ភូមា

ការ​​ប្រកាស​​ភាព​​អាសន្ន​​នៅ​​រដ្ឋ​​ រ៉ាកាយ​​

នគរបាលទៅអន្តរាគមន៍នៅខេត្តរ៉ាកាយ(Rakhine)ប៉ែកខាងលិចភូមាបន្ទាប់ពីមានការបះបោរ២ថ្ងៃរវាងសហគមន៍អ្នកកាន់ពុទ្ធសាសនានិងសហគមន៍អ្នកកាន់សាសនាអ៊ីស្លាម
នគរបាលទៅអន្តរាគមន៍នៅខេត្តរ៉ាកាយ(Rakhine)ប៉ែកខាងលិចភូមាបន្ទាប់ពីមានការបះបោរ២ថ្ងៃរវាងសហគមន៍អ្នកកាន់ពុទ្ធសាសនានិងសហគមន៍អ្នកកាន់សាសនាអ៊ីស្លាម REUTERS/Staff

រដ្ឋាភិបាល​​ភូមា ​ប៉ុនប៉ង​​សម្រន់​​​ភាព​​​តានតឹង​​រវាង​​សហគមន៍​​សាសនា​​នៅ​​​រដ្ឋ​​រ៉ាកាយ​​ប៉ែក​​ខាង​​លិច​​ប្រទេស​​ភូមា​ បន្ទាប់ពី​​មាន​ការ​​បះបោរ​​២​ថ្ងៃ​តាំង​ពី​​ថ្ងៃ​​សុក្រ​​ទី​​៨​​មិថុនា​​រវាង​​សហគមន៍​​​អ្នក​​កាន់​​ពុទ្ធសាសនា​​និង​​សហគមន៍​​​​អ្នក​កាន់​​សាសនា​អ៊ីស្លាម។​ ការ​បះបោរ​​​នេះ ​បាន​​បណ្តាល​​​ឲ្យ​ស្លាប់​មនុស្ស​​យ៉ាង​​តិច​​៧​​នាក់​និង​​​របួស​​​ប្រមាណ​​​២០​​នាក់​​ទៀត។​​ កងទ័ព​​ភូមា ​ត្រូវ​​បាន​​ដាក់​​ពង្រាយ​​ដើម្បី​​​ការពារ​​សន្តិសុខ​​នៅ​​ក្នុង​​តំបន់។​ អាជ្ញាធរ​ភូមា​វិញ​​បាន​​ដាក់​​បម្រាម​​​គោចរ​ ហើយ​​ប៉ុន្មាន​​ម៉ោង​​ក្រោយ​​មក​​បាន​​ប្រកាស​​ភាព​​អាសន្ន​​ដែល​ផ្តល់​​អំណាច​​​ច្រើន​​ជាង​មុន​​ឲ្យ​​ដល់​​ពួក​​យោធា។ ​ទំនាក់​​ទំនង​​រវាង​​ពុទ្ធសាសនិកជន​​​ដែល​​មាន​​​​ភាគ​​ច្រើន​​នៅ​​រដ្ឋរ៉ាកាយ​​និង​​អ្នក​​កាន់​​សាសនា​​អ៊ីស្លាម​ មាន​លក្ខណៈ​អាក្រក់​ណាស់​​​​តាំង​​ពី​​ជា​​ច្រើន​​ទសវត្ស​​មក​​ហើយ​​ ក៏​ប៉ុន្តែ​ នេះ​​ជា​​លើក​​ទី​មួយ​​ដែល​វា​នាំ​ទៅ​​កាន់​​ការ​ប៉ះទង្គិ​ច​​គ្នា​បែប​នេះ។​​

ផ្សាយពាណិជ្ជកម្ម

អាជ្ញាធរ​ភូមា បាន​ប្រើ​មធ្យោបាយ​ធំៗ​ដើម្បី​ប៉ុនប៉ង​ក្តោបក្តាប់​ស្ថានការណ៍​ឡើងវិញ​នៅ​ក្នុង​តំបន់​រ៉ាកាយ ដោយ​បាន​បញ្ជូន​កងទ័ព​តាម​យន្តហោះ​និង​តាម​កប៉ាល់​ចម្បាំងជាច្រើនគ្រឿង​ដើម្បី​​យាម​ល្បាត​​ឃ្លាំមើល​នៅ​តាម​ដង​ទន្លេ​និង​នៅ​តាម​ដែន​សមុទ្រ​ជិត​តំបន់​ឆ្នេរ។

 
បន្ទាប់​ពី​​ បម្រាម​​គោចរបាន​ចូល​ជា​ធរ​មាន​​​​ចាប់តាំង​ពី​ម៉ោង​៦​ព្រឹក​រហូត​​ដល់​​ម៉ោង​៦​ល្ងាច  ស្ថានការណ៍​​​​នៅ​​រដ្ឋ​រ៉ាកាយ​ទំនង​ជា​​បាន​ស្ងប់ស្ងាត់​បន្តិច​មកវិញ ​ក្រោយ​ពីមានចលាចល​៤៨​ម៉ោង​មក។

ភាពតានតឹងកើតមាន​បណ្តាល​មក​ពីមាន​​ការ​ចាប់​រំលោភ​សេពសន្ថវៈ​និងការសម្លាប់​​យុវនារី​ម្នាក់​​​កាន់​ពុទ្ធសាសនា​​ពី​សំណាក់​​​ពួក​អ្នក​កាន់​សាសនា​​អ៊ីស្លាម​កាលពី​ចុង​ខែ​ឧសភា​កន្លង​ទៅ​នេះ។ បន្ទាប់មក ​នៅដើមខែមិថុនានេះ សហគមន៍​​អ្នក​កាន់​ពុទ្ធសាសនា​ជា​ច្រើន​រយ​នាក់​ដែល​ជឿជាក់​ថា បាន​រក​​ឃើញ​ពួក​ជន​សង្ស័យ និង​បាន​សម្លាប់​ពួក​អ្នក​ធ្វើ​ធម្មយាត្រា​ស្វែង​បុណ្យ​សាសនា​អ៊ីស្លាម ចំនួន​១០​នាក់​។ ​ឧប្បត្តិហេតុ​នេះ បានបង្ក​​បំផុស​កំហឹង​ក្រេវក្រោធ​​នៅ​ក្នុង​សហគមន៍​អ៊ីស្លាម ហៅថា ពួក Rohingysasដែល​បាន​​នាំគ្នា​ធ្វើការ​សង​សឹក​តប​វិញ​​ ដោយ​បាន​ដុត​បំផ្លាញ​ផ្ទះ​សម្បែង​និង​ហាង​លក់​ទំនិញ​របស់​​សហគមន៍​អ្នក​កាន់​ពុទ្ធសាសនាអស់ជាច្រើនរយខ្នង។

ក្រុមនគរបាលភូមា ​បាន​ចេញ​​មុខ​ធ្វើ​អន្តរាគមន៍ ប៉ុន្តែ​យោង​តាម​មធ្យោបាយ​ឃោសនា​មហាជន​ភូមា ពួក​នគរបាល គ្រាន់​​តែ​បាញ់​​កំញើញ​សម្លុត​តែប៉ុណ្ណោះ។ ​សារព័ត៌មាន​ភូមា​ដដែល​នេះ​កាលពីចុងសប្តាហ៍​កន្លងទៅនេះ​ ​ បាន​​អំពាវនាវឲ្យ​សម្រន់​ស្ថានការណ៍ ​ដោយ​​បាន​​ព្រមានប្រាប់​អំពីការអាចកើតមាន​​អនាធិបតេយ្យ។
 

ក្រុម​អ្នក​កាន់​សាសនា​​អ៊ីស្លាម​​​រ៉ាកាយ​​នៅ​​ថៃ​​​នាំ​គ្នា​ឈរ​នៅ​មុខ​អគារ​​អសប​​នៅ​បាងកក​​លើក​​​បង្ហាញ​​រូបថត​សាកសព​របស់​​អ្នក​កាន់​សាសនា​អ៊ីស្លាម​នៅ​រ៉ាកាយ​ដែល​ស្លាប់​​ក្នុង​​ការ​ប៉ះ​ទង្គិច​គ្នា​នា​​ពេល​ថ្មីៗ​​នេះ​​​
ក្រុម​អ្នក​កាន់​សាសនា​​អ៊ីស្លាម​​​រ៉ាកាយ​​នៅ​​ថៃ​​​នាំ​គ្នា​ឈរ​នៅ​មុខ​អគារ​​អសប​​នៅ​បាងកក​​លើក​​​បង្ហាញ​​រូបថត​សាកសព​របស់​​អ្នក​កាន់​សាសនា​អ៊ីស្លាម​នៅ​រ៉ាកាយ​ដែល​ស្លាប់​​ក្នុង​​ការ​ប៉ះ​ទង្គិច​គ្នា​នា​​ពេល​ថ្មីៗ​​នេះ​​​ REUTERS/Chaiwat Subprasom

គួររំលឹកថា សហគមន៍​​អ្នក​កាន់សាសនា​អ៊ីស្លាម​នៅ​រដ្ឋ​រ៉ាកាយ​ដែល​​មាន​ដើម​កំណើត​មក​ពី​តំបន់ អាស៊ី​ខាង​ត្បូង ត្រូវ​បាន​ជនជាតិ​អង់គ្លេស​ជំនាន់​អាណានិគមនិយម​​នៅ​ភូមា នាំ​យក​​មក​ធ្វើ​ការ​ជា​កម្មករ​ស្រែចម្ការ។ ក្រោយពី​ភូមា​បាន​ទទួល​ឯករាជ្យ​ ពួក​កម្មករទាំងនេះ​ដែលត្រូវបានគេបំបរ​បង់​ដាក់​ឲ្យ​នៅ​ឆ្ងាយ​ពី​គេ ​​ពុំដែលត្រូវគេ​ទទួល​ស្គាល់​ជា​ពលរដ្ឋ​ភូមាឡើយ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI