អ្នកចម្រៀងរ៉េបម្នាក់ត្រូវបានឃុំខ្លួន បន្ទាប់ពីចេញបទ«ដីខ្មែរ» ទាក់ទងរឿងព្រំដែន
ចុះផ្សាយនៅថ្ងៃ៖
ម្ចាស់បទចម្រៀងរ៉េប «ដីខ្មែរ» ដែលមានអត្ថន័យទាក់ទងនឹងរឿងព្រំដែន ត្រូវបានតុលាការខេត្តសៀមរាបសម្រេចឃុំខ្លួនក្រោមបទ«ញុះញង់ឱ្យប្រព្រឹត្តបទឧក្រិដ្ឋជាអាទិ៍» បន្ទាប់ពីបានចាប់ខ្លួនកាលពីចុងសប្តាហ៍មុន។ សំណុំរឿងព្រំដែននេះដែលមានសកម្មជនខ្មែរយ៉ាងតិច១០នាក់ហើយត្រូវបានចាប់ឃុំខ្លួនជាបន្តបន្ទាប់ក្រោយពីការចាប់ខ្លួនលោក រ៉ុង ឈុន។
យុវជន គា សុគុណ គឺម្ចាស់បទចម្រៀងរ៉េប«ដីខ្មែរ» ត្រូវបានបុរស៥នាក់សម្លៀកបំពាក់ស៊ីវិលហៅចេញពីផ្ទះក្នុងខេត្តសៀមរាបកាលពីថ្ងៃទី៤ ខែកញ្ញា ដោយសន្យាផ្ដល់ប្រាក់៤០០ដុល្លារក្នុងមួយថ្ងៃ។ ប៉ុន្តែមិនដូចអ្វីដែលបានសន្យាឡើយ គឺបុរសស្លៀកពាក់ស៊ីវិលទាំងនោះ គឺជាសមត្ថកិច្ចដែលចូលមកនាំខ្លួនរូបគេទៅកាន់ស្នងការនគរបាលខេត្តដើម្បីសួរនាំរឿងចេញបទចម្រៀងដ៏រសើបមួយនេះ។ នេះបើតាមក្រុមគ្រួសារយុវជនអាយុ២២ឆ្នាំរូបនេះ។
ម្ចាស់បទចម្រៀងរ៉េបខ្មែររូបនេះ បានចេញបទចម្រៀងជាច្រើនមកហើយដោយផ្សាយតាមបណ្តាញសង្គមយូធូបដែលធ្វើឲ្យរូបល្បីល្បាញក្នុងឆ្នាំ២០២០នេះ។ បទចម្រៀងចុងក្រោយដែលយុវជនរូបនេះតាក់តែងឡើងគឺបទ«ដីខ្មែរ»ដែលមានអត្ថន័យទាក់ទងនឹងរឿងព្រំដែន។
បទចម្រៀងរ៉េប «ដីខ្មែរ» នេះមានរយៈពេល៣នាទី និង២៦វិនាទី ត្រូវបានបង្ហោះចូលយូធូបឈ្មោះ KEA SOKUN កាលពីថ្ងៃទី២៦ ខែមេសាឆ្នាំ២០២០ ដែលមានអ្នកចូលទស្សនាជាង៣០ម៉ឺនដង។ បើតាក្រុមគ្រួសារគាត់ យុវជន គា សុគុណ បានឈប់រៀនតាំងពីថ្នាក់ទី៩ ហើយចាប់ផ្ដើមនិពន្ធបទចម្រៀងនិងច្រៀងខ្លួនបង្ហោះតាមយូធូបដើម្បីរកប្រាក់ចំណូល។
គួរជម្រាបជូនថា សំណុំរឿងព្រំដែននេះ តាំងពីក្រោយចាប់ខ្លួនលោក រ៉ុង ឈុន មក គឺមានយុវជនដែលជាសកម្មជនសង្គមយ៉ាងហោចណាស់៩នាក់ផ្សេងទៀតត្រូវបានចាប់ឃុំខ្លួនជាបន្តបន្ទាប់ ខណៈពួកគេធ្វើការតវ៉ាទាមទារឲ្យដោះលែង លោក រ៉ុង ឈុន។ សកម្មជនទាំងនោះរួមមាន៖ លោក សួង សោភ័ណ្ឌ ប្រធានគណបក្សខ្មែរឈ្នះ កញ្ញា ឈឿន ដារ៉ាវី លោក មាន ព្រហ្មមុនី លោក ហ៊ុន វណ្ណៈ កញ្ញា ស កន្និកា លោក ថា ឡាវី កញ្ញា អេង ម៉ាឡៃ ព្រះតេជគុណ កើត សារាយ ជាសមាជិកនៃក្រុមខ្មែរថាវរៈ និងលោក គា សុគុណ ម្ចាស់បទចម្រៀងរ៉េប«ដីខ្មែរ»៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ