កម្ពុជាស្នើអាស៊ានឱ្យបង្កើត«ច្រករបៀងធ្វើដំណើរ»ដើម្បីសម្រួលដំណើរធុរកិច្ចក្នុងពេលវាយលុកដោយជំងឺកូវីដ១៩
ចុះផ្សាយនៅថ្ងៃ៖
រដ្ឋមន្រ្តីការបរទេសនៃប្រទេសសមាជិកអាស៊ានកាលពីថ្ងៃទី០៩ និងទី១០ ខែសីហាបានជួបប្រជុំគ្នាលើកទី៥៣តាមរយៈវីដេអូខុនហ្វើរ៉េនដែលរៀបចំឡើងដោយប្រទេសវៀតណាម។ ក្នុងចំណោមប្រធានបទជាច្រើន បញ្ហារីករាលដាលនៃជំងឺកូវីដ១៩ នៅតែជាប្រធានបទក្តៅដែលកិច្ចប្រជុំរដ្ឋមន្រ្តីការបរទេសអាស៊ាននេះមិនអាចមើលរំលងបាន។ ចំពោះមុខបញ្ហាកូវីដ១៩ រដ្ឋមន្រ្តីការបរទេសកម្ពុជាលោកប្រាក់ សុខុនបានស្នើទៅអាស៊ានឱ្យបង្កើត«ច្រករបៀងធ្វើដំណើរ» ដើម្បីសម្រួលដល់ដំណើរធុរកិច្ចនៅក្នុងតំបន់នេះ។
នៅក្នុងកិច្ចប្រជុំរដ្ឋមន្រ្តីការបរទេសអាស៊ានលើកទី៥៣ រដ្ឋមន្រ្តីការបរទេសអាស៊ានបានសង្កត់ធ្ងន់លើសារៈសំខាន់ក្នុងការស្តារសេដ្ឋកិច្ចក្រោយពីជំងឺរាតត្បាតកូវីដ-១៩ ដោយកិច្ចសហប្រតិបត្តិការត្រូវបានផ្តោតទៅលើការទទួលបានវ៉ាក់សាំងសម្រាប់ជំងឺកូវីដ-១៩ដែលមានតម្លៃសមរម្យ ការគាំទ្រសហគ្រាសធុនតូចនិងមធ្យម ការលើកលែងការរឹតត្បិត ការធ្វើដំណើរដែលចំាបាច់នៅក្នុងតំបន់ និងការចុះហត្ថលេខាលើកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់(RCEP)ឱ្យបានឆាប់ក្នុងឆ្នាំនេះ។ នេះបើតាមការបញ្ជាក់ឱ្យដឹងរបស់ក្រសួងការបរទេសកម្ពុជានៅក្នុងសេចក្តីប្រកាសព័ត៌មាននៅថ្ងៃទី១០ ខែកញ្ញា។
បន្ថែមលើនេះ រដ្ឋមន្រ្តីការបរទេសអាស៊ានក៏បានពិភាក្សាគ្នាពីភាពចាំបាច់នៃការតភ្ជាប់តំបន់ ជាពិសេស ការរក្សាខ្សែចង្វាក់ផ្គត់ផ្គង់លំហូរដោយសេរីនៃពាណិជ្ជកម្ម និងការផ្គត់ផ្គង់ទំនិញសំខាន់ៗ ការវិនិយោគ និងការបំលាស់ទីរបស់ប្រជាជនក្នុងចំណោមប្រទេសសមាជិកអាស៊ាន និងប្រទេសដៃគូសន្ទនា។ គឺនៅត្រង់ចំណុចនេះហើយ រដ្ឋមន្រ្តីការបរទេសកម្ពុជាលោកប្រាក់ សុខុន បានស្នើអាស៊ានឱ្យធ្វើការងារឈានទៅរកការបង្កើត«ច្រករបៀងធ្វើដំណើរ»ឬTravel Corridor ដើម្បីជួយសម្រួលដល់ការធ្វើដំណើរធុរកិច្ច ប្រកបដោយសុវត្ថិភាព និងជាបណ្តើរៗ ក្នុងអំឡុងពេលនៃការរាតត្បាតជំងឺ
កូវីដ-១៩ ហើយត្រូវរៀបចំជាផែនការសកម្មភាពជាក់ស្តែងមួយឱ្យបានឆាប់រហ័ស។
សូមកត់សម្គាល់ថា ការស្នើឡើងរបស់រដ្ឋមន្រ្តីការបរទេសកម្ពុជានេះ គឺជាវិធានការថ្មីមួយទៀតសម្រាប់តំបន់អាស៊ាន ដើម្បីដោះស្រាយដំណើរការផ្នែកពាណិជ្ជកម្មរវាងប្រទេសនៅក្នុងតំបន់អាស៊ាននេះ។ ថ្មីៗនេះ អាស៊ានក៏បានបង្កើតនូវមូលនិធិអាស៊ានឆ្លើយតបទៅនឹងជំងឺកូវីដ-១៩ និងការស្តុកបម្រុងសម្ភារវេជ្ជសាស្ត្រក្នុងតំបន់អាស៊ានសម្រាប់ភាពបន្ទាន់ផ្នែកសុខភាពសាធារណៈ។ ចិន ជប៉ុន និងកូរ៉េខាងត្បូងក៏បានប្រកាសគាំទ្រនូវការបង្កើតមូលនិធិនិងស្តុកបម្រុងនេះដែរ។
សម្រាប់រដ្ឋមន្រ្តីការបរទេសកម្ពុជា ដៃគូខាងក្រៅរបស់អាស៊ាន គឺមានតួនាទីសំខាន់ណាស់ក្នុងការកៀរគធនធានបន្ថែម ដើម្បីគាំទ្រដល់មូលនិធិអាស៊ានប្រឆាំងជំងឺកូវីដ-១៩នេះ និងសម្រាប់សកម្មភាពទប់ស្កាត់បន្ទាន់ចំពោះភាពអាសន្នសុខភាពសាធារណៈផ្សេងៗទៀតក្នុងតំបន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ