អានតួអត្ថបទ

ក្រសួងសង្គមកិច្ចនឹងចុះវាយតម្លៃនៅតំបន់មួយចំនួនទាក់ទងតម្លាភាពក្នុងការចែកប្រាក់ឧបត្ថម្ភ

ផ្ទះរបស់ពលរដ្ឋក្រីក្រនៅកម្ពុជា
ផ្ទះរបស់ពលរដ្ឋក្រីក្រនៅកម្ពុជា © Facebook
ដោយ៖ អេង គីមហុង
1 នាទី

ដំណើរ​ការ​ចែក​ប្រាក់​ឧបត្ថម្ភ​របស់​រដ្ឋ​ជុំ​ទី១​ជិត​បិទ​បញ្ចប់​ហើយ ​បន្ទាប់​ពី​ប្រាក់​របស់​រដ្ឋ​ចំនួន​៩១​ពាន់​លានបាន​ទៅ​ដល់​ដៃ​ពលរដ្ឋ​៨៧​ភាគ​រយ ស្មើ​នឹង​៥១​ពាន់​គ្រួសារ ក្នុង​ចំណោម​គ្រួសារ​ក្រីក្រ​សរុប​ជាង​៥៦​ម៉ឺនគ្រួសារ។ ខណៈ​ដែល​ជុំ​ទី​១​ជិត​បញ្ចប់ ជាមួយ​នឹង​រលក​រិះគន់​អំពី​តម្លាភាព  អ្នកនាំ​ពាក្យ​ក្រសួង​សង្គម​កិច្ចបាន​ប្រាប់​វិទ្យុ​បារាំង​អន្តរជាតិ​នៅ​ថ្ងៃ​សៅរ៍​នេះ​ថា នឹង​មាន​ការ​ចុះ​វាយ​តម្លៃ​ឡើង​វិញ ដើម្បី​ជា​បទ​ពិសោធន៍សម្រាប់​ដំណើរ​ការ​ចែក​ប្រាក់​ឧបត្ថម្ភ​ជុំ​ទី​២ នៅ​ថ្ងៃ​ទី​២៥​កក្កដា។

ផ្សាយពាណិជ្ជកម្ម

ការ​វាយ​តម្លៃ​នឹង​ផ្ដើម​ចេញ​ពី​ចម្ងល់​ដែល​ថា ហេតុ​អ្វី​អ្នក​មាន​ជីវភាព​ធូរធារ​ទទួល​បាន​ប្រាក់​ឧបត្ថម្ភ​ពីរដ្ឋ ខណៈ​ពលរដ្ឋ​ក្រីក្រ​មិន​ទទួល​បាន​ប្រាក់​ឧបត្ថម្ភ​ពីរដ្ឋ តាមរយៈ​អាជ្ញាធរ ភូមិ ឃុំ នៅ​ថ្នាក់​មូលដ្ឋាន​ទៅ​វិញ។ចំពោះ​អ្នក​មាន​ជីវភាព​ធូរធា​ តែ​ទទួល​បាន​ប្រាក់​ឧបត្ថម្ភ​ពីរដ្ឋ នៅ​ពេល​នេះ​មិនមែន​ជា​រឿង​ចៃ​ដន្យ​ឡើយគឺ​ពួក​គេ​ចុះ​ឈ្មោះ​ជា​ជន​ក្រីក្រ​ចូល​ក្នុង​កម្មវិធី​ក្រីក្រ នា​ពេល​អតីកាល តែ​ទើប​ទទួល​បាន​ប្រយោជន៍​នៅពេល​បច្ចុប្បន្ន​នេះ ជួន​ចំពេល​ពួក​គេ​មាន​ជីវភាព​ធូរធា​ស្រាប់។

ចំណែក​ពលរដ្ឋ​ក្រីក្រ​ដែល​មិន​ទាន់​ទទួល​បាន​ប្រាក់​ឧបត្ថម្ភ​នៅ​ជុំ​ទី១​នេះ ពួក​គេ​អាច​ទៅ​ចុះ​ឈ្មោះ​ចូលក្នុង​កម្មវិធី​ក្រីក្រ ជាមួយ​អាជ្ញាធរ​មូលដ្ឋាន ដែល​ខ្លួន​កំពុង​រស់​នៅ ហើយ​មន្ត្រី​ជំនាញ​នឹង​ចុះ​ទៅ​វាយ​តម្លៃដោយ​ពិនិត្យ​មើល​លទ្ធភាព​ជាក់​ស្ដែង​ថា ពួក​គេ​ក្រីក្រ​ក្នុង​កម្រិត​ទី​ប៉ុន្មាន ទើប​ទទួល​បាន​ប្រាក់​ឧបត្ថម្ភ។ នេះ​ជា​ការ​ជម្រុញ​របស់ លោកតូច ចាន់នី អ្នកនាំ​ពាក្យ​ក្រសួង​សង្គមកិច្ច​នៅ​ថ្ងៃ​សៅរ៍​នេះ។ ប៉ុន្តែ​យ៉ាង​ក៏ដោយ​ការ​វាយ​តម្លៃ​នេះ ធ្វើ​ឡើង​តែ​តំបន់​មួយ​ចំនួន​ដែល​មាន​បញ្ហា​ប៉ុណ្ណោះ ពោល​គឺ​មិន​ធ្វើ​ឡើង​ក្នុង​ក្របខណ្ឌ​ទូទាំង​ប្រទេស​ឡើយ។

ដំណាល​គ្នា​នេះ ក្រសួង​មហា​ផ្ទៃ​នៅ​ថ្ងៃ​ទី​១០​កក្កដា​ម្សិលមិញ ក៏​បាន​ណែនាំ​ដល់​អភិបាល​រាជធានី​ខេត្ត ធ្វើ​យ៉ាង​ណា​ធានា​តម្លាភាព និង​សុចរិត​ភាព ក្នុង​ការ​អនុវត្ត​កម្មវិធី​ឧបត្ថម្ភ​សាច់​ប្រាក់ បន្ទាប់​ពី​មាន​ភាពមិន​ប្រក្រតី​មួយ​ចំនួន​បាន​កើត​មាន​ឡើង​ដូច​ជា ការ​យក​កម្រៃ​សេវា​ពី​ប្រជាពលរដ្ឋ ដែល​បាន​មក​ផ្ទៀងផ្ទាត់​ឈ្មោះ​ទទួល​ប្រាក់​ឧបត្ថម្ភ និង​ការ​ឃុបឃិត​បន្លំ​ដក​យក​ថវិកា​ប្រជាពលរដ្ឋ​អ្នក​ទទួល​ផល។ តាមរយៈ​សកម្មភាពនេះ​លោក ស ខេង ប្រាប់​ឲ្យ​អភិបាល​រាជធានីខេត្ត ចាត់​វិធាន​ការ ឱ្យ​បាន​ម៉ឺងម៉ាត់​ចំពោះមន្ត្រី​ឃុំ សង្កាត់​ណា​ដែល​បាន​អនុវត្ត​មិន​ប្រក្រតី​ណា​មួយ ក្នុង​កម្មវិធី​ឧបត្ថម្ភ​សាច់​ប្រាក់​នេះ។

សូម​ជម្រាបជូនថា រដ្ឋាភិបាលកម្ពុជា នឹង​ចំណាយ​ទឹក​ប្រាក់​ឧបត្ថម្ភ​ចំនួន​២៥​លាន​ដុល្លារ​ក្នុង​មួយ​ខែ ដើម្បី​បើក​ជូន​ប្រជាពលរដ្ឋ​ក្រីក្រ និង​ងាយ​រង​គ្រោះ​ដោយ​សារ​ជំងឺ​កូវីដ​១៩។ ដំណើរ​ការ​បើក​ប្រាក់​ឧបតម្ភ​ពី​រដ្ឋ​សម្រាប់​ជុំ​ទី១ នឹង​បិទ​បញ្ចប់​នៅ​ថ្ងៃ​ទី​២៤​ខែ​កក្កដា​នេះ ដោយ​នៅ​សល់​ពលរដ្ឋ​៦​ម៉ឺន​គ្រួសារ​ទៀត នៅ​មិន​ទាន់​មក​ទទួល​ប្រាក់​ឧបត្ថម្ភ ក្នុង​ចំណោម​ពលរដ្ឋ​ក្រីក្រ​ចំនួន​ជាង​៥៦​ម៉ឺន​គ្រួសារ។ ចំណែក​ជុំ​ទី​២វិញ នឹង​ដំណើរ​ការ​ចាប់​ពី​ថ្ងៃ​ទី​២៥​ខែ​កក្កដា ដល់​ថ្ងៃ​ទី​២៩​ខែ​សីហា តាមរ​រយៈ​ធនាគារ​ឯកទេ​ស​វីង៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ