កម្ពុជា សង្គម

ពលរដ្ឋរាប់រយនាក់បិទផ្លូវកំណាត់ផ្លូវលេខ៦A ករណីយកដីវត្តធ្វើកន្លែងស្តុកខ្សាច់លក់

ពលរដ្ឋរាប់រយនាក់បិទផ្លូវកំណាត់ផ្លូវលេខ៦A ករណីយកដីវត្តធ្វើកន្លែងស្តុកខ្សាច់លក់
ពលរដ្ឋរាប់រយនាក់បិទផ្លូវកំណាត់ផ្លូវលេខ៦A ករណីយកដីវត្តធ្វើកន្លែងស្តុកខ្សាច់លក់ © សហការី

ពលរដ្ឋ​រាប់រយនាក់នៅ​ព្រឹកនេះ បាននាំគ្នាបិ​ទកំណាត់​ផ្លូវជាតិលេខ៦​Aត្រង់​ចំណុច​មុខវត្តព្រែក​អញ្ចាញ​ក្បែរ​សាលាស្រុក​មុខ​កំពូល។ ជាការតវ៉ាប្រ​ឆាំងនឹងម្ចា​ស់អាជីវកម្ម​លក់ថ្ម និង​ខ្សាច់​ដែល​ក្រុមអ្នកតវ៉ាអះអាងថា ម្ចាស់អាជី​វកម្មមួយនេះ​បានយក​ដីរបស់​វត្ត​ទៅធ្វើជាកន្លែង​រកស៊ីរបស់ខ្លួន ធ្វើប៉ះពាល់​ដល់ប្រជាពលរដ្ឋ​នៅក្បែរនោះ។ ករណីនេះ​អភិបាលខេត្តកណ្តាល​អះអាងថា​នឹងចុះទៅដោះស្រាយ​នៅម៉ោង២​រសៀលនេះ។

ផ្សាយពាណិជ្ជកម្ម

ក្រុម​អ្នកតវ៉ា​ និយាយថា ដំបូងឡើយ​វត្ត​រតនៈបុប្ផារាម ហៅវត្តព្រែកអញ្ចាញ បានជួលទីតាំង​នោះឱ្យទៅ​ម្ចាស់​អាជីវកម្មសម្រាប់ដាក់ស្តុកខ្សាច់និងថ្ម តែក្រោយមក​ម្ចាស់អាជីវកម្មនោះ បែរជា​កាយដីវត្តនោះលក់ទៅវិញ​ ខណៈកុងត្រាជួលក៏បានផុត​កំណត់។ ដោយមិនសុខចិត្ត​ព្រះសង្ឃ និងពុទ្ធបរិស័ទក៏ចេញមកតវ៉ាបិទកំណាត់​ផ្លូវជាតិលេខ​៦Aតែម្ដង​។ តែម្ចាស់អាជីវកម្ម ថ្ម ខ្សាច់នោះ អះអាងថា ខ្លួនមានប័ណ្ណកម្មសិទ្ធិ​លើ​ដីនោះទៅវិញ ខណៈព្រះសង្ឃអះអាងថាដីនោះជាដីរបស់វត្ត។ តែអ្នកតវ៉ាបាន​ដាក់​ការសង្ស័យថា មានការឃុបឃិតគ្នារវាងអាជ្ញាធរជាមួយម្ចាស់អាជីវកម្ម ថ្ម ខ្សាច់ ទើបមានរឿងនេះកើត។

ការបិទកំណាត់ផ្លូវជាតិដ៍សំខាន់មួយជាច្រើនម៉ោងនេះ​បានធ្វើឲ្យកកស្ទះចរាចរណ៍យ៉ាងខ្លាំងនៅលើផ្លូវជាតិលេខ៦A ខណៈក្រុមអាជ្ញាធរហាក់ដូចជាពិបាកធ្វើការសម្របសម្រួល។ សាក្សី និយាយថា ការស្ទះចរាចរណ៍គឺចាប់ពីចំណុចបាក់ខែងរហូតដល់​ស្រុក​មុខកំពូល និងចាប់ពីចំណុចស្រុកមុខកំពូលរហូតដល់រកាកោង។

លោក គង់ សោភ័ណ្ឌ អភិបាល​ខេត្តកណ្តាល​ប្រាប់​វិទ្យុ​បារាំងអន្តរជាតិ RFI​នៅម៉ោងជិត១១ថ្ងៃ​ត្រង់ថា អាជ្ញាធរបានសម្របសម្រួល​ឲ្យមានការបើក​ផ្លូវ​ធ្វើ​ចរាចរណ៍បានឡើងវិញហើយ​ ហើយថា​នៅម៉ោង​២​រសៀល​ក្រុមការងារ​របស់​ខេត្តចុះទៅដោះស្រាយបញ្ចប់បញ្ហា។

អភិបាល​ខេត្តថ្មី​រូបនេះ មិនអាចប្រាប់ពីមូលហេតុនៃទំនាស់រវាងពុទ្ធបរិស័ទនិង​ព្រះសង្ឃ ជាមួយនឹង​ម្ចាស់​អាជីវកម្ម ​ថ្ម ខ្សាច់ ដែលនៅ​ក្បែរ​សាលា​ស្រុក​មុខ​កំពូលនោះបានទេ ដោយគ្រាន់តែហៅការបិទផ្លូវនោះថាជាកំហឹងមហាជន៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI