សកម្មជនអតីតបក្សប្រឆាំង១០នាក់ទៀតត្រូវបានកោះហៅដោយតុលាការខេត្តកំពង់ចាម

​អតីត​មន្រ្តីគណបក្សសង្រ្គោះជាតិចំនួន១០នាក់ ដែល​តុលាកាខេត្តកំពង់ចាមចេញដីកាកោះហៅ​ឲ្យចូលខ្លួនជាបន្តបន្ទាប់មកនោះ គឺភាគច្រើនជាអតីតក្រុមប្រឹក្សាឃុំជាប់ឆ្នោតរបស់អតីតគណបក្សសង្គ្រោះជាតិ​។ ​តុលាការ​បានបង្គាប់ឱ្យពួកគេចូលខ្លួន​តាំងពីថ្ងៃទី៣ ខែសីហា ដល់ថ្ងៃទី២ ខែកញ្ញា ២០២០ ដើម្បីសាកសួរក្រោមបទញុះញង់ឱ្យប្រព្រឹត្តបទឧក្រិដ្ឋជាអាទិ៍ និងរួមគំនិតក្បត់។

លោក ហែម សុជាតិ ជាមេធាវីការពារក្តី​បានប្រាប់វិទ្យុបារាំងអន្តរជាតិRFIថា កាលពីអំឡុងពេលប្រហែល​១០​ថ្ងៃមុន លោកបានជួយការពារក្តីឲ្យសកម្មជនទាំងនោះបានចំនួន១០​នាក់​ដែល​ទៅឆ្លើយ​បំភ្លឺ​នៅតុលាការ​ខេត្ត​កំពង់​ចាម និងចូលរួមសវនាការនៅតុលាការ​ខេត្ត​ត្បូង​ឃ្មុំ។ មេធាវីដដែល​បដិសេធថា សកម្មជនទាំង​នោះ មិនពាក់ព័ន្ធ​នឹងសំណុំរឿង​លោក រ៉ុង ឈុន ទេ ពោល​ការ​កោះហៅ​នេះគឺពាក់ព័ន្ធនឹង​ការប្រកាស​វិល​ចូល​ស្រុក​វិញ​របស់​លោក សម រង្ស៊ី តាំងពីចុងឆ្នាំមុន។

បើតាម​មន្ត្រីសាលាដំបូងខេត្តកំពង់ចាម​ មានមនុស្ស១១នាក់ត្រូវបានហៅមកសាកសួរក្នុង​នាមជា​សាក្សីកាល​ពីចុងខែសីហា ប៉ុន្តែមិនត្រូវបានឃុំ​ខ្លួននោះទេ។

ដោយឡែក​នៅភ្នំពេញ ព្រះរាជអាជ្ញារងអមសាលាដំបូង កាលពីថ្ងៃទី១៤ ខែសីហា បាន​បង្គាប់ឱ្យកម្លាំងមានសមត្ថកិច្ចនាំខ្លួនលោក ប៉ែន ច័ន្ទសង្រ្គាម អតីតក្រុមប្រឹក្សាខណ្ឌមកពីបក្សសង្រ្គោះជាតិមកបង្ហាញខ្លួនឱ្យបាន​មុនថ្ងៃទី៧ ខែកញ្ញានៅការិយាល័យប្រឆាំងភេរវកម្ម និងឧក្រិដ្ឋកម្មឆ្លងដែន ដើម្បីសាកសួរ​ពីដំណើររឿងញុះញង់បង្កឱ្យមាន​ភាពវឹកវរធ្ងន់ធ្ងរដល់សន្តិសុខសង្គម។

ការ​បង្គាប់ឲ្យនាំខ្លួននេះ គឺបន្ទាប់ពី លោក ប៉ែន ច័ន្ទសង្រ្គាម ចូលរួមតវ៉ាឱ្យដោះលែងលោក រ៉ុង ឈុន​ កាលពីថ្ងៃទី១៣ ខែសីហា។ សំណុំរឿង លោក រ៉ុង ឈុន គឺមានមនុស្សចំនួន៤នាក់ទៀត​ត្រូវបានឃុំ​គឺលោក សួង សោភ័ណ្ឌ ប្រធានគណបក្សខ្មែរ​ឈ្នះ កញ្ញា ឈឿន ដារ៉ាវី កញ្ញា ស កន្និកា និង​លោក ហ៊ុន វណ្ណៈ ដែលពួកគេគឺសកម្មជនសង្គមដែល​ចូលទាមទារឲ្យដោះលែង លោក រ៉ុង​ ឈុន៕