ការធ្វើបាតុកម្មដោះលែង លោក រ៉ុង ឈុន នាំឲ្យសកម្មជន៣នាក់បន្ថែមទៀតត្រូវបានចាប់ខ្លួន
ចុះផ្សាយនៅថ្ងៃ៖
ដូចការគ្រោងទុក សកម្មជនសង្គមរាប់សិបនាក់បាននាំគ្នាដើរទៅកាន់ទីលានប្រជាធិបតេយ្យបំណងធ្វើបាតុកម្មរយៈពេលជាងមួយសប្តាហ៍ដើម្បីរកយុត្តិធម៌ជូន លោក រ៉ុង ឈុន និងសកម្មជនព្រំដែនផ្សេងទៀត។ ប៉ុន្តែការធ្វើបាតុកម្មនេះមិនបានជោគជ័យទេ ដោយសារក្រុមសមត្ថកិច្ចរាំងខ្ទប់មិនឲ្យទៅក្បែរទីលានប្រជាធិតេយ្យបានឡើយ។ ជាមួយគ្នានោះ ក៏មានយុវជនម្នាក់ទៀត ត្រូវបានចាប់ខ្លួននៅព្រឹកនេះ ខណៈសកម្មជនពីរនាក់ត្រូវបានចាប់ខ្លួនម្សិលមិញ។
យុវជនម្នាក់ទៀត ដែលត្រូវបានចាប់ខ្លួន មុនពេលទៅដល់គោលដៅនៃការធ្វើបាតុកម្មនៅទីលានប្រជាធិបតេយ្យនោះ គឺ ឈ្មោះ ថា ឡាវី។ នេះបើតាមការបញ្ជាក់របស់សកម្មជនសង្គមដែលប៉ុនប៉ងទៅធ្វើបាតុកម្មនៅទីលានប្រជាធិបតេយ្យ តែត្រូវបានអាជ្ញាធររាំងខ្ទប់នៅក្បែរចិញ្ចើញផ្លូវជាតិលេខ៥ មុនពេលទៅដល់ទីលានប្រជាធិបតេយ្យនៅខណ្ឌឬស្សីកែវ។
សូមរំឭកជូនថា យុវជន ថា ឡាវី ដែលបានចុះហត្ថលេខាលើលិខិតមួយប្រកាសជំហធ្វើបាតុកម្មនេះក៏ធ្លាប់ត្រូវបានសមត្ថកិច្ចឃាត់ខ្លួនម្តងហើយ តែដោះលែងវិញ កាលពីពាក់កណ្តាលខែសីហា ខណៈរូបគេចូលរួមទាមទារតវ៉ាឲ្យដោះលែង លោក រ៉ុង ឈុន។
មួយថ្ងៃមុនបាតុកម្មមកដល់ ពោលនៅថ្ងៃ៦កញ្ញា មានមនុស្សពីរត្រូវបានចាប់ខ្លួន គឺលោក មាន ព្រហ្មមុនី និងព្រះសង្ឃ កើត សារាយ ជាសមាជិកក្រុមខ្មែរថាវរៈ ដែលជាអ្នកប្រកាសរៀបចំបាតុកម្មនេះ។
សូមជម្រាបថា ក្រុមយុវជនដែលហៅខ្លួនឯងថា«ពលរដ្ឋសកម្ម ដើម្បីយុត្តិធម៌» បានប្រកាសជំហធ្វើបាតុកម្មរយៈពេលជាងមួយសប្តាហ៍ចាប់ពីថ្ងៃទី៧កញ្ញាតទៅ ដើម្បីរកយុត្តិធម៌ជូន លោក រ៉ុង ឈុន និងសកម្មជន៤នាក់ទៀតដែលត្រូវបានចាប់ខ្លួនពាក់ព័ន្ធនឹងការអត្ថាធិប្បាយរឿងព្រំដែន។
ប៉ុន្តែសាលារាជធានីភ្នំពេញមិនអនុញ្ញាតឲ្យធ្វើបាតុកម្មនៅទីលានប្រជាធិបតេយ្យនោះទេ ដោយសារអ្នករៀបចំ កៀងគរមនុស្សឲ្យចូលរួមលើសពីអ្វីដែលបានព្រមព្រៀងគ្នា ជាមួយអាជ្ញាធរដែលកំណត់ត្រឹមចំនួន២០០នាក់។
ជាតុល្យការ មកទល់ពេលនេះ មានសកម្មជនសង្គមជិត១០នាក់ហើយដែលត្រូវបានចាប់ខ្លួនជាបន្តបន្ទាប់ ខណៈពួកគេតវ៉ាទាមទារឲ្យដោះលែង លោក រ៉ុង ឈុន។ សកម្មជនទាំងនោះ រួមមាន កញ្ញា ឈឿន ដារ៉ាវី លោក ហ៊ុន វណ្ណៈ កញ្ញា ស កន្និកា លោក មាន ព្រហ្មមុនី លោក ថា ឡាវី ព្រះតេជគុណ កើត សារាយ ជាសមាជិកនៃក្រុមខ្មែរថាវរៈ និងលោក សួង សោភ័ណ្ឌ ប្រធានគណបក្សខ្មែរឈ្នះជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ