ប្រតិកម្មជាតិ និងអន្តរជាតិធ្លាក់មកជាបន្តបន្ទាប់ជុំវិញការចាប់ខ្លួន និងឃុំខ្លួនសកម្មជនការពារបរិស្ថាន៣រូបនៅកម្ពុជា
ចុះផ្សាយនៅថ្ងៃ៖
បន្ទាប់ពីយុវជនការពារបរិស្ថាន៣នាក់ ត្រូវបានតុលាការសាលាដំបូងរាជធានីភ្នំពេញចោទប្រកាន់ និងឃុំខ្លួនបណ្តោះអាសន្ននៅក្នុងពន្ធនាគារព្រៃសរកាលពីថ្ងៃអាទិត្យ ប្រតិកម្មនានាបានធ្លាក់មកជាបន្តបន្ទាប់ពីសំណាក់ក្រុមអ្នកការពារសិទ្ធិមនុស្សជាតិ និងអន្តរជាតិ។ ខ្លះសម្តែងការព្រួយបារម្ភពីការចាប់ខ្លួន និងឃុំខ្លួននេះ ខ្លះទៀតថា ការតវ៉ាមិនមែនជាបទល្មើស និងថា នឹងបន្តតាមដានឃ្លាំមើលបញ្ហានេះយ៉ាងយកចិត្តទុកដាក់។
អង្គការលីកាដូដែលជាអង្គការការពារសិទ្ធិមនុស្សធំមួយនៅកម្ពុជាមិនបានបញ្ចេញទស្សនៈយល់ឃើញបែបណាឡើយចំពោះការចាប់ខ្លួន និង ការឃុំខ្លួនសកម្មជនការពារបរិស្ថានទាំង៣នាក់នេះ។ ប៉ុន្តែអង្គការនេះបានកត់សម្គាល់ថា ការចាប់ខ្លួន និងឃុំខ្លួនពូកគេ គឺពាក់ព័ន្ធទៅនឹងសកម្មភាពអហិង្សារបស់អ្នកទាំង៣ក្នុងការអំពាវនាវឱ្យរាជរដ្ឋាភិបាលយកចិត្តទុកដាក់អំពីការលុបបឹងតាមោក នៅភាគខាងជើងនៃរាជធានីភ្នំពេញ ។
សកម្មជនការពារបរិស្ថានទាំង៣នាក់នេះ រួមមាន លោក ថុន រដ្ឋា អាយុ ២៨ឆ្នាំ កញ្ញា ឡុង គន្ធា អាយុ ២២ឆ្នាំ និងកញ្ញា ភួន កែវរស្មី អាយុ ១៩ឆ្នាំ ហើយពួកគេ គឺជាសមាជិកចលនាមាតាធម្មជាតិកម្ពុជា។ អ្នកទាំង៣ត្រូវបានតុលាការចោទប្រកាន់ដូចគ្នាពីបទ“ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម” និងបានបញ្ជូនទៅឃុំខ្លួនបណ្តោះអាសន្ននៅក្នុងពន្ធនាគារព្រៃសរ។
ចំពោះបញ្ហានេះ លោកស្រីចក់ សុភាព នាយិកាមជ្ឈមណ្ឌលសិទ្ធិមនុស្សកម្ពុជា បានអះអាងថា ការបន្តបង្ក្រាប ចាប់ខ្លួន និងចោទប្រកាន់ជាបន្តបន្ទាប់ លើអ្នកការពារសិទ្ធិមនុស្ស សកម្មជនបរិស្ថាន និងពលរដ្ឋដោយសារតែការប្រើប្រាស់សិទ្ធិសេរីភាពស្របច្បាប់របស់ពួកគេ ដែលត្រូវបានធានាដោយរដ្ឋធម្មនុញ្ញនិងច្បាប់សិទ្ធិមនុស្សអន្តរជាតិ គឺជាការបង្ហាញនូវការបំពានសិទ្ធិមនុស្សទាំងស្រុង។ តាមរយៈទំព័រហ្វេសប៊ុកកាលពីថ្ងៃអាទិត្យ លោកស្រីចក់ សុភាព គូសបញ្ជាក់ថា ការប្តេជ្ញាចំពោះការគោរពសិទ្ធិមនុស្សនៅកម្ពុជានឹងមិនអាចសម្រេចបាននោះទេ ដរាបណានៅតែមានការរំលោភបំពានលើសេរីភាពមូលដ្ឋានរបស់ពលរដ្ឋ។
ចំណែក លោកស្រី Mary Lawlor អ្នករាយការណ៍ពិសេសអង្គការសហប្រជាជាតិទទួលបន្ទុកលើអ្នកការពារសិទ្ធិមនុស្សវិញតាមរយៈបណ្តាញសង្គមTwitter បានចាត់ទុកថា ការតវ៉ាដោយសន្តិវិធីមិនមែនជាបទល្មើសនោះទេ។ លោកស្រីកំពុងតាមដានស្ថានភាពនៃចាប់ខ្លួនសកម្មជនការពារបរិស្ថាននៅកម្ពុជានេះ។ ដោយឡែក ស្ថានទូតស៊ុយអ៊ែតប្រចាំនៅកម្ពុជាតាមរយៈបណ្តាញសង្គមTwitterដូចគ្នា បានសម្តែងការនូវព្រួយបារម្ភការចាប់ខ្លួន និងចោទប្រកាន់សកម្មជនការពារបរិស្ថានទាំង៣នាក់នេះ។ ស្ថានទូតស៊ុយអ៊ែតបានអះអាងថា ខ្លួនកំពុងស្វែងយល់អំពីការចាប់ខ្លួនអ្នកអនុវត្តសេរីភាពបញ្ចេញមតិ និងការប្រមូលផ្តុំនេះ ហើយស៊ុយអ៊ែតនឹងបន្តតាមដានយ៉ាងយកចិត្តទុកដាក់ដោយផ្អែកតាមគោលការណ៍ និងបទដ្ឋានសិទ្ធិមនុស្ស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ