កម្ពុជា-កូរ៉ូណាវីរុស

លោក ហេង សួរ៖ កម្មករ២នាក់ចេញរោគសញ្ញាកូវីដ១៩ និងបានយកសំណាកទៅពិនិត្យ

កម្មករ កម្មការនី (រូបភាពតំណាងទូទៅ)
កម្មករ កម្មការនី (រូបភាពតំណាងទូទៅ) © Internet

នៅ​ព្រឹក​ថ្ងៃ​ចន្ទ​នេះ ក្រុម​មន្រ្តី​ជំនាញ​សុខា​ភិបាល​បាន​ចាប់​ផ្តើម​ត្រួត​ពិនិត្យ​សុខ​ភាព​កម្មករ កម្មការិនី​ដែល​បាន​ទៅ​លេង​បុណ្យ​ចូល​ឆ្នាំ​ថ្មី​នៅ​ស្រុក​កំណើត​។ ក្នុង​ចំណោម​កម្មករ កម្មការិនី​ដែល​ពិនិត្យ​សុខ​ភាព​នៅ​ថ្ងៃ​នេះ ក្រុម​មន្រ្តី​ជំនាញ​សុខា​ភិបាល​បាន​រក​ឃើញ​ថា មាន​កម្មករ​២នាក់​មាន​ចេញ​រោគ​សញ្ញា​នៃ​ជំងឺ​កូវីដ-១៩ ហើយសំណាក​របស់​ពួក​គេ​ត្រូវ​បាន​បញ្ជូន​ទៅ​ធ្វើ​តេស្ត​នៅ​វិទ្យា​ស្ថាន​ប៉ាស្ទ័រ​កម្ពុជា​។

ផ្សាយពាណិជ្ជកម្ម

លោកហេង សួរ​ អ្នកនាំពាក្យក្រសួងការងារ និង បណ្តុះបណ្តាលវិជ្ជាជីវៈកម្ពុជាបានអះអាងប្រាប់ក្រុមអ្នកកាសែតថា គិតមកត្រឹមថ្ងៃចន្ទនេះ កម្មករ២នាក់ត្រូវបានរកឃើញថាមានរោគសញ្ញានៃជំងឺកូវីដ-១៩ តែលោកមិនបញ្ជាក់លម្អិតឡើយ ដោយគ្រាន់តែប្រាប់ថា សំណាករបស់ពួកគេត្រូវបានយកទៅធ្វើតេស្តនៅវិទ្យាស្ថានប៉ាស្ទ័រកម្ពុជា។ បើតាមលោកហេង សួរ ក្រៅពីកម្មករមានរោគសញ្ញាទាំង២នាក់នេះ កម្មករ កម្មការិនីដទៃទៀត គឺត្រូវដាក់ឱ្យដាច់ដោយពីគេរយៈពេល១៤ថ្ងៃសិន ដើម្បីបន្តតាមដានស្ថានភាពសុខភាព មុនអនុញ្ញាតឱ្យចូលបម្រើការងារ។

សូមបញ្ជាក់ថា កម្មករ កម្មការិនីដែលធ្វើការក្នុងវិស័យកាត់ដេរ និង ដេរស្បែកជើងចំនួនជិត៣ម៉ឺននាក់នៅទូទាំងប្រទេសកម្ពុជាត្រូវដាក់ឱ្យនៅដាច់ដោយឡែកពី បន្ទាប់ពីទៅស្រុកកំណើតក្នុងអំឡុងបុណ្យចូលឆ្នាំផ្ទុយពីបម្រាបរបស់រដ្ឋាភិបាល។ នៅរាជធានីភ្នំពេញ មានកម្មករ កម្មការិនីប្រមាណជា១ម៉ឺន៥ពាន់នាក់ ត្រូវដាក់នៅដាច់ដោយឡែកពីគេ។ សម្រាប់រាជធានីភ្នំពេញ  ក្រសួងការងារ និង អាជ្ញាធរពាក់ព័ន្ធបានរៀបចំមណ្ឌលចត្តាឡីស័កចំនួន ១០កន្លែង គឺនៅសួនឧស្សាហកម្មវឌ្ឍនៈ១ នៅសួនឧស្សាហកម្មកាណាឌីយ៉ា, អនុវិទ្យាល័យគោកបញ្ជាន់, សួនឧស្សាហកម្មវឌ្ឍនៈ២, វិទ្យាល័យជម្ពូវ័ន្ត, អនុវិទ្យាល័យដង្កោ, វិទ្យាល័យភ្នំពេញថ្មី, តំបន់សេដ្ឋកិច្ចពិសេសភ្នំពេញ, សាលាបឋមសិក្សាភូមិឫស្សី និងនៅវិទ្យាល័យឫស្សីកែវ។

លោកហេង សួរ បានគូសបញ្ជាក់ថា មណ្ឌលចត្តាឡីស័កទាំងនេះត្រូវបានបែងចែកជា២កម្រិត គឺមណ្ឌលចត្តាឡីស័កកម្រិត១ និងមណ្ឌលចត្តាឡីស័កកម្រិត២។ លោកពន្យល់ថា មណ្ឌលចត្តាឡីស័កកម្រិត១ គឺស​ម្រាប់កម្មករ កម្មការិនីដែលត្រូវការដាក់ខ្លួនឱ្យនៅដាច់ដោយឡែកពីគេក្នុងផ្ទះ ឬបន្ទប់ជួលផ្ទាល់ខ្លួន ប៉ុន្តែ ម្ចាស់បន្ទប់ជួលមិនហ៊ានឱ្យនៅក្នុងបន្ទប់ជួលរបស់គេ។ ដូច្នេះ ពួកគេអាចមកស្នាក់នៅដាច់ដោយឡែកនៅមណ្ឌលនេះបាន។

ចំណែក មណ្ឌលចត្តាឡីស័កកម្រិត២វិញ គឺមានតែនៅអគារនៃវិទ្យាល័យជម្ពូរវ័ន្តហើយសម្រាប់ដាក់បុគ្គលដែលត្រូវបានគេយកសំណាកទៅត្រួតពិនិត្យនៅវិទ្យាស្ថានប៉ាស្ទ័រ។ ប្រសិនបើត្រួតពិនិត្យឃើញវិជ្ជមាន នឹងត្រូវបញ្ជូនទៅព្យាបាលនៅមន្ទីរពេទ្យរុស្ស៉ី។ បើតាមលោកហេង សួរ មណ្ឌលចត្តាឡីស័កកម្រិត២ គឺក្នុង១បន្ទប់ស្នាក់នៅបានតែម្នាក់ប៉ុណ្ណោះ ខណៈអាគារចត្តាឡីស័កកម្រិត១ អាចស្នាក់បានលើសពីម្នាក់ គឺអាចដាក់មនុស្សប្រហែល ២,៥០០នាក់បាន៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI