នាទីសុខភាពនិងអនាម័យ

តើត្រូវប្រើម៉ាស យ៉ាងដូចម្តេច ?

សំឡេង ០៨:៥៤
ភ្នាក់ងារ​នគរ​បាល​ម៉ាឡេស៊ី ពាក់​ម៉ាស​ការពារ​វីរុស​កូរ៉ូណាថ្មី ពេល​កំពុង​ល្បាត​ក្នុង​ក្រុង​កូឡាឡាំពួរ​
ភ្នាក់ងារ​នគរ​បាល​ម៉ាឡេស៊ី ពាក់​ម៉ាស​ការពារ​វីរុស​កូរ៉ូណាថ្មី ពេល​កំពុង​ល្បាត​ក្នុង​ក្រុង​កូឡាឡាំពួរ​ Lim Huey Teng/Reuters

តាំង​ពី​​​ផ្ទុះ​មេរោគ​កូរ៉ូណាថ្មី​​នៅប្រទេស​ចិន​មក មិន​ថា​នៅ​ប្រទេស​បារាំង ឬ​នៅ​ប្រទេស​កម្ពុជា​ទេ ផលិតផល​ម៉ាស បាន​លក់​ដាច់​ស្ទើរ​​អស់​ពី​ស្តុក​ សម្រាប់​ឱសថស្ថាន​ខ្លះ។ ម៉ាស ជា​រនាំង​ ទប់​​បាក់តេរី និង​ ការពារ​ការ​ចម្លង​វីរុស​ទៅ​អ្នក​ដទៃ។ ប៉ុន្តែ​តើម៉ាសមាន​ប្រសិទ្ធភាព​ការពារ​ទល់​នឹង​វីរុស កូរ៉ូណាថ្មី​ ដែរ​ឬទេ ? តើ​ត្រូវជ្រើសរើស និង​​ពាក់​ម៉ាស​យ៉ាង​ដូច​ម្តេច​? ពេល​ណា​ត្រូវ​ប្តូរ ?

ផ្សាយពាណិជ្ជកម្ម

ម៉ាស​មានច្រើន​ប្រភេទ និង​មាន​ដាក់លក់​ច្រើន​តាម​ទីផ្សារ តាម​ឱសថស្ថាន។ ប៉ុន្តែ​នា​ឱកាស​នេះ យើង​ខ្ញុំ​សូម​លើក​យក​តែ​អំពី​ម៉ាស​ពីរ​ប្រភេទ មក​បរិយាយ។ គឺ​ម៉ាស​ប្រឆាំង​នឹង​វីរុស និង​ម៉ាស​ការពារ​ខ្យល់​ពុល។

ដូចម្តេច​ដែល​ហៅ​ថា ម៉ាស​ប្រឆាំង​នឹង​វីរុស ?

ម៉ាសប្រឆាំង​នឹង​វីរុស ក៏​មាន​ពីរ​ប្រភេទ​ដែរ។ ទី​មួយ​គឺ​ ជា​ម៉ាស​ដែល​គ្រូពេទ្យ​វះកាត់ គិលានុបដ្ឋាក គិលានុបដ្ឋាយិកា ពាក់ ឬ​ហៅ​តាម​ភាសាបារាំង​ Masque chirurgical ដែល​មាន​សមត្ថភាព​ចម្រោះ​បាក់តេរី​បាន​ពី ៩៥ ទៅ​៩៨% ទៅ​តាម​គុណភាព (៩៥%​ សម្រាប់​ម៉ាស​លក់​ឱ្យសាធារណៈ​ និង​៩៨%​សម្រាប់​គ្រូពេទ្យ​ប្រើ)។ ម៉ាស​ប្រភេទ​នេះ ត្រូវ​បាន​គេ​ផលិត​ឡើង ដើម្បី​ចម្រោះ​បាក់តេរី និងខ្ទប់​វីរុស កុំ​ឱ្យ​ខ្ទាត​ពី​មាត់​​អ្នក​ជំងឺ ទៅ​ចម្លង​អ្នក​ដទៃ នៅ​ក្បែរ​នោះ​។ ម៉ាសនេះ ត្រូវ​បាន​ក្រុមគ្រូពេទ្យពាក់​ នៅពេល​វះកាត់អ្នក​ជំងឺ នៅ​ក្នុង​បន្ទប់​វះកាត់ ដើម្បី​កុំ​ឱ្យ​​​គ្រូពេទ្យ​ចម្លង​បាក់តេរី​ដែល​មាន​នៅ​ក្នុង​មាត់​គ្រូពេទ្យ​ ​ទៅ​​លើ​ដំបៅ ឬ ​របួស របស់​អ្នក​ជំងឺ។ តែ​ក៏​ត្រូវ​បាន​​សាធារណៈ​ជូន​ទៅ ប្រើប្រាស់​យ៉ាង​ទូលំ​ទូលាយ សម្រាប់​ការពារ​​ទល់​នឹង​វីរុស ​បាក់តេរី​ មួយ​ចំនួន​ ដូច​ជា​វីរុស​ផ្តាសាយ​ជា​ដើម។

ម៉ាសប្រឆាំង​នឹង​វីរុស​ប្រភេទ​ពីរ ឬ​ម៉ាស FFP2 ឬ​ FFP3 ឬ​ហៅ​ថា​ម៉ាស​ជំពុះ​ទា ក្រាស់​ជាង​ម៉ាស​ប្រភេទ​ទីមួយ ហើយ​អាច​គ្រប​លើ​មាត់​និង​ច្រមុះ​ទាំង​មូល​បាន។ ម៉ាសនេះ​មាន​តួនាទី ការពារ​កុំ​ឱ្យ​វីរុស​របស់​អ្នក​ជំងឺ​ឆ្លង​ចូល​មក​មនុស្ស​ជា​។ បាន​ន័យ​ថា​ម៉ាស​នេះ​ផ្តល់​សុវត្ថិភាព​ខ្ពស់​ និង​ត្រូវ​បាន​គេ​យក​មក​ប្រើប្រាស់​ច្រើន នៅ​ក្នុងមណ្ឌល​ព្យាបាល​ជំងឺ​ឆ្លង​ខ្លាំង ដូច​យ៉ាង​ជំងឺ​របេង​ជា​ដើម។ ប៉ុន្តែ​ម៉ាស​នេះអាច​មាន​ប្រសិទ្ធភាព​ខ្លាំង ដរាប​ណា​តែ​វា​ត្រូវ​នឹង​ទម្រង់​មុខ​របស់​អ្នក​ពាក់​។ ជាម៉ាស​សម្រាប់​​​អ្នក​​ជំនាញ​ផ្នែក​សុខភាព និង​មាន​អាជីព​ពាក់​ព័ន្ធ​មួយ​ចំនួន មិន​មែន​សម្រាប់​សាធារណជន​ទូទៅ​ប្រើ​សម្រាប់ការពារ​វីរុស​តូច​តាច​ឡើយ។

ប៉ុន្តែទោះ​ក្នុង​ករណី​ប្រើ​ម៉ាស​ប្រភេទ​ណា​ក៏​ដោយ គេ​អាច​ទទួល​បាន​ប្រសិទ្ធភាព​ពេញ​លេញ ដរាប​តែ​អ្នក​ប្រើប្រាស់​បាន​ត្រឹម​ត្រូវ។ នេះ​ជា​ដំបូន្មាន​របស់​អ្នក​ស្រី ឃុន វារី ឱសថការី​ខ្មែរ​ម្នាក់ នៅ​ជាយ​ក្រុង​ប៉ារីស ៖

  • លាង​ដៃ​នឹង​សាប៊ូ​ឱ្យ​ស្អាត​មុន​នឹង​លើកម៉ាសមក​ពាក់
  • ពាក់​ម៉ាស​ឱ្យ​ត្រូវ​ទិស។ ផ្ទៃសទល់​ជាប់​មុខ ផ្ទៃ​ភ្លី នៅ​ខាង​ក្រៅ ផ្នត់​បែរមក​ខាង​ក្រោម
  • ថ្ពក់​ខ្សែ​ទៅ​នឹង​ត្រចៀក​ទាំង​សងខាង រួច​ទាញ​ម៉ាស​ឱ្យ​គ្រប​ជិត​ចង្កា
  • ពេល​ដោះ​ម៉ាស​ចេញ សូម​កុំ​ប៉ះ​ផ្នែក​ខាង​មុខ​នៃ​ម៉ាស
  • ម៉ាសប្រើរួច ត្រូវ​បោះចោល​ក្នុង​ធុង​សំរាម​ឱ្យ​បាន​ត្រឹម​ត្រូវ
  • លាង​ដៃ​ក្រោយ​ពេល​ដោះម៉ាស

ម៉ាស អាច​ប្រើ​បាន​តែ​ម្តង​ និង​ប្តូរ​ជារៀង​រាល់ បួន​ម៉ោង​ម្តង សម្រាប់​ម៉ាស​ប្រភេទ​ទី​មួយ និង​៨​ម៉ោង​ម្តង​សម្រាប់​ម៉ាស​ជំពុះទា។ សូម​ជ្រើសរើស​ទិញ​ម៉ាស តាម​ឱសថស្ថាន ដើម្បី​ធានា​អំពី​គុណភាព​នេះ​ម៉ាស ថា​ពិត​ជា​ផលិត​ឡើង​ដោយ​គោរពតាម​បទដ្ឋាន​សុខភាព​ត្រឹម​ត្រូវ ​ដែល​មាន​សរសេរ​បញ្ជាក់​បទ​ដ្ឋាន​អឺរ៉ុបNF EN 14683។

​ម៉ាស​ប្រឆាំង​នឹង​ខ្យល់​ពុល តើ​គួរ​ប្រើ​ម៉ាស​របៀបណា ?

តាំង​ពី​មុន​ផ្ទុះ​ករណី​កូរ៉ូណា​វីរុស​មក​ម្ល៉េះ​ដែលក្រសួង​សុខាភិបាល​​​បារាំង បាន​ទាមទារ​ឱ្យ​មាន​ការ​សិក្សា​​វាយ​តម្លៃ​អំពី​ម៉ាស​ប្រឆាំង​នឹង​ខ្យល់​ពុល ព្រោះ​មាន​ពលរដ្ឋ​ជា​ច្រើនស្នើ​សុំ​ និង​ក្រោយ​ពី បាន​ឃើញ​ស្ថានភាព​ខ្យល់​បរិយាកាស​ពុល​កាន់​តែ​ខ្លាំង​ឡើង កើត​ឡើង​ជា​ញឹកញាប់​នៅ​ក្នុង​ប្រទេស និង​តាម​ទីក្រុង​ធំៗ​លើ​ពិភពលោក ជាពិសេស​នៅ​ចិន​ ឬ​នៅ​ឥណ្ឌា។

​ភ្នាក់ងារ​សន្តិសុខសុខភាព​​ចំណីអាហារ​ជាតិបានផ្តល់​​ចម្លើយ​​តាម​រយៈ​របាយការណ៍​ដ៏​លម្អិត​ថា ការ​ប្រើ​​ម៉ាសគ្រូពេទ្យ ម៉ាស​ប្រភេទ​ទី​មួយ​ នេះ​គ្មាន​សមត្ថភាព​ប្រឆាំង​នឹង​ខ្យល់​ពុល លម្អង​ធូលី​ ធាតុ​ល្អិត​ឆ្មារៗ​ក្នុង​បរិយាកាស​ទេ។ ​ព្រោះ​ម៉ាស​ប្រភេទ​នេះ អាច​ការ​ទប់​មិន​ឱ្យ​មីក្រូវីរុស​ចេញ​ពី​មាត់​និង​ច្រមុះ​យើង​ទៅ​លើ​អ្នក​ដទៃ តែ​មិន​អាច​ការពារ​ ​មិន​ឱ្យ​ខ្យល់ពុល​ចូលក្នុង​ខ្លួន​មនុស្ស​វិញ​ឡើយ។ ចំណែក​ម៉ាស​មួយ​ប្រភេទ​ទៀត ដែ​ល​គ្រប​មាត់ គ្រប់​ច្រមុះ​ពេញ ទាំង​ស្រុង ឬ​ម៉ាស​ប្រឆាំង​នឹង​ខ្យល់​ពុល​តែម្តង អាច​ទប់​ស្កាត់​ លម្អង​ ធូលី និងធាតុល្អិត​ឆ្មារៗ​បាន​ខ្លះ​មែន តែ​មិន​ប្រាកដជា​អាចទប់​ខ្យល់​និង​ឧស្ម័ន​ពុល​ ដូច​ជា​ អាហ្សូត ឌីអុកស៊ីត ឬ​បេនហ្សែន​ បញ្ចេញ​ដោយ​ផ្សែង​ឡាន​ផ្សែង​ម៉ូតូ​ និង​រោងចក្រ​ឧស្សាហកម្ម​ឡើយ។

បើ​តាម​អ្នក​ជំនាញ ប្រសិទ្ធភាព​នៃ​ម៉ាស​ប្រឆាំង​ខ្យល់ពុល មាន​ទាក់ទងខ្លាំង​នៅ​នឹង​របៀប​ប្រើប្រាស់​ ពាក់​ម៉ាស​ទៀត។ ដើម្បី​ពាក់ម៉ាស​ បាន​ជិត​ និង​ទប់​ខ្យល់​ពុល​បាន​ល្អ ត្រូវ​អ្នក​ដំណើរ​ អ្នក​ជិះកង់​ម៉ូតូ កោរ​ពុកមាត់​ពុកចង្ការ​ឱ្យ​រលោង​ស្អាត​បំផុត។ នៅ​សល់​រោម​តែ​បន្តិច​បន្តួច​ ខ្យល់​ពុល​អាច​ជ្រៀប​ចូល​ក្នុង​ខ្លួន​បាន​ហើយ។ ខ្សែ​ម៉ាស ត្រូវ​ឱ្យ​តឹង បើ​យារ​តែ​បន្តិច​ ក៏​នឹង​ធ្វើ​ម៉ាស​ធ្លាក់​ប្រសិទ្ធភាព​ដែរ។​

ពាក់​ម៉ាស មិន​មែន​ជា​មធ្យោបាយ​ដ៏​ល្អ​ប្រពៃ​សម្រាប់​ទប់​ស្កាត់​ការ​ស្រូប​ខ្យល់​បរិយាកាស​ពុលមិន​ឱ្យ​​ចូល​ក្នុង​ខ្លួនទេ។ សូមកុំ​​រក្សា​ចិត្ត​ថា​ការ​ពាក់​ម៉ាសហើយ អ្នក​អាច​ជិះកង់​ជិះម៉ូតូ នៅ​ក្រោយ​បំពង់​ផ្សែង​ឡាន ដោយ​សុវត្ថិភាព​ឱ្យ​សោះ។ ខ្យល់​ពុល​ជា​បញ្ហា​ដែល​កើត​មាន​ដោ​យដុបៗ ដោយ​កន្លែង។ ដូច្នេះ​សូម​ជ្រើសរើស​ ដើរ​ ជិះកង់ ជិះម៉ូតូ តាម​ផ្លូវ​ណា​ដែល​ពុំ​សូវ​មាន​ចរាចរណ៍​ និង​ការ​កក​ស្ទះ​ខ្លាំង៕

អន្តរាគមន៍​ដោយ​អ្នកស្រី​ឱសថការី ឃុន វ៉ារី

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI