អានតួអត្ថបទ
កម្ពុជា សង្គម

អង្គការអន្តរជាតិពីរចេញមុខអំពាវនាវឱ្យអាជ្ញាធរកម្ពុជាដោះលែងលោករ៉ុង ឈុន

លោក រ៉ុង ឈុន
លោក រ៉ុង ឈុន © RFI
ដោយ៖ វណ្ណ សុគន្ធា
១៧ នាទី

នៅ​ថ្ងៃ ទី០៤ ខែ​សីហា​នេះ ​អង្គការ​ឃ្លាំ​មើល​សិទ្ធិ​មនុស្ស​អន្តរជាតិ​Human Rights Watch បាន​ចេញ​មុខ​មក​ទាមទារ​ចំៗ​ឱ្យ​រដ្ឋាភិបាល​កម្ពុជា​ដោះលែង​លោក​រ៉ុង ឈុន​។ ការ​ចេញ​មុខ​របស់​អង្គការ​សិទ្ធិ​មនុស្ស​អន្តរជាតិ​នេះ ​ធ្វើ​ឡើង​១​ថ្ងៃ ​បន្ទាប់​ពី​សហព័ន្ធ​សហជីព​អន្តរជាតិ​(ITUC) បាន​ផ្ញើ​លិខិត​ដោយ​ផ្ទាល់​តែ​ម្តង​មក​កាន់​លោក​នាយក​រដ្ឋមន្រ្តី​ហ៊ុន សែន ​ដើម្បី​ស្នើ​សុំ​ឱ្យ​ដោះលែង​លោក​រ៉ុង ឈុន។ រដ្ឋាភិបាល​កម្ពុជា​មិន​ទាន់​ឃើញ​ឆ្លើយតប​ផ្លូវ​ការ​ណា​មួយ​ទេ​ ប៉ុន្តែ​បាន​អះអាង​ថា​ ការ​ចាប់​ខ្លួន​លោក​រ៉ុង ឈុន ​គឺ​ជា​ការ​អនុវត្ត​ច្បាប់​ដោយ​យក​បញ្ហា​សន្តិភាព​ និង​ស្ថិរភាព​ក្នុង​សង្គម​ជា​គោ​ល។

ផ្សាយពាណិជ្ជកម្ម

អស់ពីក្រុមអង្គការសង្គមស៊ីវិលនៅក្នុងស្រុក នៅពេលនេះដល់វេនអង្គការអន្តរជាតិវិញម្តងដែលបានចេញមុខទាមទារឱ្យដោះលែងលោករ៉ុង ឈុន តំណាងក្រុមប្រឹក្សាឃ្លាំមើលកម្ពុជា និង​ជា​ប្រធាន​សហភាព​សហជីព​កម្ពុជា។  អង្គការឃ្លាំមើលសិទ្ធិមនុស្សអន្តរជាតិHuman Rights Watch នៅថ្ងៃអង្គារនេះបានចេញថ្លែងការណ៍ដោយលើកឡើងថា អាជ្ញាធរកម្ពុជាគួរតែទម្លាក់ចោលបទចោទ និង ដោះលែងលោករ៉ុង ឈុន។ លោករ៉ុង ឈុន ដែលអង្គការអន្តរជាតិមួយនេះបានចាត់ទុកថា ជាសកម្មជនសិទ្ធិមនុស្ស។

លោកPhil Robertson អនុប្រធានអង្គការឃ្លាំមើលសិទ្ធិមនុស្សអន្តរជាតិHuman Rights Watch ប្រចាំតំបន់អាស៊ីបានចាត់ទុកការចាត់ទុកខ្លួនលោករ៉ុង ឈុននេះថា ជាឧទាហរណ៍ចុងក្រោយមួយដែលបង្ហាញឱ្យឃើញពីការបង្រ្កាបឥតឈ​ប់ឈររបស់រដ្ឋាភិបាលកម្ពុជាមកលើក្រុមសកម្មជនដែលខិតខំការពារសិទ្ធិជាមូលដ្ឋានរបស់ប្រជាពលរដ្ឋកម្ពុជា។ មិនតែប៉ុណ្ណោះ លោកPhil Robertson ក៏បានអះអាងថា សហភាពអឺរ៉ុបគួរតែបន្ថែមនូវបញ្ហាចាប់ខ្លួនលោករ៉ុង ឈុននេះចូលទៅក្នុងបញ្ជីនៃការបំពានសិទ្ធិមនុស្សដែលតម្រូវឱ្យមានការដោះស្រាយនៅក្នុងការចរចាជុំវិញប្រព័ន្ធអនុគ្រោះពន្ធEBA។ បន្ថែមលើនេះ លោកPhil Robertson ក៏ចង់ឱ្យរដ្ឋាភិបាលបរទេសនានាលើកបញ្ហាចាប់ខ្លួនលោករ៉ុង ឈុនជាសាធារណៈ និងរួមគ្នាអំពាវនាវដល់រដ្ឋាភិបាលកម្ពុជាឱ្យបញ្ឈប់ការបំពានសិទ្ធិមនុស្សនៅកម្ពុជា។

ក្រៅពីអង្គការឃ្លាំមើលសិទ្ធិមនុស្សអន្តរជាតិHuman Rights Watchនេះ សហព័ន្ធសហជីពអន្តរជាតិ(ITUC)ក៏បានអំ​ពាវនាវឱ្យដោះលែងលោករ៉ុង ឈុនផងដែរ។ ប៉ុន្តែខុសពីអង្គការHuman Rights Watchនេះ សហព័ន្ធសហជីពអន្តរជាតិ(ITUC)បានផ្ញើលិខិតមកកាន់លោកនាយរកដ្ឋមន្រ្តីហ៊ុន សែន ដោយផ្ទាល់តែម្តងកាលពីថ្ងៃទី០៣ ខែសីហា។ សហព័ន្ធសហជីពអន្តរជាតិ(ITUC)បានសម្តែងការព្រួយបារម្ភពីការចាប់ខ្លួនលោករ៉ុង ឈុននេះប្រាប់លោកនាយករដ្ឋមន្រ្តីហ៊ុន សែន និង បានស្នើឱ្យទម្លាក់បទចោទលើលោករ៉ុង ឈុនជាបន្ទាន់ និងសហជីពដែលត្រូវបានឃុំខ្លួនដទៃទៀត ។ សហព័ន្ធសហជីពអន្តរជាតិ(ITUC)ក៏បានប្រាប់លោកហ៊ុន សែនដែរថា ពួកគេគាំទ្រលោករ៉ុង ឈុន និង បន្តឃ្លាំមើលយ៉ាងយកចិត្តទុកដាក់អំពីស្ថានភាពសិទ្ធិមនុស្សនៅកម្ពុជា។

អ្នកនាំពាក្យរដ្ឋាភិបាលកម្ពុជា លោកផៃ ស៊ីផាន បានអះអាងកាលពីថ្ងៃចន្ទថា ការចាប់ខ្លួនលោករ៉ុង ឈុន គឺជាការអនុវត្តច្បាប់របស់កម្ពុជា ដើម្បីការពារសន្តិភាព និង ស្ថិរភាពនៅក្នុងសង្គម។ លោកបានគូសបញ្ជាក់បន្ថែមថា ការអំពាវនាវចង់ឱ្យដោះលែងលោករ៉ុង ឈុនណាមួយ គឺគ្រាន់តែជាមនោសញ្ចេតនាក្នុងន័យនយោបាយតែប៉ុណ្ណោះ។ ប៉ុន្តែរដ្ឋាភិបាលកម្ពុជាមិនវាយតម្លៃលើបញ្ហានេះទេ តែអ្វីដែលរដ្ឋាភិបាលកំពុងយកចិត្តទុកដាក់ គឺការពង្រឹងនីតិរដ្ឋ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ