អានតួអត្ថបទ
កម្ពុជា សង្គម

ក្រសួងអប់រំនឹងបើកឲ្យសិស្សសាលារដ្ឋថ្នាក់ទី៩ និងទី១២ចូលរៀនវិញនៅខែកញ្ញា ដើម្បីត្រៀមប្រលងនៅខែធ្នូ

ក្រសួងអប់រំ យុវជន និងកីឡា
ក្រសួងអប់រំ យុវជន និងកីឡា © Internet
ដោយ៖ ញឹម សុផល
១២ នាទី

ក្រសួង​អប់រំ យុវជន និងកីឡា នៅ​ថ្ងៃ​ទី​១០ ខែ​សីហា​នេះ​ បាន​ប្រកាស​ថា​ នឹង​បើក​ឲ្យ​ដំណើរ​ការ​សិក្សា​គ្រឹះស្ថាន​សាធារណៈ​ឡើងវិញ​ដំណាក់​កាល​ទី២​ សម្រាប់​ថ្នាក់​ដែល​ត្រូវ​ប្រលង​សញ្ញាបត្រ​មធ្យម​សិក្សា​ទាំង​២​កំរិត​ នៅ​អំឡុង​ខែ​កញ្ញា​ ខាង​មុខ​ ខណៈ​ថ្នាក់​ដទៃ​ទៀត​ នឹង​ត្រូវ​ជូន​ដំណឹង​ដំណើរ​ការ​នៅ​ពេល​ក្រោយ​។ ជាមួយគ្នានេះ​ គ្រឹះស្ថាន​អប់រំ​ឯកជន​មួយ​ចំនួន​ក៏​ត្រូវ​រងចាំ​រៀបចំ​ការ​ប្រលង​សញ្ញាបត្រ​ទុតិយភូមិ​ជាមួយ​នឹង​សាលារដ្ឋ​នៅ​ខែ​ធ្នូ​ផង​ដែរ​។

ផ្សាយពាណិជ្ជកម្ម

ថ្នាក់ទី៩ និងថ្នាក់ទី១២ ដែលជាថ្នាក់ត្រូវប្រលងសញ្ញាបត្រមធ្យមសិក្សាបឋមភូមិ និងសញ្ញាបត្រមធ្យមសិក្សាទុតិយភូមិ(បាក់ឌុប) នៃគ្រឹះស្ថានអប់រំសាធារណៈ នឹងត្រូវអនុញ្ញាតឲ្យចូលរៀនមុនគេនៅអំឡុងខែកញ្ញាខាងមុខនេះ ដែលនេះជាដំណាក់កាលទី២នៃការបើកសាលាសាធារណៈ ឡើងវិញបន្ទាប់ពីអាក់ខានដោយសារការរាតត្បាតនៃមេរោគកូវីដ១៩។

ក៏ប៉ុន្តែក្រសួងអប់រំ តាមរយៈសេចក្តីប្រកាសនៅថ្ងៃនេះ ដំណើរការចូលរៀនឡើងវិញនេះ ធ្វើឡើង ក្នុងទ្រង់ទ្រាយតូច តែ១៥នាក់ក្នុងមួយថ្នាក់ប៉ុណ្ណោះ ដោយគោរពតាមវិធានអនាម័យរបស់ក្រសួងសុខាភិបាល និងអង្គការសុខភាពពិភពលោក (WHO)។

ដោយឡែក សម្រាប់សិស្សថ្នាក់ផ្សេងៗទៀត ដែលមិនមែនជាថ្នាក់ប្រលង ក្រសួងអប់រំនឹងសម្រេចការចូលរៀនរបស់ពួកគេនៅថ្ងៃក្រោយ។ នេះបើតាមសេចក្តីប្រកាសរបស់ក្រសួងអប់រំ។ លើសពីនេះ គ្រឹះស្ថានសិក្សាឯកជនមួយចំនួន ក៏បានស្ម័គ្រចិត្តពន្យាពេលការប្រលងសញ្ញាបត្របាក់ឌុប រហូតដល់ខែធ្នូដែរ ដើម្បីចូលរួមប្រលងជាមួយសាលារដ្ឋ ខណៈសាលាឯកជនមួយចំនួនបានរៀបចំប្រលងដោយឡែក បន្ទាប់ពីពួកគេដំណើរការសិក្សាតាមអនឡាញ។

សូមបញ្ជាក់ថា ក្រសួងអប់រំ យុវជន និងកីឡា កាលពីខែមីនាឆ្នាំ២០២០២ បានប្រកាសឲ្យ​សាលារៀន​ទូទាំង​ប្រទេសដាក់ឲ្យសិស្សវិស្សមកាល​មុនកាលកំណត់​  គឺបន្ថែមពី​លើ​បំរាម​​មុនៗ ​ដែល​រដ្ឋាភិបាលឲ្យ​បិទ​សាលារៀន​តែនៅ​ក្រុង​សៀមរាប និង​ក្រុង​ភ្នំពេញ ដើម្បី​បង្កា​ការ​ឆ្លង​រាលដាល​នៃជំងឺកូវីដ១៩។

ទោះយ៉ាងណា រដ្ឋាភិបាលបានយល់ព្រមជាគោលការណ៍ឲ្យក្រសួងអប់រំ សាកល្បងបើកដំណើរការឡើងវិញ នៅដំណាក់កាលទី១ នៅក្នុងកំឡុងខែសីហានេះ នូវគ្រឹះស្ថានសិក្សាឯកជន ដែលមានស្តង់ដាខ្ពស់ចំនួន ២០ ដែលមានទីតាំងស្ថិតនៅរាជធានីភ្នំពេញ ក្រុងសៀមរាប និងក្រុងបាត់ដំបង៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ