth ta sha kashi a hannun Newcastle United da 4-1, sai kuma Everton da ta doke Leicester City da 2-1.