អានតួអត្ថបទ
កម្ពុជា សង្គម

ករណីលោក រ៉ុង ឈុន៖ អ្នកតវ៉ា៤នាក់ទៀតត្រូវបានឃាត់ខ្លួន តែ២នាក់ដោះលែងវិញ

ក្រុមអ្នកតវ៉ា នៅមុខសាលាដំបូងរាជធានីភ្នំពេញ
ក្រុមអ្នកតវ៉ា នៅមុខសាលាដំបូងរាជធានីភ្នំពេញ REUTERS - STRINGER
ដោយ៖ អ៊ឹង ប៊ុនថន
១៤ នាទី

អ្នកតវ៉ា​យ៉ាង​តិច​៤​នាក់​ត្រូវ​បាន​ចាប់​ឃាត់​ខ្លួន​ជា​បន្ត​បន្ទាប់​នៅ​ថ្ងៃ​ទី​៤​ ទី​៥​ និង​ទី​៦​ ខែ​សីហា​ បន្ទាប់​ពី​ពួកគេ​ចូល​រួម​ឃ្លាំ​មើល​ការ​តវ៉ា​ទាមទារ​ឲ្យ​ដោះលែង ​លោក​ រ៉ុង​ ឈុន ​ប៉ុន្តែ​ក្នុង​នោះ​មាន​បុរស​ម្នាក់​ និង​ស្រ្តី​ម្នាក់​ត្រូវ​បាន​ដោះលែង​វិញ​ក្រោយ​ពី​ធ្វើ​ការ​អប់រំ​។ សម្រាប់​មេធាវី​ការពារ​ក្តី​ឲ្យ​សកម្មជន​អតីត​គណបក្ស​ប្រឆាំង​បាន​ហៅ​ការ​ចាប់​ខ្លួន​នេះ​ថា​ធ្វើ​ឡើង​ដោយ​រំលោភបំពាន​លើ​សិទ្ធិ​សំដែង​មតិ​របស់​ពលរដ្ឋ​ដែល​មាន​ចែង​ក្នុង​ច្បាប់​ជា​ធរមាន​។

ផ្សាយពាណិជ្ជកម្ម

អ្នកតវ៉ាទាំង៤នាក់​ដែលត្រូវបាន​ឃាត់ខ្លួននោះ គឺមាន លោក អ៊ុក សំអូន លោក ឈួ ផេង លោក ជុំ ពុទ្ធី និងអ្នកស្រី ឈិន សុវណ្ណា។ សកម្មជនទាំងនេះ ​ត្រូវបាន​ឃាត់​ខ្លួនជា​បន្ត​បន្ទាប់ នៅ​ថ្ងៃទី៤ ទី៥ និងទី៦ ខែសីហា ខណៈពួកគេព្យាយាមជួបព្រះសង្ឃ៨អង្គ ដែលអាជ្ញាធរនាំព្រះកាយទៅកាន់វត្តថាន់ឱ្យចុះកិច្ច​សន្យា​​បញ្ឈប់ការតវ៉ាទាមទារឱ្យដោះលែង លោក រ៉ុង ឈុន។

ការចាប់ខ្លួន​នេះធ្វើ​ឡើង​ស្រប​ពេល​ អាជ្ញាធរ​ក្រុង​ភ្នំពេញ និង​ក្រសួង​យុត្តិធម៌ ​បាន​ចេញ​លិខិត​ព្រមាន​ដាច់​ពីគ្នា​ឲ្យ​បញ្ឈប់​សកម្មភាព​តវ៉ា​នៅមុខ​តុលាការ​ដើម្បី​ដោះលែង លោក រ៉ុង ឈុន។

ស្នងការនគរបាល​ក្រុងភ្នំពេញ អះអាងថា សកម្មជនទាំងពីរនាក់​ក្នុង​ចំណោម​៤នាក់​នោះ ត្រូវឃាត់ខ្លួន​ក្នុងបទល្មើសញុះញង់​បង្កឱ្យមានភាពវឹកវរធ្ងន់ធ្ងរដល់សន្តិសុខជាតិ ដោយទទួលផែនការយ៉ាងច្បាស់​លា​ស់​​​ពី​ថ្នាក់ដឹកនាំរបស់គាត់ ទាំងខាងក្នុងទាំងខាងក្រៅ ឱ្យប្រមូលផ្តុំកម្លាំងនៅតាមសង្កាត់ នីមួយចំនួន៣នាក់ ដើម្បីតវ៉ាសុំឱ្យដោះលែងលោក រ៉ុង ឈុន។​ ប៉ុន្តែ​​សកម្មជនពីរនាក់គឺលោក អ៊ុក សំអូន និងអ្នកស្រី ឈិន សុ វណ្ណា ត្រូវបានអនុញ្ញាតឲ្យត្រឡប់ទៅផ្ទះវិញ​បន្ទាប់ពីធ្វើ​ការអប់រំ។

សម្រាប់​មេធាវីការពារក្តី​ឲ្យសកម្មជន​ អតីតគណបក្សប្រឆាំង ​លោក សំ សុគង់ បានហៅ​ការ​ចាប់​ខ្លួន​នេះថា​ធ្វើឡើង​រំលោភបំពានលើ​សិទ្ធិសំដែង​តមិ​​របស់ពលរដ្ឋដែលមានចែង​ក្នុង​​ច្បាប់​ជាធរមាន។ លោក​​អះអាងថា សកម្មជនទាំងនោះ​គ្រាន់តែ​ទៅ​ឃ្លាំ​មើល​ការ​តវ៉ា​របស់​ពលរដ្ឋ​ផ្សេងទៀត ​​ដែល​ទាម​ទារ​ឲ្យ​​ដោះលែង​លោក រ៉ុង ឈុន តែប៉ុណ្ណោះ គឺជាអ្វីដែល​មេធាវីរូបនេះហៅថាជាសិទ្ធិ​សំដែង​តមិ​ដោយ​ស្រប​​តាម​ច្បាប់។

លោក សំ សុគង់ ដែលទើបតែចេញពីសវនាការ​នៅតុលាការ​កំពូល​ការពារ​បណ្តឹង​សារទុក្ខ​របស់​សកម្ម​ជន​អតីត​បក្សប្រឆាំងផ្សេងទៀត​ បាន​ប្រាប់​វិទ្យុ​បារាំង​អន្តរជាតិ ​RFI ថា មកដល់ពេលនេះ មាន​សកម្មជន​អតីតគណបក្ស​សង្រ្គោះជាតិ​ចំនួន​១៨​នាក់កំពុង​ជាប់ឃុំនៅពន្ធនាគារ គឺ​រាប់ទាំង២នាក់​ដែល​ត្រូវបាន​ចាប់ខ្លួនក្នុង​ករណីតវ៉ាសុំដោះ​លែង ​លោក រ៉ុង ឈុន ផងដែរ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ