របាយការណ៍ស្រាវជ្រាវ៖ ការយល់ដឹងរបស់អ្នកប្រើប្រាស់នៅកម្ពុជាមានកម្រិតទាប
ចុះផ្សាយនៅថ្ងៃ៖
កម្រិតយល់ដឹងរបស់អ្នកប្រើប្រាស់នៅកម្ពុជា នៅមានកម្រិតទាបនៅឡើយ។ នេះបើតាមរបាយការណ៍ស្រាវជ្រាវចេញផ្សាយ ដោយអគ្គនាយកដ្ឋានជំនាញរបស់ក្រសួងពាណិជ្ជកម្ម នៅថ្ងៃទី២ ខែកញ្ញានេះ។ មន្ត្រីជំនាញអះអាងថា ការយល់ដឹងរបស់អ្នកប្រើប្រាស់នៅមានកម្រិត ដោយសារតែការផ្សព្វផ្សាយច្បាប់កិច្ចការពារអ្នកប្រើប្រាស់មិនទាន់ទូលំទូលាយ ព្រោះកូវីដ១៩។
លទ្ធិផលស្រាវជ្រាវមួយបង្ហាញថា កម្ពុជាទទួលបានពិន្ទុ ៦៨.៨៤ លើ១៣០ ដែលមានន័យថា កម្ពុជាស្ថិតនៅក្នុងកម្រិតចំណាត់ថ្នាក់ “កម្រិតយល់ដឹងតិចតួចបំផុត” បើប្រៀបធៀបទៅនឹងកម្រិតយល់ដឹងរបស់អ្នកប្រើប្រាស់នៅក្នុងតំបន់អាស៊ាន។ នេះបើតាមរបាយការណ៍ស្តីពី កម្រិតយល់ដឹងរបស់អ្នកប្រើប្រាស់ក្នុងតំបន់អាស៊ាននៅកម្ពុជា របស់អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការក្លែងបន្លំរបស់ក្រសួងពាណិជ្ជកម្ម(ក.ប.ប) ដែលផ្សព្វផ្សាយនៅថ្ងៃទី២ ខែកញ្ញានេះ។
ការស្រាវជ្រាវនេះធ្វើឡើង កាលពីដើមឆ្នាំ២០២០ ដោយមានសំណាកសរុប២០០ និងបានធ្វើឡើងនៅក្នុងក្រុងភ្នំពេញ សៀមរាប បាត់ដំបង និងខេត្តកំពង់ចាម។ ការស្រាវជ្រាវនេះបានផ្តោតទៅលើផ្នែកធំៗចំនួនបី រួមមានផ្នែកការយល់ដឹង ដែលទទួលបាន១៧.៣៧ពិន្ទុលើ៤០ ផ្នែកជំនាញមានពិន្ធុ២៤.៣២លើ៤៥ និងអាកប្បករិយារបស់អ្នកប្រើប្រាស់មានពិន្ទុ២៧.១៦លើ៤៥។
បើទោះបីជា ការយល់ដឹងរបស់អ្នកប្រើប្រាស់នៅមានកម្រិតទាប ប៉ុន្តែអ្នកប្រើប្រាស់នៅកម្ពុជាមានការចង់ដឹង និងចង់ឲ្យមានកិច្ចការពារពួកគាត់។ នេះបើតាមការលើកឡើងរបស់លោក ប្រាក់ សេរីវឌ្ឍន៍ ប្រធានវិទ្យាស្ថានស្រាវជ្រាវ និងអភិវឌ្ឍន៍ជនបទកម្ពុជា។
លោក ផឹង វីរៈ ប្រធាននាយកដ្ឋានកិច្ចការពារអ្នកប្រើប្រាស់នៃ ក.ប.ប បានអះអាងថាកម្រិតយល់ដឹងរបស់អ្នកប្រើប្រាស់នៅកម្ពុជានៅមានកម្រិតទាបនៅឡើយ ដោយសារតែច្បាប់ស្តីពីកិច្ចការពារអ្នកប្រើប្រាស់ទើបតែបានអនុម័ត ហើយការផ្សព្វផ្សាយនៅមានកម្រិតនៅឡើយ។ តែលោកសង្ឃឹមថា ក្រោយពីការផ្សព្វផ្សាយច្បាប់នេះ ការយល់ដឹងរបស់អ្នកប្រើប្រាស់នៅកម្ពុជានឹងមានការកើនឡើងជាងនេះ។
អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការក្លែងបន្លំ នៅថ្ងៃនេះបញ្ជាក់ថា តាមរយៈរបាយការណ៍ខាងលើនេះ វាចាំបាច់ណាស់ក្នុងការផ្តោតសំខាន់លើការលើកកម្ពស់ ការយល់ដឹងឲ្យបានទូលំទូលាយ ក៏ដូចជាបង្កើតយន្តការ ដែលមានប្រសិទ្ធភាពនានា ដើម្បីជួយសម្រុះសម្រួលក្នុងទំនាស់ផ្សេងៗរវាងអតិថិជន និងធុរកិច្ច។
គួររំលឹកផងដែរថា កាលពីខែវិច្ឆកា ឆ្នាំ២០១៩កន្លងទៅ កម្ពុជាបានដាក់ឲ្យប្រើប្រាស់ច្បាប់ស្តីពីកិច្ចការពារអ្នកប្រើប្រាស់។ ប៉ុន្តែធៀបនឹងប្រទេសក្នុងតំបន់ កម្ពុជាជាប្រទេសចុងក្រោយ ដែលទទួលបានការអនុម័តឲ្យប្រើប្រាស់ច្បាប់នេះ ក្នុងគោលដៅការពារអ្នកប្រើប្រាស់ និងលើកម្ពស់ការប្រកួតប្រជែងដោយសុចរិត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ