អានតួអត្ថបទ
កម្ពុជា សង្គម

លោកផៃ ស៊ីផាន៖ការធ្វើបត្យាប័នជាមួយបារាំង មិនមែនមានគោលដៅនាំយកក្រុមប្រឆាំងមកកាត់ទោសនៅកម្ពុជាទេ

លោក ផៃ ស៊ីផាន
លោក ផៃ ស៊ីផាន © សហការី
ដោយ៖ វណ្ណ សុគន្ធា
១៦ នាទី

នៅ​ព្រឹក​ថ្ងៃ​សុក្រ​នេះ​ រដ្ឋាភិបាល​កម្ពុជា​បាន​សម្រេច​អនុម័ត​យល់ព្រម​លើ​សេចក្តី​ព្រាង​អនុសញ្ញា​ស្តីពី​បត្យាប័ន​រវាង​កម្ពុជា​ និង​ បារាំង​។ ជំហាន​បន្ទាប់​ សេចក្តី​ព្រាង​នេះ​នឹង​បញ្ជូន​ទៅ​រដ្ឋសភា​ជាតិ​ ដើម្បី​ពិនិត្យ​ពិភាក្សា​ និង​អនុម័ត​ជា​ផ្លូវ​ការ​។ ចំពោះ​ការ​ធ្វើ​សេចក្តី​ព្រាង​អនុសញ្ញា​ស្តីពី​បត្យា​នេះ​ លោក​ផៃ ស៊ីផាន អ្នក​នាំ​ពាក្យ​រដ្ឋាភិបាល​កម្ពុជា​ បាន​អះអាង​ប្រាប់​វិទ្យុ​បារាំង​អន្តរជាតិ​ថា​ វា​ជា​ច្បាប់​លក្ខណៈ​សាកល​ ពោល​ គឺ​មិនមែន​ធ្វើ​ឡើង​ក្នុង​គោល​បំណង​ ដើម្បី​ឈាន​ទៅ​នាំ​យក​ក្រុម​អតីត​គណបក្ស​ប្រឆាំង​ដែល​ស្នាក់​នៅ​ក្នុង​ប្រទេស​បារាំង​មក​កាត់​ទោស​នៅ​កម្ពុជា​ទេ​។

ផ្សាយពាណិជ្ជកម្ម

ការធ្វើអនុសញ្ញាស្តីពីបត្យាប័នរវាងកម្ពុជា និង បារាំង គឺក្នុងគោលបំណងការពារផលប្រយោជន៍របស់ប្រជាព​លរដ្ឋខ្មែរ។ នេះ គឺជាគូសបញ្ជាក់ឱ្យដឹងរបស់លោកផៃ ស៊ីផាន អ្នកនាំពាក្យរដ្ឋាភិបាលកម្ពុជា បន្ទាប់ពីសេចក្តីព្រាងអនុស​ញ្ញា​នេះត្រូវបានគណៈរដ្ឋមន្រ្តីកម្ពុជាអនុម័តយល់ព្រមនៅព្រឹកថ្ងៃសុក្រនេះ។ បើតាមលោកផៃ ស៊ីផាន ការតាក់តែងសេចក្តីព្រាងការធ្វើបត្យាប័ននេះឡើង គឺមានលក្ខណៈសាកល និងសម្រាប់ប្រជាពលកម្ពុជារដ្ឋទូទៅ ពោល គឺមិនមែនជាការរៀបចំឡើងពិសេសសម្រាប់ស្នើសុំទៅរដ្ឋាភិបាលបារាំងឱ្យបញ្ជូនក្រុមថ្នាក់ដឹកនាំអតីតគណបក្សសង្រ្គោះជាតិដែលរត់គេចពីទោសទណ្ឌនៅកម្ពុជាមកកាត់ទោស និងដាក់ទោសនៅក្នុងប្រទេសកម្ពុជានោះឡើយ។

បច្ចុប្បន្ន ថ្នាក់ដឹកនាំអតីតគណបក្សប្រឆាំង ជាពិសេស គឺលោកសម រង្ស៊ី កំពុងតែស្នាក់នៅក្នុងប្រទេសបារាំង បន្ទាប់ពីរត់ចេញពីប្រទេសកម្ពុជាក្រោយពីរូបលោកត្រូវបានតុលាការកម្ពុជាចោទប្រកាន់ និងផ្តន្ទាទោសជាច្រើនបទល្មើសដែលប្តឹងឡើងដោយអាជ្ញាធររដ្ឋាភិបាលកម្ពុជា។ ដោយបញ្ជាក់ជាថ្មីថា បត្យាប័ននេះមិនមានគោលដៅចំពោះក្រុមលោកសម រង្ស៊ីនេះ លោកផៃ ស៊ីផាន បានអះអាងថា ការធ្វើអនុសញ្ញាស្តីពីបត្យាប័ននេះមិនមែនជារឿងចៃដន្យនោះទេ តែគឺបានគិតគូរជាយូរមកហើយ។ លោកបានគូសបញ្ជាក់ថា អនុសញ្ញាស្តីពីបត្យាប័នជាមួយបារាំងនេះមិនមានអ្វីពិសេសលើសពីបត្យាប័នដែលកម្ពុជាបានធ្វើជាមួយបណ្តាប្រទេសមួយចំនួនទៀតនោះឡើយ។

គិតមកដល់ពេលនេះ កម្ពុជាបានចុះកិច្ចព្រមព្រៀងធ្វើបត្យាប័នជា​មួយប្រទេសចំនួន៦រួចមកហើយ គឺជាមួយប្រទេសថៃក្នុងឆ្នាំ១៩៩៩ ចិនក្នុងឆ្នាំ២០០០ ប្រទេសឡាវក្នុងឆ្នាំ២០០៥ ជាមួយកូរ៉េខាងត្បូងក្នុងឆ្នាំ២០១០ ជាមួយវៀតណាមក្នុងឆ្នាំ២០១៤ និងជាមួយប្រទេសរុស្ស៊ី នៅក្នុងឆ្នាំ២០១៨។ បន្ថែមពីលើកិច្ចព្រមព្រៀងធ្វើបត្យាប័ននេះ កម្ពុជាក៏បានចុះកិច្ចព្រមព្រៀងផ្ទេរទណ្ឌិតជាមួយប្រទេស២ទៀតដែរ គឺជាមួយប្រទេសឥណ្ឌានៅក្នុងឆ្នាំ២០០៩ និង ជាមួយប្រទេសវៀតណាមដដែលនៅក្នុងឆ្នាំ២០២០នេះ។

សូមបញ្ជាក់ថា បត្យាប័ន គឺជានីតិវិធីនៃការបញ្ជូនខ្លួនជនល្មើសច្បាប់ពីរដ្ឋមួយទៅរដ្ឋមួយទៀតដែលបានធ្វើសំណើ​សុំ ដើម្បី​យក​ជន​ល្មើសនោះ​ទៅ​ធ្វើការ​ចោទប្រកាន់​ចំពោះ​មុខ​យុត្តាធិការ​របស់​ខ្លួន ឬ ​យក​ជនល្មើស​នោះទៅ​អនុវត្ត​ទោស​នៅ​ក្នុង​ប្រទេស​របស់​ខ្លួន​។ ការធ្វើបត្យាប័ននេះ គឺអាចអនុវត្តទៅបានលុះត្រាតែប្រទេសស្នើសុំ និង ប្រទេសទទួល មានកិច្ចព្រមព្រៀងធ្វើបត្យារវាងគ្នានិងគ្នា៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ