អានតួអត្ថបទ
ទស្សនៈព្រឹត្តិការណ៍ពិភពលោក

អាចម៍ផ្កាយដ៏ធំមួយហោះកាត់ក្បែរផែនដីនៅថ្ងៃពុធ​ តែមិនបង្កគ្រោះថ្នាក់

សំឡេង ០៥:០១
អាចម៍ផ្កាយ​ជាបំណែកថ្ម​ដែល​សេសសល់​ពីការ​កកើត​ប្រព័ន្ធព្រះអាទិត្យ ហើយ​ដែល​ភាគច្រើន​ស្ថិត​នៅ​ក្នុង​តំបន់ "ខ្សែក្រវាត់អាចម៍ផ្កាយ" តែ​ខ្លះ​ក៏​មាន​គន្លងតារាវិថី​ឆ្លងកាត់​ក្បែរ​ភពផែនដីរបស់យើង
អាចម៍ផ្កាយ​ជាបំណែកថ្ម​ដែល​សេសសល់​ពីការ​កកើត​ប្រព័ន្ធព្រះអាទិត្យ ហើយ​ដែល​ភាគច្រើន​ស្ថិត​នៅ​ក្នុង​តំបន់ "ខ្សែក្រវាត់អាចម៍ផ្កាយ" តែ​ខ្លះ​ក៏​មាន​គន្លងតារាវិថី​ឆ្លងកាត់​ក្បែរ​ភពផែនដីរបស់យើង © JPL/NASA
ដោយ៖ សេង ឌីណា

អាចម៍ផ្កាយដ៏ធំមួយ​ហោះកាត់​ក្បែរភពផែនដី​របស់​យើង នៅ​ថ្ងៃ​ពុធ​២៩មេសា​នេះ ដោយ​មិន​បង្ក​គ្រោះថ្នាក់​ណាមួយ​ដល់​ផែនដី​នោះទេ។ ក៏ប៉ុន្តែ ទោះជា​យ៉ាងណា អ្នក​វិទ្យាសាស្ត្រ​នាំគ្នា​ចាប់អារម្មណ៍​ខ្លាំង​លើ​ហេតុការណ៍​នេះ ម្យ៉ាង​ដោយ​សារ​តែ​ការ​ហោះកាត់​ក្បែរ​នេះ គឺ​ជា​ឱកាស​ឲ្យ​គេ​សិក្សា​កាន់តែលម្អិត​លើ​អាចម៍ផ្កាយ និង​ម្យ៉ាងទៀត វា​ជា​ការ​ដាស់ស្មារតី​ ពី​ហានិភ័យ​ដែល​បំណែក​អវកាស​អស់ទាំងនេះ​អាច​បង្ក​ឡើង​ដល់​មនុស្សជាតិ​យើង។

ផ្សាយពាណិជ្ជកម្ម

អាចម៍ផ្កាយ 1998 OR2 ​​ដែល​ហោះកាត់​ក្បែរ​ភពផែនដី​នៅ​ថ្ងៃ​ពុធ​នេះ​​ ត្រូវបានគេ​រកឃើញ​ជា​ដំបូង កាល​ពី​ឆ្នាំ១៩៩៨ មាន​ទំហំ​ប្រមាណ​ជា ២គីឡូម៉ែត្រ។ វា​ហោះ​មក​ត្រឹម​ចម្ងាយ​ប្រមាណ​ជា​ជិត ៦លាន​គីឡូម៉ែត្រ​ពី​ភពផែនដី ដែល​ជា​ចម្ងាយ​មួយ​ឆ្ងាយ​គួរសម ពោលគឺ​ ឆ្ងាយ​ជាង​ចម្ងាយ​ពី​ផែនដី​ទៅ​ព្រះចន្ទ​រហូត​ដល់ទៅ​ជាង ១៦ដង។ ក៏ប៉ុន្តែ ទោះជា​យ៉ាងណា អាចម៍ផ្កាយ​នេះ​ត្រូវ​បាន​អ្នក​វិទ្យាសាស្ត្រ​ចាត់បញ្ចូល​ទៅ​ក្នុង​ចំណោម​ប្រភេទ​អាចម៍ផ្កាយ ដែល​អាច​បង្ក​គ្រោះថ្នាក់​ដល់​ភពផែនដី​របស់​យើង។

ជាទូទៅ អ្នក​វិទ្យាសាស្ត្រ​កំណត់​កម្រិត​គ្រោះថ្នាក់​នៃ​អាចម៍ផ្កាយ ដោយ​ផ្អែក​លើ​កត្តា​ពីរ គឺ​ទំហំ​ និង​គន្លង​តារាវិថី​របស់​វា។ យោងតាមទីភ្នាក់ងារ​ណាសា អាចម៍ផ្កាយ​ទាំងឡាយណា ដែល​មាន​ទំហំ​ចាប់​ពី​១៤០ម៉ែត្រឡើង​ទៅ ហើយ​ដែល​មាន​គន្លង​តារាវិថី​ហោះកាត់​ក្បែរ​ភពផែនដី នៅ​ក្នុង​ចម្ងាយ​តិចជាង ៧,៥លាន​គីឡូម៉ែត្រ គឺ​ត្រូវ​ចាត់ទុក​ជា​ប្រភេទ​អាចម៍ផ្កាយ ដែល​អាច​បង្ក​គ្រោះថ្នាក់​ដល់​ភពផែនដី​របស់​យើង។​

ជាការពិតណាស់​ថា ៧លាន​គីឡូម៉ែត្រ គឺ​ជា​ចម្ងាយ​មួយ​ឆ្ងាយ​ ដែល​វា​មិនគួរ​នឹង​បង្ក​នូវ​គ្រោះថ្នាក់​ណាមួយ​ដល់​ភពផែនដី​នោះទេ។ ក៏ប៉ុន្តែ គេ​មិន​ត្រូវ​ភ្លេចទេ​ថា អាចម៍ផ្កាយ​ធ្វើ​ដំណើរ​ក្នុង​គន្លង​តារាវិថី​ជុំវិញ​ព្រះអាទិត្យ ហើយ​បើ​សិន​ជា​គន្លង​តារាវិថី​នោះ​វា​ត្រូវ​ឆ្លងកាត់​ជាមួយ​គន្លង​តារាវិថី​ភពផែនដី​របស់​យើង អាចម៍ផ្កាយ​នោះ​មិនមែន​ហោះកាត់​ភពផែនដី​តែមួយលើក​ហើយ​បាត់មុខ​ទៅ​ជា​រៀងរហូត​នោះទេ តែ​វា​​អាច​នឹង​ហោះ​មក​កាត់​ភពផែនដីវិញ​ជា​លក្ខណៈទៀងទាត់។

ជាក់ស្តែង​ អាចម៍ផ្កាយ 1998 OR2 ដែល​ហោះ​កាត់​ក្បែរ​ផែនដី​នៅថ្ងៃ​ពុធ​នេះ មានគន្លង​តារាវិថី​ដែល​នាំ​វា​ឲ្យ​មកហោះក្បែរ​ផែនដី​ជាច្រើនលើកតទៅមុខទៀត ហើយ​នៅ​ឆ្នាំ២០៧៩​វា​នឹង​ហោះ​មក​កាន់តែ​ក្បែរ​ភពផែនដី​របស់​យើង​ជាង​នេះ​ទៅទៀត គឺ​មក​នៅ​ចម្ងាយ​ត្រឹមតែ​ប្រមាណ​ជាជិត ២លានគីឡូម៉ែត្រ​ប៉ុណ្ណោះ។

គ្រោះថ្នាក់​នៃ​ពពួក​អាចម៍ផ្កាយ ដែល​គន្លង​តារាវិថី​របស់​វា​ឆ្លងកាត់​ផែនដី​ក្នុង​ចម្ងាយ​ជិត​បែបនេះ គឺ​នៅត្រង់​ថា ប្រសិនបើ​គ្រាន់តែ​មាន​បាតុភូត​ណាមួយ ឬ​ឥទ្ធិពល​នៃ​កម្លាំង​ទំនាញ​ណាមួយ ដែល​ធ្វើ​ឲ្យ​គន្លង​តារាវិថី​របស់​វា​ប្រែប្រួល​តែ​បន្តិច វា​អាច​នឹង​ហោះកាត់ក្បែរ​ភពផែនដី​កាន់តែ​ជិតទៅៗ ហើយ​ក្នុងរយៈពេល​វែង​ទៅមុខ វា​អាច​នឹង​ហោះបុកភពផែនដី​របស់​យើង។ អាចម៍ផ្កាយ​ដែល​មាន​ទំហំ​ចាប់ពី​១៤០ម៉ែត្រ​ឡើងទៅ បើ​សិន​ជា​វា​ធ្លាក់​មក​លើ​ភពផែនដី​របស់​យើង វា​អាច​នឹង​បង្ក​នូវ​វិនាសកម្ម​ដ៏​ធ្ងន់ធ្ងរ​ដល់​មនុស្ស​ជាតិ​យើង។

គេ​មិន​ត្រូវ​ភ្លេចទេ​ថា អាចម៍ផ្កាយ​ដែល​ធ្លាក់​នៅ​ឆេលីយ៉ាប៊ីនស្ក៍​ កាល​ពី​ឆ្នាំ២០១៣​កន្លងទៅ មាន​ទំហំ​មិនដល់​ ២០ម៉ែត្រផង ក៏ប៉ុន្តែ​បាន​បង្ក​ឲ្យ​មាន​កម្លាំង​ផ្ទុះ​រហូត​ដល់​ទៅ​ប្រមាណ​ជាពី ៤០០ ទៅ ៥០០​គីឡូតោន ខ្លាំង​ជាង​​​កម្លាំងផ្ទុះគ្រាប់បែក​នុយក្លេអ៊ែរ ដែល​អាមេរិក​ទម្លាក់​នៅ​ហ៊ីរ៉ូស្ហ៊ីម៉ា ដល់​ទៅ​ប្រមាណ​ជា ៣០ដងឯណោះ។ ចុះទម្រាំ​អាចម៍ផ្កាយ​ដែលមាន​ទំហំដល់​ទៅ ១៤០ម៉ែត្រ ឬក៏​ធំជាង​នេះ​ទៅទៀត ដូចជា​អាចម៍ផ្កាយ 1998 OR2 ដែល​ហោះកាត់​ក្បែរ​ផែនដី​នៅថ្ងៃ​ពុធនេះ ដែល​មាន​ទំហំ​ដល់​ទៅ ២គីឡូម៉ែត្រ ពោលគឺ ធំជាង​អាចម៍ផ្កាយ​នៅ​ឆេលីយ៉ាប៊ីនស្ក៍​ដល់​ទៅ ១០០ដង តើ​វា​អាច​នឹង​បង្ក​ឲ្យ​មាន​វិនាសកម្ម​ធ្ងន់ធ្ងរ​ប៉ុណ្ណា បើ​សិន​ជា​វា​ធ្លាក់​មក​លើ​ភពផែនដី​របស់​យើង?

នៅ​ក្នុង​ហេតុផល​នេះ​ហើយ​បាន​ជា​ទីភ្នាក់ងារ​ណាសា ដោយ​រួម​សហការ​ជាមួយ​នឹង​អ្នក​វិទ្យាសាស្ត្រ​ផ្សេងទៀត​​ជា​លក្ខណៈអន្តរជាតិ នាំគ្នា​យកចិត្ត​ទុកដាក់​តាមដាន​សង្កេត​មើល​ប្រភេទ​អាចម៍ផ្កាយ​អស់ទាំងនេះ តាមរយៈការ​បង្កើត​គម្រោង​មួយ ដែល​គេ​ឲ្យ​ឈ្មោះ​ថា

“Planetary Defense” ដើម្បី​ស្វែងរក និង​​ឃ្លាំមើល ព្រមទាំង​​កំណត់​គន្លង​តារាវិថី​​នៃ​បណ្តា​អាចម៍ផ្កាយ ដែល​អាច​ហោះ​កាត់​​​ក្បែរ​ភពផែនដី​របស់យើង។ 

គិតមកទល់នឹង​ពេល​បច្ចុប្បន្ន​នេះ អាចម៍ផ្កាយ​ប្រមាណ​ជា​ជិត ២ម៉ឺន ត្រូវ​បាន​គេរកឃើញ និង​ស្ថិត​ក្រោម​ការ​តាមដាន​នៃ​គម្រោង Planetary Defense។ ហើយ​កាលពីខែមេសា​ឆ្នាំ២០១៩​​កន្លងទៅ​​នេះ ទីភ្នាក់ងារ​ណាសា​បាន​រៀបចំ​សន្និសីទ​ដ៏​ធំមួយ ដោយ​មាន​ការ​ចូលរួម​ពី​សំណាក់​អ្នក​វិទ្យាសាស្រ្ត​មក​ពី​ជុំវិញ​ពិភពលោក ដើម្បី​ជជែក​ផ្លាស់ប្តូរ​យោបល់​គ្នា ដោយ​ដាក់​សេណារីយ៉ូមួយ​ថា បើ​សិន​ជា​គេ​រកឃើញ​​មាន​អាចម៍ផ្កាយ​មួយ​ ដែល​មាន​ទំហំ​ធំល្មម​​​អាច​កម្ទេច​ទីក្រុង​ធំ​មួយ​បាន ហើយ​អាចម៍ផ្កាយ​នោះ​នឹង​ត្រូវ​ហោះ​មក​បុកភពផែនដី នៅ​ក្នុង​រយៈពេល ៨ឆ្នាំខាងមុខ។ តើ​គេ​ត្រូវ​ធ្វើ​ដូចម្តេច?

អ្នក​វិទ្យាសាស្រ្ត​ភាគច្រើន​នៅ​ក្នុង​សន្និសីទ​​នោះ បាន​ឯកភាព​គ្នា​ថា ដំណោះស្រាយ​ដែលគេ​មើល​ទៅ​ឃើញ​ថា​មាន​ភាព​ប្រាកដ​និយម​ជាងគេ គឺ​ការ​ប្រើ​យាន​អវកាស ដើម្បី​រុញ​អាចម៍ផ្កាយ​ឲ្យ​ចាកគន្លង​ដើម​បន្តិចម្តងៗ រហូត​អាច​ចៀសផុត​ពី​ការ​ប៉ះទង្គិច​ជាមួយ​នឹង​ផែនដី។ ក៏ប៉ុន្តែ ដើម្បី​អាច​ធ្វើ​បែបនេះ​បាន គេ​ចាំបាច់​ត្រូវ​​​ព្យាករ​ដឹងជាមុន​​ពី​គន្លង​នៃ​អាចម៍ផ្កាយ ហើយ​មិន​មែន​ដឹង​មុន​ត្រឹម​រាប់ខែ​នោះទេ តែត្រូវ​ដឹងមុន​រហូត​ដល់​ទៅ​​រាប់​ឆ្នាំឯណោះ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ