កម្ពុជាអនុម័តសេចក្តីព្រាងច្បាប់ប្រឆាំងការលាងលុយកខ្វក់ ខណៈសហភាពអឺរ៉ុបដាក់ក្នុងបញ្ជីខ្មៅ

យោងតាម​សេចក្តី​ថ្លែង​ហេតុ​ដែល​ផ្សព្វផ្សាយ​ដោយ​ លោក ផៃ ស៊ីផាន ប្រធានអង្គភាពអ្នកនាំពាក្យរដ្ឋាភិបាល កម្ពុជាបានធ្វើ​សេចក្តី​ព្រាង​​ក្របខណ្ឌគតិយុត្តទាក់​ទង​នឹងការសម្អាតប្រាក់ និងហិរញ្ញប្បទានភេរវ​កម្ម​ក្នុងឆ្នាំ២០០៧។ តែក្រុមប្រ​ទេសអាស៊ីប៉ាស៊ី​ហ្វិកស្ដីពីការ​សម្អាតប្រាក់ ដែល​ហៅកាត់ថា APG បានចុះមកវាយ​តម្លៃថានៅ​មានចំណុចខ្វះខាត ទើប​នៅឆ្នាំ២០១១ ក្រុមការងារហិរញ្ញវត្ថុ FATF បានបញ្ចូលកម្ពុជាទៅក្នុងបញ្ជីប្រផេះជាលើកទី១។​ ពេលនោះគេបាន​តម្រូវឲ្យ​កម្ពុជាធ្វើវិសោធនកម្មច្បាប់ស្ដីពីការប្រឆាំងការសម្អា​តប្រាក់និងហិរញ្ញ​ប្បទានភេរវកម្មនេះ​។  ហើយ​កម្ពុជា​បានបំពេញ​បន្ថែមជាច្រើនទៀត ដើម្បីចែង​ពីការបង្កក ការឃាត់ទុក និងការរឹបអូស។ ច្បាប់ស្ដី​ពីវិសោធនកម្មនេះ ត្រូវបាន​ប្រកាសឲ្យប្រើប្រាស់នៅថ្ងៃទី៣ ខែមិថុនា ឆ្នាំ២០១៣ ។ បន្ទាប់ពីបា​នអនុម័តច្បាប់នេះ និងបំពេ​ញការងា​រមួយចំនួនទៀត FATF ក៏បាន​ដកប្រទេសកម្ពុ​ជាចេញពីបញ្ជី​ប្រផេះនៅ​ក្នុងខែកុម្ភៈឆ្នាំ២០១៥។

ប៉ុន្តែ​ដោយសារ FATF ប្ដូរស្ទង់​ដាររបស់ខ្លួននៅឆ្នាំ២០១២ ហើយ​ការវាយតម្លៃ​លើកនេះ គឺប្រើស្ដង់ដារថ្មីនេះ គឺកម្ពុជា​នៅខ្វះខាតមូល​ដ្ឋានគតិយុត្តបន្ថែ​មទៀតជាច្រើន សម្រាប់កា​រងារប្រឆាំង​ការសម្អាតប្រាក់ និងហិរញ្ញ​ប្បទានភេរវកម្ម ក៏ដូចជាហិរញ្ញ​ប្បទានដល់ការរីក​សាយភា​យអាវុធមហា​ប្រល័យ។ ភាពខ្វះចន្លោះនេះ​បានក្លាយជា​មូលហេតុ​ដាក់ប្រទេសកម្ពុ​ជាចូលទៅក្នុ​ងបញ្ជីប្រផេះ ជាលើក​ទីពីរ កាលពីថ្ងៃទី២១ ខែកុម្ភៈ ឆ្នាំ២០១៩។

យ៉ាងណាក៏ដោយ​ នៅ​ឆ្នាំ​២០២០​នេះ គណៈ​កម្មការ​អឺរ៉ុប កាល​ពីសប្តាហ៍មុន បាន​ស្នើ​ដាក់​ប្រទេស​កម្ពុជា ​និង​ប្រទេស​១១​ទៀតទៅ​ក្នុង​«បញ្ជី​ខ្មៅ»នៃ​បណ្ដា​ប្រទេស​ដែល​​ត្រូវ​បង្កើន​ការ​ត្រួតពិនិត្យ​ពីសកម្មភាពនៃ​ការ​លាង​លុយ​កខ្វក់។ តែវិធានការ​ថ្មីនេះ​នឹង​ត្រូវ​ចាប់ផ្ដើម​អនុវត្ត​ចាប់ពី​ខែតុលា​ខាងមុខ ដោយសារ​តែ​ប្រទេសទាំងនោះ​កំពុងជួបបញ្ហាជំងឺកូវីដ១៩៕