តើតម្លៃស្នាក់នៅនិងម្ហូបអាហារខ្ពស់ហួសហេតុ អាចនឹងរុញទេសចរណ៍ខ្មែរឲ្យដួលទៅវិញទេ ក្រោយក្រោកឈរបានមួយភ្លែត?
ចុះផ្សាយនៅថ្ងៃ៖
ស្តាប់ - ០៩:៥៨
ពលរដ្ឋកម្ពុជានៅក្នុងប្រទេសគឺជាអ្នកដែលធ្វើឲ្យវិស័យទេសចរណ៍ខ្មែរ ដែលដេកដួលទៅលើដីស្ទើរដកដង្ហើមមិនរួច ឲ្យងើបឈរឡើងវិញនៅក្នុងសម័យកូវីដ១៩នេះ។ តាមរយៈភស្តុតាងច្បាស់ៗកាលពីអំឡុងពេលឈប់សម្រាក១សប្តាហ៍ជាប់គ្នាកន្លងទៅថ្មីៗនេះ វិស័យទេសចរណ៍ខ្មែរដែលធ្លាក់ជិតដល់ចំណុចសូន្យហើយនោះ បានងើបឡើងវិញតាមរយៈការចេញដើរកម្សាន្តរបស់ពលរដ្ឋខ្មែរជាង១,៤លាននាក់។ ក៏ប៉ុន្តែក្រោយការប្រឹងប្រែងសង្គ្រោះវិស័យទេសចរណ៍ឡើងវិញរបស់ពលរដ្ឋខ្មែរនេះ បញ្ហាសំខាន់ៗចំនួន២ចំណុចនៅតែរំលេចឡើងឥតដាច់ គឺតម្លៃនៃការស្នាក់នៅ និងម្ហូបអាហារ មានការឡើងខ្ពស់ច្រើនដង។ បញ្ហានេះ ធ្វើឲ្យមានការបារម្ភថា ការឡើងថ្លៃកន្លែងស្នាក់នៅ និងម្ហូបអាហារ ថ្វីត្បិតតែជាប្រពៃណី តែអាចជាឧបសគ្គធ្វើឲ្យដួលរលំទៅវិញនៃទេសចរណ៍ខ្មែរទៅថ្ងៃក្រោយ។
