អានតួអត្ថបទ
កម្ពុជា សង្គម

រដ្ឋមន្ត្រី​ក្រសួង​កសិកម្ម៖ ដី​របស់​រដ្ឋ​២លាន​ហិកតាត្រូវ​ពលរដ្ឋ​ចូល​កាន់​កាប់

លោក វេង សាខុន ​រដ្ឋ​មន្ត្រី​ក្រសួង​កសិកម្ម ​​រុក្ខា​ប្រមាញ់ ​និង​នេសាទ​។​
លោក វេង សាខុន ​រដ្ឋ​មន្ត្រី​ក្រសួង​កសិកម្ម ​​រុក្ខា​ប្រមាញ់ ​និង​នេសាទ​។​ @RFI
ដោយ៖ អេង គីមហុង
1 នាទី

ជាថ្មីទៀត លោក ហ៊ុន សែន នៅថ្ងៃនេះ បាន​បញ្ជា​ទៅ​ក្រសួង​បរិស្ថាន ដែនដី កសិកម្ម និង​អាជ្ញាធរ​ត្រូវ​ធ្វើការ​ឲ្យបាន​ហ្មត់​ចត់ ចំពោះ​ដំណើរ​ការ​កាត់​ឆ្វៀល​ដី​ជូន​ប្រជាពលរដ្ឋ ដែល​កំពុង​រស់​នៅ​អាស្រ័យ​ផល​ក្នុង​តំបន់​អភិរក្ស តំបន់​សត្វ​ព្រៃ និង​តំបន់​ការ​ពារ​ផ្សេងៗ។ ថ្លែង​ប្រាប់​វិទ្យុ​បារាំង​អន្តរ​ជាតិ នៅ​ថ្ងៃ​អាទិត្យ​នេះ រដ្ឋមន្ត្រី​ក្រសួង​កសិកម្មលោក វេង សាខុន លើក​ឡើង​ថា ដី​របស់​រដ្ឋ​២​លាន​ហិកតា  ត្រូវ​បាន​ពលរដ្ឋ​ចូល​ទៅ​កាន់​កាប់​ដោយ​ចិត្ត​ឯង។  

ផ្សាយពាណិជ្ជកម្ម

លោក វេង សាខុន បាន​គូស​បញ្ជាក់​ទៀត​ថា ចលនា​ពលរដ្ឋ​ចូល​ទៅ​តាំង​ទី​លំនៅ និង​កាន់កាប់​អាស្រ័យ​ផល​ក្នុងតំបន់​អភិរក្ស តំបន់សត្វព្រៃ និង​តំបន់​ការ​ពារ​ផ្សេងៗ​ដោ​យ​ចិត្តឯង កើត​មាន​សឹង​គ្រប់​រាជធានី​ខេត្ត​នៅ​ទូទាំង​ប្រទេស។ ជាក់​ស្ដែង​បច្ចុប្បន្ន​នេះ ក្រសួង​កសិកម្ម​កំពុង​ទប់​ស្កាត់​សកម្មភាពចូល​កាន់​កាប់​ដី​នៅ​តំបន់​ព្រៃ​លិច​ទឹក ស្ថិតក្នុង​ខេត្ត​ជុំវិញ​បឹង​ទន្លេ​សាប​ដូច​ជា ខេត្តកណ្ដាល កំពង់ឆ្នាំងជាដើម ដែល​សកម្មភាព​ពលរដ្ឋ​កើត​មាន​តាម​រយៈ​ការកាប់​សម្អាត​ដី​ព្រៃ​លិច​ទឹក ដើម្បី​តាំង​ទី​លំ​នៅ។

ក្រៅ​តែ​ពី​តំបន់​ទន្លេ​សាប រដ្ឋមន្ត្រី​ក្រសួងកសិកម្ម​សង្កេត​ឃើញ​ថា ចលនា​ចុះ​កាន់​កាប់​ដី​រដ្ឋ​ក៏​កំពុង​តែ​កក្រើក​នៅ​ភាគ​ខាងកើត​ប្រទេស​កម្ពុជា​ផង​ដែរ។ ក្នុងនោះ​ នៅខេត្ត​មណ្ឌលគិរី ពលរដ្ឋ​បាន​ចុះ​កាន់​កាប់​ដី​ដោយ​ខ្លួន​ឯង​នៅ​តំបន់ស្រល់។ តំបន់​ស្រល់​ជា​ទីតាំង​ពី​មួយ​ដែល​ព្រះមហាក្សត្រ​កម្ពុជា ធ្លាប់​យាង​ទៅ​ដាំ​ដើម​ស្រល់កាល​ពី​អតីត​កាល។

ឆ្លើយតប​ទៅ​នឹង​បទ​បញ្ជាម្ដងជាពីរដង​របស់​លោក​នាយករដ្ឋមន្ត្រី ហ៊ុន សែន ក្រសួង​កសិកម្ម​កំពុង​ប្រមូលទិន្នន័យ​ពលរដ្ឋ​កំពុង​រស់​នៅ​អាស្រ័យ​ផល​ជាក់​ស្ដែង និង​ស្វែង​បុគ្គល​នៅ​ពី​ក្រោយ​សកម្មភាព​ពលរដ្ឋ​ដែល​ចុះ​ទៅកាន់​កាប់​ដី​រដ្ឋ។ ក្រៅ​តែ​មូល​ហេតុ​នៃ​ការ​ជម្រុញ​ពី​ក្រោយ​ខ្នង​របស់​បុគ្គល​មាន​អំណាច​ឲ្យ​ពលរដ្ឋ​ចូល​ទៅ​កាន់​កាប់ដី​របស់​រដ្ឋ លោក វេង សាខុន មើល​ឃើញ​ថា កំណើន​ប្រជាជន និង​ការ​ចំណាក​ស្រុក​ពី​ខេត្ត​ទៅ​ខេត្ត​មួយ ក៏ជាផ្នែក​មួយ​បង្ខំ​ឲ្យ​ពលរដ្ឋ​ចុះ​ចាប់​ដីរដ្ឋ សម្រាប់​ការ​រស់​នៅ​បណ្ដោះ​អាសន្ន​ដែរ។

គេ​នៅ​ចាំ​បាន​ថា ក្នុង​ឆ្នាំ​១៩៨៧ រដ្ឋាភិបាលបាន​វាស់​វែង​ដីធ្លី​ជូន​ពលរដ្ឋក្នុង​មួយ​គ្រួសារ​ទទួល​បាន​ដី១​ហិកតា។ តែ​មក​ដល់​ពេល​បច្ចុប្បន្ន​នេះ ប្រមុខរដ្ឋាភិបាល លោក ហ៊ុន សែន បាន​សម្រេច​ផ្ទាល់​មាត់​ថា កាត់​ឆ្វៀល​ដី​ជូនប្រជា​ពលរដ្ឋទៅ​តាម​ទំហំ​រស់​នៅ​ជាក់​ស្តែង ហើយ​រដ្ឋ​នឹង​បន្ថែម​ជូន​ផ្ទៃ​ដី​១០​ភាគរយ ជា​ប្រយោជន៍​រួម​សម្រាប់សហគមន៍​ប្រើ​ប្រាស់ ជា​ជម្រក​សត្វ​គោ​ក្របី​ស៊ី​ស្មៅជាដើម។ ចំពោះ​ពលរដ្ឋ​ដែល​កំពុង​រស់​នៅ​អាស្រ័យ​ផល​ជាក់ស្តែង​ក្នុង​តំបន់​ដី​រដ្ឋ គឺ​មិន​អនុញ្ញាតជា​ដាច់​ខាត ក្នុង​ការ​កាប់​ឆ្ការ​ទន្រ្ទាន​វាត​ទី​យក​ដី​បន្ថែម។  

បើ​តាម​រដ្ឋ​មន្ត្រី​ក្រសួង​កសិកម្ម​ដដែល ដើម្បី​ឲ្យ​ពលរដ្ឋ​ដែល​កំពុង​រស់​នៅ​លើ​ដី​រដ្ឋ​២​លាន​ហិកតា ស្ថិត​ក្នុង​ខេត្តកោះកុង ព្រះវិហារ ឧត្តរមានជ័យ ស្ទឹងត្រែង រតនគិរី មណ្ឌលគិរីជាដើម ទទួល​បាន​បណ្ណ​កម្ម​សិទ្ធ​ដីធ្លី​ឲ្យ​បានរហ័ស ត្រូវ​មាន​កិច្ច​សហការ​ពី​អាជ្ញាធរ​ដែន​ដី។  ហើយ​ចំពោះ​ការ​បែង​ចែក​ដី​ជូន​ប្រជាពលរដ្ឋ គឺ​ក្រសួង​ពាក់ព័ន្ធ និង​អាជ្ញាធរ​ត្រូវ​ធ្វើ​អោយ​បាន​ហ្មត់ចត់​ត្រឹម​ត្រូវ ដោយ​មិន​ត្រូវ​ឆ្លៀត​កេង​ចំណេញ​យក​ចំណែកពី​ការ​បែង​ចែក​ដី​ជូនពលរដ្ឋ​មកជា​របស់​ខ្លួន​ឡើយ បើ​ពុំ​ដូច្នោះ​ទេ​គឺ នឹង​ត្រូវ​ទទួល​ទោស​ជា​កំហិត។

សូមជម្រាបជូនថា បញ្ហា​សិទ្ធិដីធ្លីនេះ ​គឺជាក្តីកង្វល់មួយ​ក្នុងចំណោម​បញ្ហា​ធំៗ​ចំនួន​៥ ​ដែល​សហភាព​អឺរ៉ុប​បាន​ស្នើ​ឱ្យ​រដ្ឋាភិបាល​កម្ពុជា​ដោះស្រាយ ​ដើម្បីរក្សាប្រព័ន្ធអនុគ្រោះពន្ធ (EBA) ។ យ៉ាងណាក៏ដោយ​​ អឺរ៉ុបបាន​វាយ​តម្លៃ​ថា ​បញ្ហាដីធ្លី​ដែល​នៅ​ខ្វះខាតនោះ ​គឺ​ការចុះបញ្ជី​ដីធ្លី ការចេញ​បណ្ណ​កម្មសិទ្ធិដីធ្លី និងខ្វះ​ការពិនិត្យ​មើល​ដោយ​ត្រឹមត្រូវ​ ​ក្នុង​ការដោះ​ស្រាយ​សិទ្ធិ​ដីធ្លី​របស់ពលរដ្ឋ​ជនជាតិ​ភាគតិចជាដើម៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ