សង្គមស៊ីវិលព្រួយបារម្ភពីការប្រើប្រាស់បទចោទ «ញុះញង់» ដើម្បីបំបិទសិទ្ធិសេរីភាពនៃការបញ្ចេញមតិនៅកម្ពុជា
ចុះផ្សាយនៅថ្ងៃ៖
បណ្តុំអង្គការសង្គមស៊ីវិលចំនួន ៣៥ នៅកម្ពុជា បានចេញសេចក្តីថ្លែងការណ៍មួយកាលពីល្ងាចថ្ងៃទី ០៩ កញ្ញា ដោយអំពាវនាវអោយអាជ្ញាធររដ្ឋាភិបាលកម្ពុជាដោះលែងសកម្មជន ដែលត្រូវបានចាប់ខ្លួនជាបន្តបន្ទាប់ ក្នុងមួយរយៈពេលចុងក្រោយនេះ។ តាមរយៈសេចក្តីថ្លែងការណ៍ ក្រុមអង្គការសង្គមស៊ីវិល បានបង្ហាញការសោកស្តាយ និងព្រួយបារម្ភយ៉ាងខ្លាំង អំពីការប្រើប្រាស់បទល្មើស «ញុះញង់» ដោយអាជ្ញាធរ ដើម្បីបំបិទសិទ្ធិសេរីភាពនៃការបញ្ចេញមតិ និងចូលរួមក្នុងការដោះស្រាយបញ្ហាសង្គមនៅកម្ពុជា។ តើអ្វីជាបទល្មើសញុះញង់?
បើតាមការកត់សំគាល់របស់ក្រុមអង្គការសង្គមស៊ីវិល ចាប់តាំងពីមានយុទ្ធនាការទាមទារអោយមានការដោះលែងលោក រ៉ុង ឈុន កាលពីខែសីហាមក យ៉ាងហោចណាស់យុវជននិងសកម្មជនសិទ្ធិមនុស្សចំនួន១០នាក់ហើយ ដែលត្រូវបានអាជ្ញាធរកម្ពុជាចាប់ឃុំខ្លួននិងចោទប្រកាន់ពីបទ «ញុះញង់អោយប្រព្រឹត្តបទឧក្រិដ្ឋជាអាទិ៍ ឬញុះញង់អោយមានភាពវឹកវរដល់សង្គម»តាមមាត្រា៤៩៤ និង៤៩៥ នៃក្រមព្រហ្មទណ្ឌកម្ពុជា។ ក្នុងនោះ យុវជន៧នាក់ ត្រូវបានចាប់ខ្លួនជាបន្តបន្ទាប់រួមមាន លោក ថា ឡាវី កញ្ញា អេង ម៉ាឡៃ កញ្ញា ឡុង គន្ធា កញ្ញា ភួន កែវរស្មី លោក ថុន រដ្ឋា។ អ្នកទាំងនេះ ត្រូវបានតុលាការចោទប្រកាន់ពីបទ «ញុះញង់អោយប្រព្រឹត្តបទឧក្រិដ្ឋជាអាទិ៍ ឬ ញុះញង់អោយមានភាពវឹកវរដល់សង្គម» តាមមាត្រា៤៩៤ និង៤៩៥ នៃក្រមព្រហ្មទណ្ឌកម្ពុជា។
សេចក្តីថ្លែងការណ៍របស់ក្រុមអង្គការសង្គមស៊ីវិលទាំង៣៥ស្ថាប័ននោះ បានសំដែងការសោកស្តាយ និងព្រួយបារម្ភយ៉ាងខ្លាំងអំពីការប្រើប្រាស់បទល្មើសញុះញង់នេះ ដើម្បិបំបិទសិទ្ធិសេរីភាពនៃការបញ្ចេញមតិ និងចូលរួមក្នុងការដោះស្រាយបញ្ហាសង្គមនៅកម្ពុជា។ បណ្តុំអង្គការសង្គមស៊ីវិលទាំង៣៥ ក៏បានអំពាវនាវអោយអាជ្ញាធររដ្ឋទម្លាក់ចោលបទចោទប្រកាន់ទាំងនោះ និងសូមអោយបញ្ឈប់ការបំភិតបំភ័យ និងបង្ក្រាបលើក្រុមយុវជនដែលជាសម្មជនសិទ្ធិមនុស្ស និងបរិស្ថានទាំងនេះ។
យ៉ាងណាក្តី សម្រាប់លោកមេធាវី សុខ សំអឿន ការបកស្រាយនិយមន័យនេះ គឺវាអាស្រ័យទៅលើតុលាការ។ ប៉ុន្តែបើតាមការយល់ឃើញរបស់លោក ការញុះញង់ អាចកើតចេញជាបទល្មើស លុះត្រាតែបុគ្គលណាមួយ បាននិយាយអោយមនុស្សណាម្នាក់ប្រព្រឹត្តបទឧក្រិដ្ឋអ្វីមួយច្បាស់លាស់ ឧទាហរណ៍ ជំរុញអោយសម្លាប់ ឬជំរុញអោយប្រើអំពើហិង្សាទៅលើបុគ្គលណាឬក្រុមណាមួយជាដើម។ យ៉ាងណាក្តី បើតាមលោកមេធាវី ប្រសិនបើការនិយាយអ្វីសុទ្ធសឹងតែជាការញុះញង់នោះ នោះសិទ្ធិបញ្ចេញមតិនឹងមិនមានទៀតឡើយ។
ប៉ុន្តែសម្រាប់លោក ជិន ម៉ាលីន រដ្ឋលេខាធិការនិងជាអ្នកនាំពាក្យក្រសួងយុត្តិធម៌បានថ្លែងថា ការចោទប្រកាន់មិនអាចសន្និដ្ឋានដោយភ្នែកទទេនោះទេ។ បើតាមលោក ជិន ម៉ាលីន ការចោទប្រកាន់របស់អាជ្ញាធរ គឺដោយផ្អែកលើសកម្មភាពនៅពីក្រោយនៃសកម្មភាពរបស់ពួកគេ ថាតើ សកម្មភាពរបស់ពួកគេមានអង្គការចាត់តាំងនៅពីក្រោយឬទេ? និងថា តើសកម្មភាពរបស់ពួកគេមានចេតនាដើម្បីតស៊ូមតិពិតប្រាកដមែន ឬ មានបំណងដើម្បីប្រព្រឹត្តបទល្មើសអ្វីផ្សេងទៅវិញ? យ៉ាងណាក្តី លោក ជិន ម៉ាលីន បានជំរុញអោយក្រុមអង្គការសង្គមស៊ីវិល និងភាគីពាក់ព័ន្ធចូលរួមតស៊ូក្តីនៅក្នុងតុលាការ ជាជាងការចេញសេចក្តីថ្លែងការណ៍ដែលមិនអាចជួយអ្វីដល់ពួកគេនោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ