អានតួអត្ថបទ
កម្ពុជា សង្គម

នាយករដ្ឋមន្ត្រីព្រមានដាក់ទោសធ្ងន់បំផុតនិងបណ្តេញចេញពីបក្សករណីមន្ត្រីយកដីពលរដ្ឋ

លោកនាយករដ្ឋមន្ត្រី ហ៊ុន សែន
លោកនាយករដ្ឋមន្ត្រី ហ៊ុន សែន © FB
ដោយ៖ អ៊ឹង ប៊ុនថន
១៥ នាទី

ប្រមុខ​រដ្ឋាភិបាល​លោក ​ហ៊ុន ​សែន ​នៅ​ថ្ងៃ​សុក្រ​នេះ ​បាន​លើក​ឡើង​ថា ​បញ្ហា​ទំនាស់​ដីធ្លី​ដែល​ជាប់​ពាក់ព័ន្ធ​នឹង​មន្ត្រី​រដ្ឋាភិបាល​គឺ​ត្រូវ​តែ​ជម្រះ ​និង​ត្រូវ​តែ​វះកាត់។ ​លោក​បាន​ព្រមាន​ថា ​ចំពោះ​មន្រ្តី​ខិល​ខូច​ដែល​ឃុប​ឃិត​គ្នា​យក​ដី​រដ្ឋ ​និង​យក​ដី​ប្រជា​ពលរដ្ឋ ​នឹង​ទទួល​ទោស​ធ្ងន់​ធ្ងរ​បំផុត ​ហើយ​ឈាន​ទៅ​បណ្តេញ​ចេញ​ពី​គណបក្ស​តែ​ម្តង។ ​ការ​ព្រ​មាន​បែប​នេះ ​គឺ​ស្រប​ពេល​ដែល​មន្ត្រី​រដ្ឋាភិបាល​មួយចំនួន​ត្រូវ​បាន​ចាប់​ខ្លួន​ជាបន្ត​បន្ទាប់​ក្រោម​​ចំណាត់​ការ​របស់​អង្គភាព​ប្រឆាំងអំពើ​ពុករលួយ។

ផ្សាយពាណិជ្ជកម្ម

«ចំពោះមន្រ្តីខិលខូចដែលឃុបឃិតគ្នាយកដីរដ្ឋ និងយកដីប្រជាពលរដ្ឋ ហើយរិះរកកលល្បិច និងវិធីផ្សេង​ៗធ្វើបាបប្រជាពលរដ្ឋវិញ ដើម្បីខ្លួនបានកាន់កាប់ដីធ្លីស្របច្បាប់ គឺនឹងទទួលទោសដ៏ធ្ងន់ធ្ងរបំផុត ហើយនឹងឈានទៅបណ្តេញចេញពីគណបក្សតែម្តង។ ចំពោះប្លង់រឹងដែលបានធ្វើដោយអំពើឃុបឃិត​ទុច្ចរិត គឺនឹងរំលាយចោលវិញ»។ នេះជាគូសបញ្ជាក់របស់​ប្រមុខ​រដ្ឋាភិបាល លោក ហ៊ុន សែន នៅពេល​​ប្រជុំ​គណៈរដ្ឋមន្ត្រីនៅថ្ងៃទី៣កក្កដា។

ជាការ​កត់​សំគាល់ ការ​ព្រមាន​របស់​នាយករដ្ឋមន្ត្រីនៅពេលនេះ គឺស្របពេល​ដែលអង្គភាព​ប្រឆាំង​អំពើ​ពុករលួយ​បាន​ចាប់​ខ្លួន​មន្ត្រីមួយចំនួនជាបន្តបន្ទាប់រួមមាន៖ លោក ស៊ូ អារ៉ាស្វាត់ អភិបាល​រង​ខេត្ត​បាត់​ដំបង និងឧកញ៉ា សង ថន ដែល​ជាប់​ពាក់ព័ន្ធនឹងទំនាស់ដីធ្លី​​របស់​ពលរដ្ឋប្រមាណ៣០០គ្រួសារនៅស្រុក​គាស់​ក្រឡ​ ខណៈលោក​ ម៉ៅ សុចាន់ ​អភិបាល​ស្រុក​គាស់​ក្រឡ ត្រូវបាន​ដក​តំណែង។

មុនពេល​មានចំណាត់ការ​ទៅលើ​មន្ត្រីដែលជាប់ពាក់​ព័ន្ធ​នឹងដីធ្លីនៅបាត់​ដំបងនោះ ពោលនៅថ្ងៃទី២៦មិថុនា ​ក៏មានការចាប់ខ្លួន លោក​ សេង​ សុវណ្ណារ៉ា​ អតីតអនុរដ្ឋលេខាធិការក្រសួងយុត្តិធម៌​ពាក់ព័ន្ធករណីរំលោភដីសាធារណៈរបស់រដ្ឋរាប់សិបហិកតានៅខេត្តមណ្ឌលគិរី​។

កាលពីខែមីនា ព្រះរាជអាជ្ញារងសាលាដំបូងរាជធានីភ្នំពេញ ក៏បានសម្រេចចោទប្រកាន់អតីតអភិបាលខេត្តឧត្តរមានជ័យ និងជាអនុរដ្ឋលេខាធិការក្រសួងការពារជាតិ លោក ស ថាវី ពីបទផ្តើមគំនិតក្នុងអំពើលួចលក់អចលនវត្ថុដែលមិនមែនជារបស់ខ្លួននៅខណ្ឌ​ព្រែក​ព្នៅ។

ក្រៅពីមន្ត្រីទាំងនេះ ​ឧត្តមសេនីយផ្កាយ៣​ម្នាក់​ទៀត​ ជាអគ្គនាយករង​នៃអគ្គនាយក​ដ្ឋាន​សវនកម្ម​ផ្ទៃក្នុង​ក្រសួង​មហា​ផ្ទៃ លោក សៀន សុវណ្ណា ក៏ត្រូវបាន​បញ្ចប់មុខ​តំណែងកាលពីថ្ងៃទី២កក្កដា ​តែ​មិនបានឃើញបញ្ជាក់ពីកំហុសអ្វីឡើយ។

លើសពីនេះទៀត ក៏នៅមាន ចៅសង្កាត់ និងចៅសង្កាត់រង ត្រពាំងក្រសាំង ខណ្ឌពោធិ៍សែនជ័យ និង​អនុប្រធានភូមិម្នាក់ទៀត ត្រូវបានសាលាដំបូងរាជធានីភ្នំពេញ ចេញដីកាកោះហៅឲ្យចូលខ្លួនទៅបំភ្លឺរឿងទំនាស់ដីធ្លី ជាបន្តបន្ទាប់​នៅក្នុង​ខែកក្កដានេះ។ ក្នុងនោះ លោក ហ៊ត រដ្ឋា ចៅសង្កាត់ត្រពាំងក្រសាំង ត្រូវចូល​ខ្លួនក្នុងនាមជាសាក្សី ខណៈ លោក ​ស៊ឹម ភូន ជាចៅសង្កាត់រង និង​លោក សួន សុខេន ជាអនុប្រធានភូមិក្រាំង ត្រូវ​ចូល​ខ្លួនក្នុងមានជាជនសង្ស័យ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ