ក្រុមមាតាបិតានៃទារកដែលរងគ្រោះ ដាក់លិខិតស្នើរទៅក្រសួងសុខាភិបាលត្រួតពិនិត្យលើគុណភាពម្សៅទឹកដោះគោ Nutrilatt

ម្សៅទឹកដោះគោ Nutrilatt ដែលបានប៉ះពាល់ដល់សុខភាពទារក © សហការី

ក្រុម​មាតា​បិតា​នៃ​ទារក​ដែល​រងគ្រោះ​ដោយ​សារ​ជំងឺ​ស្លេក​ស្លាំង​(ជំងឺកង្វះអាហាររូបត្ថម្ភ)​ កាល​ពី​ដើម​សប្តាហ៍​នេះ ​បាន​ដាក់​លិខិត​មួយ​ច្បាប់​ទៅ​កាន់​ក្រសួង​សុខាភិបាល​ ស្នើ​សុំ​ឱ្យ​ក្រសួង​ធ្វើ​ការ​ត្រួត​ពិនិត្យ​ទៅ​លើ​គុណ​ភាពម្សៅ​ទឹក​ដោះ​គោ ណូទ្រីលេត​(Nutrilatt) ​ដែល​មាតា​បិតា​ទាំង​នេះ​អះ​អាង​ថា ​បាន​បង្ក​ផល​ប៉ះ​ពាល់​ដល់​សុខ​ភាព​ទារក​ក្នុង​រយៈ​ពេល​កន្លង​មក​។ ​នេះបើ​យោង​តាម​លិខិត​ដាក់​ជូន​ លោក​ ម៉ម​ ប៊ុន​ហេង​ រដ្ឋ​មន្រី្ត​ក្រសួង​សុខា​ភិបាល​នៅ​ថ្ងៃ​ទី​៦​ ខែ​កក្កដា​នេះ​។

ក្រុមមាតាបិតានៃទារកដែលរងគ្រោះទាំងនេះ អះអាងថា មានឯកសារគ្រប់គ្រាន់ទាក់ទងទៅនឹងប្រវត្តិសុខភាព និង សេចក្តីពន្យល់ជាលក្ខណៈជីវសាស្រ្ត។  បន្ថែមពីនេះ ការពិភាក្សាលម្អិតជាមួយនឹងវេជ្ជបណ្ឌិតឯកទេសផ្នែកគ្រាប់ឈាមបញ្ជាក់ថា កូនៗពួកគាត់ រងផលប៉ះពាល់ពីម្សៅទឹកដោះគោមួយប្រភេទម៉ាក ណូទ្រីលេត(Nutrilatt) ដែលកំពុងចែកចាយដោយក្រុមហ៊ុន S&TK Trading Co.,LTD។ គិតមកដល់សព្វថ្ងៃនេះ មាតាមួយចំនួនបាននឹងកំពុងតែបន្តបង្ហោះបញ្ហានេះនៅលើបណ្ដាញសង្គមហ្វេសប៊ុកសឹងតែរាល់ថ្ងៃ ដើម្បីចែករំលែកព័ត៌មានដល់មាតាបិតាដទៃទៀតអោយមានការប្រុងប្រយ័ត្ន។

ការលេចឡើងនៅដំណឹងអំពីផលប៉ះពាល់ដោយម្សៅទឹកដោះគោនេះគឺចាប់ផ្តើមតាំងតែពីដើមខែ ឧសភាមកម្លេះ ដែលកាលនោះសមាជិកនៃក្រុមអ្នកម្តាយទាំងនេះ បានទទួលព័ត៌មានយ៉ាងច្បាស់ពីមន្ទីរពេទ្យកុមារជាតិ និង មន្ទីរគន្ធបុប្ផាដែលជាមន្ទីរពេទ្យទទួលព្យាបាលកូនៗរបស់ពួកគាត់ថា បញ្ហាដែលបង្កអោយទារកក្រោម១ឆ្នាំ គេងបញ្ជូលឈាមក្រហម និង ខ្វះជាតិដែកធ្ងន់ធរ គឺបណ្តាលមកពីម្សៅទឹកដោយះគោមិនមានផ្ទុកនូវសារធាតុចិញ្ចឹមគ្រប់គ្រាន់ ដែលធ្វើអោយកូនពួកគាត់មានសភាពស្លេកស្លាំងខ្លាំង ឈាមក្រហមធ្លាក់ដល់កម្រិត២.៥។ ករណីទារកដែលរងគ្រោះពីម្សៅទឹកដោះគោនេះ នៅតែបន្តកើតមានជាហូរហែរ ដែលមាតាបិតាទាំងនេះ មានការព្រួយបារម្ភជាខ្លាំងអំពីផលវិបាកដែលបណ្ដាលមកពីម្សៅទឹកដោះគោនេះ ដែលនឹងអាចជាហេតុផ្ដល់ផលប៉ះពាល់ដល់ទារកផ្សេងៗទៀតនាពេលអនាគត។

លោក ទឹម សុវណ្ណារ៉ា អ្នកគ្រប់គ្រង់ទូទៅរបស់ក្រុមហ៊ុនម្សៅទឹកដោះគោ Nutrilatt បានប្រាប់វិទ្យុបារំាងអន្តរជាតិថា ក្រុមហ៊ុនបានទទួលព័ត៌មានទាក់ទងនឹងការជជែកដេញដោលនៅក្នុងបណ្តាញសង្គមនេះ ហើយក្រុមហ៊ុនក៏បានចាត់វិធានការភ្លាមៗដែរ ដោយបានយកសំណាកម្សៅទឹកដោះគោ ទៅធ្វើការវិភាគ ទាំងនៅកម្ពុជា និងប្រទេសម៉ាឡស៊ី ព្រមទាំងបានដាក់លទ្ធផលវិភាគទាំងអស់ទៅកាន់ក្រសួងសុខាភិបាលរួចរាល់ដែរ។ ក្រុមហ៊ុនសំណូមពរទៅកាន់អ្នកម្តាយដែលអះអាងថារងផលប៉ះពាល់ពីម្សៅទឹកដោះនេះ  សូមរងចាំ ចំណាត់ការពីក្រសួងសុខាភិបាលជាមុនសិន ថាតើផលិតផលនេះគួរតែត្រូវប្រមូលទុកឬ មានចំណាត់ការអ្វីបន្តទៀត។

មកទល់ពេលនេះមិនទាន់មានការឆ្លើយតបយ៉ាងណាទេពីសំណាក់ក្រសួងសុខាភិបាលជុំវិញការស្នើរសុំនេះ។