អ្នកនាំពាក្យ៖ស្រ្តីកងទ័ពមួកខៀវខ្មែរឆ្លងកូវីដ១៩ ជាការឆ្លងតគ្នាពីក្រុមតែមួយ ហើយពុំទាន់មានការឆ្លងចូលសហគមន៍ទេ

អ្នកដែលប៉ះពាល់ដោយផ្ទាល់ និងដោយប្រយោលជាមួយនឹងស្រ្តីជាកងទ័ពមួកខៀវកម្ពុជានេះ គឺមានចំនួន១៣នាក់ដែ​លជាបងប្អូនសាច់ញាតិរបស់សាម៉ីខ្លួន។ ក្នុងនោះ សមាជិកគ្រួសារ៤នាក់ គឺឱពុកម្តាយ និងបងប្អូនប្រុស ជាអ្នកដែលប៉ះពាល់ផ្ទាល់ជាមួយស្រ្តីកងទ័ពមួកខៀវរូបនេះ ហើយពួកគេទាំងអស់នេះត្រូវបាននាំទៅពិនិត្យរកជំងឺកូវីដ១៩ តែលទ្ធផលអវិជ្ជមានទាំងអស់។ នេះ គឺជាគូសបញ្ជាក់របស់លោកស្រីឱ វណ្ណឌីន អ្នកនាំពាក្យក្រសួងសុខាភិបាលកម្ពុជាតាមរយៈទូរទស្សន៍BTV នាថ្ងៃត្រង់ថ្ងៃទី១០ ខែសីហានេះ។ បើតាមលោកស្រីឱ វណ្ណឌីន ពួកគេទាំងអស់នេះត្រូវបានដាក់នៅក្នុងមណ្ឌលចត្តាឡីស័ក្តខេត្តកណ្តាល ដើម្បីបន្តតាមដានតទៅទៀត។

ស្រ្តីជាកងទ័ពមួកខៀវកម្ពុជារូបនេះ បានវិលត្រឡប់មកពីប្រទេសម៉ាលីដល់ប្រទេសកម្ពុជាកាលពីថ្ងៃទី១០ ខែកក្កដាកន្លងទៅជាមួយមិត្តរួមក្រុមចំនួន៧៩នាក់ផ្សេងទៀត។ មកដល់ភ្លាម ពួកគេទាំង៨០នាក់ត្រូវបានយកសំណាកទៅធ្វើតេស្តរកជំងឺកូវីដ១៩ តែអវិជ្ជមានទាំងអស់។ ក្រោយមកអាជ្ញាធរសុខាភិបាលកម្ពុជាក៏បាននាំពួកគេទៅធ្វើចត្តាឡីស័ក្តរួមគ្នានៅក្នុងមណ្ឌ​លកងទ័ពមួកខៀវកម្ពុជាក្នុងខេត្តកំពង់ស្ពឺ។ ដល់ថ្ងៃទី១៣ នៃរយៈពេលធ្វើចត្តាឡីស័ក្ត១៤ថ្ងៃ ពួកគេ៤នាក់ត្រូវបានរកឃើ​ញមានជំងឺកូវីដ១៩ ។ ដូច្នេះហើយ កងទ័ពមួកខៀវកម្ពុជា៧៦នាក់ទៀតត្រូវបន្តធ្វើចត្តាឡីស័ក្ត១៤ថ្ងៃ​ដោយចាប់ផ្តើមរាប់ពីថ្ងៃទី១ឡើងវិញ។ លុះដល់ថ្ងៃទី២៧ ខែកក្កដា ពួកគេ៤នាក់ក៏បានរកឃើញមានផ្ទុកជំងឺកូវីដ១៩ថែមទៀ​តដែលតម្រូវឱ្យពួកគេ៧២ត្រូវបន្តធ្វើចត្តាឡីស័ក្តដោយរាប់ឡើងវិញរយៈពេល១៤ថ្ងៃបន្តទៀត។

ក៏ប៉ុន្តែពួកគេត្រូវបានអនុញ្ញាតឱ្យទៅធ្វើចត្តាឡីស័ក្តនៅតាមផ្ទះរៀងៗខ្លួន។ គឺក្រោយធ្វើចត្តាឡីស័ក្តនៅផ្ទះនេះប៉ុន្មានថ្ងៃទើបស្រ្តីជាកងទ័ពមួកខៀវកម្ពុជាអាយុ២៧ឆ្នាំនៅក្រុងតាខ្មៅត្រូវបានរកឃើញមានផ្ទុកជំងឺកូវីដ១៩។ បន្ទាប់ពីរកឃើញនេះ អាជ្ញាធរសុខាភិបាលកម្ពុជាក៏នាំកងទ័ពមួកខៀវផ្សេងទៀតទៅធ្វើចត្តាឡីស័ក្តនៅមណ្ឌលកងទ័ពមួកខៀវនៅក្នុងខេត្តកំពង់ស្ពឺវិញ។ នេះបើតាមការអះអាងរបស់លោកស្រីឱ វណ្ឌឌីន។ លោកស្រីឱ វណ្ឌឌីន បានវាយតម្លៃថា ការឆ្លងលើស្រ្តីរូបនេះ គឺជាការឆ្លងតគ្នាពីកងទ័ពមួកខៀវដូចគ្នា ហើយមិនទាន់មានការឆ្លងចូលសហគមន៍នៅឡើយទេ។

ប៉ុន្តែ នៅព្រឹកថ្ងៃចន្ទនេះ ចៅសង្កាត់សិត្បូ បានប្រាប់មកអភិបាលក្រុងតាខ្មៅថា មុនរកឃើញមានជំងឺកូវីដ១៩ ស្រ្តីជាកងទ័ពមួកខៀវកម្ពុជារូបនេះ បានធ្វើចង្ហាន់យកទៅប្រគេនព្រះសង្ឃ និងជូនដល់មនុស្សចាស់ ព្រមទាំងបានចែកលុយដល់ក្មេងៗថែមទៀតផង។ នេះបើតាមលិខិតរបស់ចៅសង្កាត់សិត្បូផ្ញើទៅកាន់អភិបាលក្រុងតាខ្មៅ ហើយត្រូវបានគេចែកចាយបន្តគ្នាយ៉ាងព្រោងព្រាតតាមបណ្តាញសង្គម។ ចំពោះលិខិតនេះ លោកស្រីឱ វណ្ណឌីន បានគូសបញ្ជាក់ថា នឹងស្នើឱ្យអាជ្ញាធរមូលដ្ឋានពិនិត្យឡើងវិញ ដោយសារតែព័ត៌មានដែលលោកស្រីទទួលបាន គឺខុសពីនេះ។ ខុសគ្នានៅត្រង់ថា ស្រ្តីជាកងទ័ពមួកខៀវរូបនេះក្នុងអំឡុងពេលធ្វើចត្តាឡីស័ក្តក្នុងផ្ទះ គឺមិនបានចេញទៅជួបអ្នកណា ឫមានអ្នកណាមកជួបនោះទេ ហើយរូបគេថែមទាំងអនុវត្តតាមវិធានសុខាភិបាលបានល្អថែមទៀត។ លោកស្រីឱ វណ្ឌី​ អះអាងបែបនេះដោយយោងតាមការបញ្ជាក់ផ្ទាល់ពីសាម៉ីខ្លួន៕