អានតួអត្ថបទ
កម្ពុជា-កូរ៉ូណាវីរុស

អ្នកជំនាញព្រមានពីហានិភ័យខ្ពស់នៃការចម្លងកូវីដ១៩ទៅសហគមន៍ ខណៈរកឃើញឆ្លងថ្មីជាបន្តបន្ទាប់

កូរ៉ូណាវីរុសដែលត្រូវបានឆ្លុះដោយមីក្រូទស្សន៍
កូរ៉ូណាវីរុសដែលត្រូវបានឆ្លុះដោយមីក្រូទស្សន៍ © Internet
ដោយ៖ អ៊ឹង ប៊ុនថន
1 នាទី

អ្នក​ជំនាញ​សុខា​ភិបាល​នៃ​រាជបណ្ឌិតសភា​កម្ពុជា ​បាន​ព្រមាន​ពី​ហានិភ័យ​ខ្ពស់​នៃ​ការ​ឆ្លង​រាល​ដាល​ជំងឺ​កូវីដ​១៩​ទៅ​ក្នុង​សហគមន៍ ​នៅគ្រា​ដែល​កម្ពុជា​បាន​រក​ឃើញ​មាន​ករណី​ឆ្លង​ថ្មី​២៤​នាក់​ទៀត​ តែ​ក្នុង​រយៈ​ពេល​២​ថ្ងៃ​ជាប់​គ្នា។ ​សម្រាប់​ប្រមុខ​រដ្ឋាភិបាល​វិញ​ក៏​បារម្ភ​ផង​ដែរ​ពី​ការ​កើន​ឡើង​នៃ​ជំងឺ​នេះ​នៅ​កម្ពុជា ​ខណៈពលរដ្ឋ​មួយ​ចំនួន​ហាក់​ដូចជា​លែង​ភ័យ​ខ្លាច ​និង​មិន​សូវ​ការពារ​ខ្លួន។​

ផ្សាយពាណិជ្ជកម្ម

លោក​វេជ្ជបណ្ឌិត នុត សម្បត្តិ ប្រធាន​វិទ្យា​ស្ថាន​វេជ្ជសាស្ត្រ ជីវសាស្ត្រ និង​កសិកម្ម​នៃ​​រាជបណ្ឌិត​សភា​កម្ពុជា​បាន​ថ្លែងនៅថ្ងៃទី១៤​កក្កដា​ថា ការបន្តនាំចូលជំងឺ​កូវីដ១៩​ពីក្រៅប្រទេសនេះគឺជាហានិភ័យ​ខ្ពស់​បំផុតសម្រាប់​កម្ពុជា​ដែល​កំពុង​ស្ថិត​ក្នុង​គំនូសក្រហមប្រឈមមុខ​ការចម្លង​ទៅ​ក្នុង​សហគមន៍។

ចំណែក​ប្រមុខ​រដ្ឋាភិបាលនៅថ្ងៃនេះដែរ ​នៅក្នុង​ពិធីសំណេះសំណាលជាមួយ​ក្រុម​អ្នក​ជំនាញកសិកម្ម​​នៅខេត្ត​ព្រៃវែង លោកសំដែងការព្រួយ​បារម្ភ​ពីការបន្ត​ឆ្លង​រាលដាល​កាន់​តែ​ខ្លាំង​នៃជំងឺ​កូវីដ១៩​នៅកម្ពុជា ខណៈលោក ហ៊ុន សែន កត់សំគាល់ថា ពលរដ្ឋហាក់ដូចជាឈប់​ភ័យ​ខ្លាចពីការ​ឆ្លងជំងឺកូវីដ១៩នេះ ដែល​ផ្ទុយពីពេលដែលកើតមានដំបូងៗ។ បើតាមប្រមុខ​រដ្ឋាភិបាល​កម្ពុជា ជំងឺ​កូវីដ​១៩នៅកម្ពុជា គឺ១០០%​ជាការនាំចូលពីក្រៅប្រទេស។ ជាមួយ​នឹង​ការ​បារម្ភ​ពីការ​ឆ្លង​ជំងឺ​កូវីដ១៩ ទៅ​ក្នុង​សហគមន៍ លោកនាយករដ្ឋមន្ត្រី ហ៊ុន សែន បានជំរុញឲ្យ«ពាក់ម៉ាសនៅពេលចាំបាច់» ខណៈសាលារៀន​ និង​អាជីវកម្ម​មួយចំនួន​ត្រូវ​បើក​ឡើង​វិញនៅពេល​ខាងមុខ។

ការ​បារម្ភនេះគឺដោយសារតែកម្ពុជា​បាន​រក​ឃើញ​មានករណី​ឆ្លង​ថ្មី​២៤​នាក់​ទៀត តែក្នុង​រយៈពេល​២​ថ្ងៃជាប់គ្នា។ គឺនៅថ្ងៃ១១កក្កដារកឃើញឆ្លង១៥នាក់ ហើយនៅថ្ងៃ១៣កក្កដារកឃើញឆ្លង៩នាក់ទៀត ជាករណីនាំចូលដូចគ្នាពីប្រទេសអារ៉ាប់ប៊ីសាអូឌីត ខណៈនៅថ្ងៃ២៦មិថុនា កម្ពុជាបានរកឃើញឆ្លង៩នាក់ជាអ្នកដំណើរមកពីប្រទេសឥណ្ឌូនេស៊ី។ ពួកគេគឺភាគច្រើន​មានទីលំនៅក្នុង​ខេត្ត​ត្បូង​ឃ្មុំ និង​ក្នុង​សង្កាត់​ច្រាំង​ចម្រេះ រាជធានីភ្នំពេញ ហើយនៅសល់៧០នាក់ទៀតកំពុងដាក់នៅដាច់ដោយឡែកក្រោម​ការ​សង្ស័យ។

សូម​បញ្ជាក់​ថា គិត​ត្រឹម​ថ្ងៃទី១៤​កក្កដា​ឆ្នាំ​២០២០ កម្ពុជា​មាន​អ្នក​ឆ្លង​ជំងឺ​កូវីដ១៩​កើន​ឡើង​​ដល់​១៦៥​នាក់​ហើយ តែ​ព្យាបាល​ជា​សះ​ស្បើយ​បាន​ចំនួន​១៣៣​នាក់​៕​

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ