អង្គការក្នុងស្រុកទាមទារឲ្យផ្អាកគម្រោងអភិវឌ្ឍនានាដែលកំពុងគំរាមកំហែងដល់ការជន់លិចក្រុងភ្នំពេញ

របាយការណ៍ស្រាវជ្រាវចេញផ្សាយថ្ងៃទី២៧ ខែកក្កដានេះ ក្រោមចំណងជើងថា ការបាត់បង់បឹងទំពុន៖ ការវាយ តម្លៃហេតុ ប៉ះពាល់សង្គម និងសិទ្ធិមនុស្សពីការបំផ្លិចបំផ្លាញតំបន់បឹងទំពុន ឬជើងឯក បានរកឃើញថាប្រជាជនកម្ពុជារាប់លាននាក់ទំនងជានឹងរងផលប៉ះពាល់ធ្ងន់ធ្ងរពីការលុបបឹងទំពុន ឬបឹង​ជើង​ឯក ដោយ ក្រុមហ៊ុន អាយ អិន ជី ហូលឌីង (ING Holdings) និងសាជីវកម្មឯកជនផ្សេងៗទៀត រួមមានក្រុមហ៊ុន ជីបម៉ុង អ៊ីអនម៉ល អ័រគីដេវីឡា និងបុរីប៉េងហួត។ល។

អង្គការសម្ព័ន្ធខ្មែរជំរឿននិងការពារសិទ្ធិមនុស្សលីកាដូ (LICADHO) បណ្តាញយុវជនកម្ពុជា (CYN) អង្គការសមធម៌កម្ពុជា (EC) និងអង្គការសមាគមធាងត្នោត (STT) បានស្ទង់មតិប្រជាពលរដ្ឋចំនួន ៤៦៩ គ្រួសារ ដែលកំពុងរស់នៅ ឬប្រើប្រាស់តំបន់បឹងទំពុន ឬជើងឯក ។ ជាលទ្ធផលប្រជាសហគមន៍និយាយ «នឹងប៉ះពាល់ដល់ប្រជាជនក្រីក្រដែលដាំបន្លែ និងនេ​សាទត្រីនៅក្នុងតំបន់បឹងនេះ ដោយសារតែយើងពឹងផ្អែកលើបឹងសម្រាប់ការរស់នៅប្រចាំថ្ងៃរបស់យើង»។

ក្នុង​របាយការណ៍នេះបានព្រមានថា «បើគ្មានតំបន់បឹងទាំងនេះទេ ប្រជាជនជាងមួយលាននាក់នៅក្នុងរាជធានីភ្នំពេញនឹងប្រឈមការ​កើន​ឡើង​នៃទឹកជំនន់។ សម្រាប់សហគមន៍នៅខ្សែទឹកខាងក្រោម​ បើការអភិវឌ្ឍរបស់ឯកជនដែលនៅតែ​បន្ត ​នឹងបណ្តាលឱ្យបាត់បង់នូវមុខរបរចិញ្ចឹមជីវិត និងមនុស្សជាងមួយពាន់គ្រួសារត្រូវបានបង្ខំឱ្យចាកចេញ​ពី​លំនៅ​ឋាន។

លោក មេត មាសភក្តី អ្នកនាំពាក្យសាលារាជធានីភ្នំពេញ អះអាងថាលោកមិន​ទាន់បាន​ឃើញ​របាយការណ៍​នេះទេ​តែលោកគូសបញ្ជាក់ជារួមថា រាល់​គម្រោង​អភិវឌ្ឍនានា​គឺត្រូវបាន​សិក្សា​ពីផល​ប៉ះពាល់​យ៉ាង​ល្អិត​ល្អន់ ដោយ​ផ្អែក​លើ​ផែនការមេដែល​គ្រោង​រហូត​ដល់​ឆ្នាំ​២០៣៥។

ផ្ទៃបឹងទំពុនដែលធ្លាប់ជា​ទ្រព្យសម្បត្តិសាធារណៈគឺមានទំហំយ៉ាងហោច​ណាស់១.៥០០ហិក​តា     ​​​ប៉ុន្តែ​ឥឡូវនេះគ្រោងកាត់មកនៅត្រឹម១០៧ ហិកតាតែប៉ុណ្ណោះ។ នេះបើតាមអនុក្រឹត្យរបស់រដ្ឋាភិបាលនៅចន្លោះ ឆ្នាំ២០១៧ និងឆ្នាំ២០១៩។

ទីភ្នាក់ងារ​សហ​ប្រតិបត្តិការ​អន្តរជាតិជប៉ុន (JICA) គ្រោងបង្កើតរោងចក្រប្រព្រឹត្តកម្មទឹកកខ្វក់ដែលមានតម្លៃខ្ពស់ ដែលអាចធ្វើឲ្យកម្រិតទឹកកខ្វក់ដែលកំពុងហូរចូលក្នុងតំបន់​បឹងទំពុន ឬជើងឯកនេះ នៅសល់តិចជាង២ភាគរយ៕​