ច្បាប់-កូរ៉ូណាវីរុស

រដ្ឋាភិបាលបញ្ចប់បម្រាមគោចរមុនពេលថ្ងៃកំណត់មកដល់ ដើម្បីកុំឲ្យស្ទះចរាចរណ៍

ទង់ជាតិកម្ពុជា (រូបតំណាង)
ទង់ជាតិកម្ពុជា (រូបតំណាង) @Internet

រដ្ឋាភិបាលកម្ពុជា​បានសម្រេច​បញ្ចប់​ហើយ ​នូវ​បម្រាម​គោចរ​ដែល​មិនឲ្យ​ប្រជាពលរដ្ឋ​ធ្វើ​ដំណើរ​ឆ្លងពីខេត្ត​មួយ​ទៅ​កាន់​ខេត្ត​មួយទៀត​ក្នុង​អំឡុង​ពេលមុន​ពិធីបុណ្យចូលឆ្នាំខ្មែរ ដែលត្រូវបាន​ដាក់​ចេញ​កាលពី​ម៉ោង​២៤​យប់​ថ្ងៃទី៩​មេសា។ ការ​ប្រកាសបញ្ចប់​បម្រាម​គោចរនៅពេលនេះ ធ្វើ​ឡើង​មុន​ដល់​ពេល​កំណត់​១៨ម៉ោង ពោលបម្រាមចាស់នឹងត្រូវ​ផុត​កំណត់​នៅម៉ោង​២៤​ថ្ងៃទី១៦​មេសានេះ។

ផ្សាយពាណិជ្ជកម្ម

យោង​តាម​សេចក្តី​សម្រេច​របស់​ប្រមុខ​រដ្ឋាភិបាល​លោក ហ៊ុន សែន នៅថ្ងៃទី១៦​មេសា​ ការ​បញ្ចប់​សុពលភាព​បទ​បញ្ជាលេខ០២​ស្តីពី​ការ​ដាក់​កំហិតលើ​ការ​ធ្វើ​ដំណើរ​ក្នុង​ប្រទេស​ដើម្បី​ទប់​ស្កាត់​ការ​ឆ្លង​កូវីដ​១៩នោះ ដោយ​យោង​លើ​តម្រូវ​ការ​ធ្វើ​ដំណើរ​របស់​ប្រជាពលរដ្ឋដើម្បី​ជៀស​វាង​ការ​កកស្ទះចរាចរណ៍។

ភ្លាមៗ​ក្រោយ​ពេលបញ្ចប់​បម្រាមនេះ លោក ហ៊ុន សែន បានអរគុណសារជាថ្មីដល់ជនរួមជាតិដែលបានយោគយល់ដល់ការដាក់បម្រាមមិនអោយធ្វើដំណើរឆ្លងកាត់ខេត្តបណ្តោះអាសន្នរយៈពេលខ្លីកន្លងទៅនេះ ដើម្បីទប់ស្កាត់ការឆ្លងរាលដាលជំងឺកូវីដ១៩ នៅកម្ពុជា។

សូមរំឭកថា បម្រាបគោចររបស់​រដ្ឋាភិបាល​ដែល​ចេញជាបន្ទាន់​កាលពីថ្ងៃទី៩​មេសា​ ពោល​មុនពេល​កម្មករ​​សម្រុក​នាំគ្នាចេញពីភ្នំពេញទៅកាន់​ស្រុកកំណើត​នោះ​គឺបាន​កែប្រែលក្ខខណ្ឌមួយចំនួនជាបន្ត​បន្ទាប់​។ ដំបូងឡើយបម្រាមនេះ​គឺហាមឃាត់ការធ្វើដំណើរពីភ្នំពេញទៅកាន់​បណ្តាខេត្តទាំងអស់ និង​ហាមការ​​ធ្វើ​ដំណើរពីស្រុក​មួយ​ទៅ​ស្រុក​មួយទៀត​នៅក្នុង​ខេត្ត​នីមួយៗ។ ប៉ុន្តែ​បន្តិច​ក្រោយ​មក ​បាន​លុប​ចោល​នូវ​បម្រាប​ធ្វើ​ដំណើរពីស្រុក​មួយ​ទៅ​ស្រុក​មួយ​នៅក្នុង​ខេត្ត ហើយ​ក៏អនុញ្ញាត​ផងដែរ សម្រាប់​អ្នក​ភ្នំពេញ​និង​ខេត្តកណ្តាលអាច​ធ្វើ​ដំណើរបាន។

យ៉ាងណាក៏​ដោយ​ គេ​កត់សំគាល់ឃើញថា ទោះបីជាមានបម្រាមយ៉ាងនេះក្តីតែ​មនុស្សមួយចំនួន​នៅតែ​ជំនៈ​ចាកចេញពីទីក្រុង​ភ្នំពេញទាំងយប់​នៅក្រោម​ដំណក់ទឹក​ភ្លៀងយ៉ាង​ជោគជាំ។ លើស​ពីនេះទៀត​មនុស្ស​មួយចំនួន​បាន​បន្លំខ្លួននៅ​​ក្នុង​រថយន្តដឹក​ទំនិញធន់ធ្ងន់ ដើម្បី​បាន​ធ្វើ​ដំណើរទៅកាន់​ស្រុក​កំណើត​ ខណៈ​រថយន្ត​ដឹកទំនិញ​មិន​ត្រូវ​បាន​ហាមឃាត់ការ​ធ្វើចរាចរណ៍។

ការនេះបានធ្វើឲ្យ​លោក​ឧប​នាយក​រដ្ឋ​មន្ត្រី ស ខេង ​ទទួល​ស្គាល់​ថា វិធាន​ការ​ដាក់​កំហិត​ការ​ធ្វើ​ដំណើរ​របស់​ពលរដ្ឋ​មិន​អាច​អនុវត្ត​ឲ្យ​មាន​ប្រសិទ្ធិ​ភាព​ទាំង​ស្រុង​បាន​ទេ។ បើ​តាម​រដ្ឋ​មន្ត្រី​ក្រសួង​មហាផ្ទៃ គឺដោយ​សារតែវិធាន​ការ​នេះ មិនមានការ​ដាក់​ទោស​ទណ្ឌ​អ្វី​ឡើយ​៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI