កម្ពុជា កូរ៉ូណាវីរុស

កម្ពុជារឹតបន្តឹងការចេញចូលតាមព្រំដែន​ជា​មួយ​វៀតណាម ខណៈ​ជំងឺ​កូវីដ១៩​កំពុង​កើនឡើង

ប្រជាជននៅព្រលានយន្តហោះភ្នំពេញ កំពុងពាក់សម្លៀកបំពាក់ការពារកូវីដ១៩
ប្រជាជននៅព្រលានយន្តហោះភ្នំពេញ កំពុងពាក់សម្លៀកបំពាក់ការពារកូវីដ១៩ REUTERS - STRINGER

រដ្ឋាភិបាល​កម្ពុជា​តាមរយៈ​ក្រសួង​មហា​ផ្ទៃ​កាលពី​ម្សិលមិញ​ បានប្រាប់​ទៅ​អភិបាល​ខេត្ត​ជាប់​ព្រំដែន​ជាមួយ​វៀតណាមទាំងអស់​ឲ្យ​ពង្រឹង​ការ​គ្រប់​គ្រង​ និង​ការ​ត្រួត​ពិនិត្យ​ ការ​ចេញ​ចូល​ឆ្លង​កាត់​ព្រំដែន​ ដើម្បី​បង្ការ ទប់​ស្កាត់​ ការ​ឆ្លង​រាល​ដាល​ជំងឺ កូវីដ១៩ នៅកម្ពុជា។ វិធានការ​នេះ​ត្រូវ​បានគេមើល​ឃើញថា ធ្វើ​ឡើង​ស្របពេល​ដែល​ជំងឺកូវីដ១៩​នៅ​ប្រទេស​វៀតណាមបាន​សម្លាប់​មនុស្សយ៉ាងតិច២​នាក់ និង​ចំនួនអ្នក​ឆ្លងថ្មីមានការ​កើន ទាំងនៅវៀតណាម និង​នៅកម្ពុជា។

ផ្សាយពាណិជ្ជកម្ម

 ការ​ដែល​កម្ពុជា​ប្រកាស​រឹត​បន្តឹង​ការ​ចេញ​ចូល​តាម​ព្រំដែន​ជាមួយ​ប្រទេស​វៀតណាម​នៅពេល​នេះ​គឺ​ធ្វើ​ឡើង​ដូចគ្នា​នឹង​វិធានការ​របស់​អាជ្ញាធរ​វៀតណាម​ដែរ។ វៀតណាម​ដែល​បាន​និង​កំពុង​ចាត់​វិធានការ​បិទ​ការ​ចេញ​ចូល​នៅតាម​តំបន់​ដែល​មាន​ការ​ឆ្លង​រាល​ដាលជំងឺ​កូវីដ១៩​។​ នេះបើតាម​លិខិត​របស់​ក្រសួង​មហាផ្ទៃកម្ពុជា​ជម្រាបជូន​អភិបាល​ខេត្ត​នៅជាប់​ព្រំដែន​កម្ពុជា-វៀតណាម។

ក្នុង​ខ្លឹមសារលិខិតដដែលនេះ រដ្ឋមន្ត្រី​ក្រសួង​មហាផ្ទៃ​បានប្រាប់ទៅ​អាជ្ញាធរ​ជាប់ព្រំដែន​ឲ្យ​យក​ចិត្តទុក​ដាក់​ត្រួត​ពិនិត្យ​មធ្យោបាយ​ដឹក​ជញ្ជូន​ និង​អ្នក​ដំណើរ​ដែល​ដឹក​ទំនិញចេញ​ចូល​ឆ្លង​កាត់​ព្រំដែន​ជាមួយ​វៀតណាម ស្របតាម​វិធានចត្តាឡីស័ក្ត​របស់​ក្រសួង​សុខាភិបាល​ឲ្យបាន​ហ្មត់​ចត់​បំផុត។ លើសពីនេះក៏ត្រូវ​ចាត់​វិធានការ​ឲ្យ​បាន​តឹង​រឹង​ដើម្បី​ទប់​ស្កាត់​កុំឲ្យ​មានការ​លួច​ឆ្លង​ដែន​ខុស​ច្បាប់ និង​បន្ត​អប់រំ​ពលរដ្ឋនៅតាមមូលដ្ឋាន​របស់​ខ្លួន​ឲ្យ​បន្ត​ប្រុង​ប្រយ័ត្ន​ពីការ​ឆ្លងជំងឺកូវីដ១៩​។

ជាការ​កត់សំគាល់ វិធានការ​នេះ​ត្រូវ​បានគេមើល​ឃើញថា ធ្វើ​ឡើងនៅគ្រា​ដែល​ជំងឺកូវីដ១៩​នៅ​ប្រទេស​វៀតណាមបាន​សម្លាប់​មនុស្សយ៉ាងតិច២​នាក់ និង​ចំនួនអ្នក​ឆ្លងថ្មីមានការ​កើន ទាំងនៅវៀតណាម និង​នៅកម្ពុជា។ នៅកម្ពុជា​ជំងឺកូវីដ១៩​​នេះ​ត្រូវ​បាន​រក​ឃើញថា មានករណីឆ្លង​ថ្មី​ចំនួន​៥​នាក់​ទៀត​នៅថ្ងៃទី៣១​កក្កដា ដែលធ្វើ​ចំនួន​អ្នក​ឆ្លង​សរុប​កើន​ឡើង​ដល់​២៣៩​នាក់ ក្នុងនោះ​ព្យាបាលជាសះស្បើយ​ចំនួន១៦៤​នាក់ និង​អ្នកជំងឺកំពុងព្យាបាលចំនួន៧៣​នាក់ទៀត។

អ្នកជំងឺកូវីដ១៩​ដែល​រកឃើញ​កន្លងកនេះ គឺសុទ្ធសឹងតែជាករណីនាំចូលពីក្រៅប្រទេស​ដែល​ភាគ​ច្រើន​​គឺជាអ្នក​ដំណើរ​ដែលឆ្លងកាត់​ប្រទេសម៉ាឡេស៊ី និង​ឥណ្ឌូនេស៊ី មុនពេល​មកដល់កម្ពុជា  ដែល​បង្ខំឲ្យ​អាជ្ញាធរ​កម្ពុជា​បានសម្រេច​ផ្អាកជើង​ហោះហើរ​ជាបណ្តោះ​អាសន្នពីប្រទេស​ទាំងពីរនេះ​ចាប់​ពីថ្ងៃទី១​សីហា​នេះតទៅ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI