អានតួអត្ថបទ
កម្ពុជា សេដ្ឋកិច្ច

កម្ពុជាចាយថវិកាជាតិជាង១ពាន់លានដុល្លារ ដើម្បីស្តារសេដ្ឋកិច្ច និងសង្គមដែលប៉ះពាល់ដោយកូវីដ១៩

លោករដ្ឋមន្ត្រីក្រសួងសេដ្ឋកិច្ច កំពុងថ្លែងនៅក្នុងឱកាសវេទិការសាធារណៈស្តីពីច្បាប់ថវិកាជាតិសម្រាប់ឆ្នាំ ២០១៥។ (រូបភាពឯកសារ)
លោករដ្ឋមន្ត្រីក្រសួងសេដ្ឋកិច្ច កំពុងថ្លែងនៅក្នុងឱកាសវេទិការសាធារណៈស្តីពីច្បាប់ថវិកាជាតិសម្រាប់ឆ្នាំ ២០១៥។ (រូបភាពឯកសារ) © RFI
ដោយ៖ វណ្ណ សុគន្ធា
1 នាទី

ក្រសួង​សេដ្ឋកិច្ច ​និង​ហិរញ្ញវត្ថុ​នៅ​ព្រឹក​ថ្ងៃ​ពុធ​នេះ ​បាន​ធ្វើ​សន្និ​សីទ​សារ​ព័ត៌មាន​ស្តី​ពី​វិធាន​ការ​របស់​រាជ​រដ្ឋា​ភិបាល​ដែល​បាន​ដាក់​ចេញ​កន្លង​មក​ក្នុង​ការ​ឆ្លើយ​តប​ទៅ​នឹង​វិបត្តិ​កូវីដ​១៩។ ​មន្រ្តី​ជាន់​ខ្ពស់​ក្រសួង​សេដ្ឋកិច្ច​បាន​អះ​អាង​ថា ​វិធាន​ការ​ទាំង​អស់​នេះ​ បាន​ធ្វើ​ឱ្យ​រដ្ឋា​ភិបាល​កម្ពុជា​អាច​គ្រប់​គ្រង​បាន​លើ​បញ្ហា​រីក​រាល​ដាល​នៃ​ជំងឺ​កូវីដ​១៩ ​បញ្ហា​សេដ្ឋកិច្ច​ និង​បញ្ហា​សង្គម​។ ​ដើម្បី​គ្រប់​គ្រប់​បាន​លើ​បញ្ហា​ទាំង​នេះ ​រដ្ឋា​ភិបាល​កម្ពុជា​បាន​ចំណាយ​ថវិកា​ជាតិ​ជាង​១​ពាន់​ដុល្លារ​អាមេរិក​។

ផ្សាយពាណិជ្ជកម្ម

លោកវង្សី វិស្សុត រដ្ឋលេខាធិការប្រចាំការនៃក្រសួងសេដ្ឋកិច្ច និងហិរញ្ញវត្ថុបានអះអាងថា រដ្ឋាភិបាលកម្ពុជាបានបញ្ចេ​ញថវិកាជាតិ១.១៦៤លានដុល្លារអាមេរិក ដើម្បីប្រយុទ្ធប្រឆាំង ស្តារសេដ្ឋកិច្ច ​និងសង្គមដែលរងការប៉ះពាល់ដោយជំងឺកូវីដ១៩។ ក្នុងនោះ ថវិកា៥៦៤លានដុល្លារអាមេរិក គឺជាថវិកាចំណាយអន្តរាគមន៍ ខណៈថវិកាចំនួន៦០០លានដុល្លារអាមេរិកទៀតជាចំណាយសង្គ្រោះការធ្វើជំនួញតាមរយៈការផ្តល់ជាឥណទាន ។ បើតាមលោកវង្សី វិស្សុត មកដល់ពេលនេះ ថវិកាចំណាយអន្តរាគមន៍ដែលបានប្រើប្រាស់ គឺប្រយុទ្ធប្រឆាំងជំងឺកូវីដ១៩បានចាយអស់ប្រមាណ១០លានដុល្លារ ផ្នែកបណ្តុះបណ្តាលជំនាញចំណាយអស់២៥លានដុល្លារ ផ្នែកសាច់ប្រាក់ពលកម្មបានចំណាយ១០០លានដុល្លារ និង ការដោះស្រាយសម្រាប់ប្រជាពលរដ្ឋបានចំណាយ១២៧លានដុល្លារ។

ចំណែក ចំណាយជាឥណទានសម្រាប់វិស័យឯកជនវិញ គឺរដ្ឋាភិបាលកម្ពុជាបានបញ្ចេញអស់១០០លានដុល្លាររួចហើយ។ លោកវង្សី វិស្សុត បានគូសបញ្ជាក់ថា ថវិកាទាំងអស់នេះ គឺបានមកពីការព្យាយាមទប់ចំណូលនៅក្នុងឆ្នាំនេះកុំឱ្យមានការធ្លាក់ចុះខ្លាំង ការវិភាជទៅលើការចំណាយមានន័យថា យកថវិកាពីការចំណាយដែលមិនសូវចាំបាច់មកចំណា​យនៅកន្លែងដែលចាំបាច់។ មួយវិញទៀត គឺបានមកពីថវិកាសន្សំរបស់រដ្ឋ។ ថវិកាសន្សំរបស់រដ្ឋដែលទទួលបានប្រមា​ណ៨០០លានដុល្លារក្នុងមួយឆ្នាំ។

សូមបញ្ជាក់ថា កាលពីដើមឆ្នាំ២០២០នេះ រដ្ឋាភិបាលកម្ពុជាបានប្រកាសថា គ្រោងចំណាយថវិកាចន្លោះពី៨០០ទៅ២ពាន់លានដុល្លារអាមេរិក ដើម្បីសង្រ្គោះផ្នែកសេដ្ឋកិច្ចដែលរងផលប៉ះពាល់ដោយសារតែការរីករាលដាលនៃជំងឺកូវីដ-១៩​។ រីឯក្រសួងសេដ្ឋកិច្ចកម្ពុជាក៏បានព្យាករណ៍រួចហើយថា នៅឆ្នាំនេះ សេដ្ឋកិច្ចកម្ពុជានឹងធ្លាក់ចុះក្រោម១.៩%(-១.៩%) ប៉ុន្តែធនាគារពិភពលោកវិញព្យាករណ៍ថា អាចធ្លាក់ក្រោម២.៩%(-២.៩%) ខណៈធនាគារអភិវឌ្ឍន៍អាស៊ីADBថា សេដ្ឋកិច្ចកម្ពុជាអាចធ្លាក់ចុះក្រោម២.៣%(-២.៣%)។ ក៏ប៉ុន្តែលោកវង្ស៊ី វិស្សុតវិញ បានលើកឡើងបន្ថែមថា សេដ្ឋកិច្ចកម្ពុជាអាចធ្លាក់ចុះដល់ក្រោម៥%(-៥%)ឯណោះ បើសិនជំងឺកូវីដ១៩នៅបន្តអូសបន្លាយ និងមានស្ថានភាពធ្ងន់ធ្ងរខ្លាំង។

តែទោះជាបែបនេះក្តី មន្រ្តីជាន់ខ្ពស់រូបនេះបានអះអាងថា នៅពេលនេះ កម្ពុជាអាចគ្រប់គ្រងបានទាំងស្ថានភាពរីករាលនៃជំងឺកូវីដ១៩ ផលប៉ះពាល់មកលើផ្នែកសេដ្ឋកិច្ច និងសង្គម។ ការអាចគ្រប់គ្រងបាននេះ គឺដោយសារតែកត្តាដឹកនាំល្អរបស់លោកនាយករដ្ឋមន្រ្តីហ៊ុន សែនក្នុងការប្រយុទ្ធប្រឆាំងនឹងជំងឺនេះ ការដាក់ចេញគោលនយោបាយ និងវិធានការទាន់ពេលវេលាប្រកបដោយភាពហ្មត់ចត់ ការចូលរួមរបស់ប្រជាពលរដ្ឋកម្ពុជា និង ដោយសារតែកម្ពុជាមានមូលដ្ឋានសេដ្ឋកិច្ចរឹងមាំតាំងពីមុនការមកដល់នៃជំងឺកូវីដ១៩។ នេះបើតាមលោកវង្ស៊ី វិស្សុត៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ