បទយកការណ៍

ស្នេហាភេទដូចគ្នា៖ ស្ដ្រីចំណាស់ពីររូបតស៊ូស្រឡាញ់គ្នា៤០ឆ្នាំរហូតមានការទទួលស្គាល់

សំឡេង ០៨:២៧
អ្នកស្រី ហ៊ន ឈឿន(ឆ្វេង) និងស្វាមីភេទដូចគ្នា លោក ចន(ស្តាំ)
អ្នកស្រី ហ៊ន ឈឿន(ឆ្វេង) និងស្វាមីភេទដូចគ្នា លោក ចន(ស្តាំ) © សហការី

រាប់​ចាប់​តាំង​បិទ​បញ្ចប់​សង្គ្រាម​ខ្មែរ​ក្រហម​នៅ​រវាង​ឆ្នាំ​១៩៧៩​ដល់​១៩៨៥ ស្រ្តី​ពីរ​នាក់​បាន​បង្កើត​ស្នេហាជាមួយគ្នា​ដែល​បច្ចុប្បន្ន​ហៅ​ថា អ្នក​ស្រឡាញ់​ភេទ​ដូច​គ្នា។ តាមរយៈ​នាទី​បទយកការណ៍​របស់ អេង គីមហុង នៅរាត្រីនេះ ស្ត្រី​វ័យ​ចំណាស់​ទាំង​ពីរ​បាន​លើក​ឡើង​ថា ៤០​ឆ្នាំ​នៃ​ទំនាក់ទំនង​ស្នេហា​របស់​គាត់មក​ដល់​ពេល​នេះ​មិនមែន​ជា​រឿង​ងាយ​ស្រួល​ឡើយ ទម្រាំ​សន្សំ​បាន​ប្រាក់ធ្វើ​ផ្ទះ​សមរម្យមួយ តាមរយៈរបរ​នេសាទ។ មុន​មាន​ផ្ទះ​នៅលើ​ដី​សម្រាប់​រស់​នៅ ពួក​គាត់​បាន​រស់​នៅ​លើ​ផ្ទៃ​ទឹក​តាម​រយៈ​ទូក​នេសាទ​មួយបន្លាស់​ទី​ពី​ស្ទឹងសែន​ដល់​ទន្លេសាប។

ផ្សាយពាណិជ្ជកម្ម

ទឹក​អើយ​ទឹក​ហូរ ហូរ​មិន​ចេះ​ដាច់ ឲ្យ​ខ្ញុំ​មិន​ភ្លេច​អនុស្សាវរីយ៍ ស្ទឹងសែន​តែ​មួយ​មិន​ដែល​មាន​ពីរ ស្ទឹង​សែនប៉ារីស ក៏​មិន​ដូច​ដែរ…..។»នេះ​ឃ្លា​មួយ​នៃ​បទ​ចម្រៀង​ស្ទឹងសែន​ប៉ារីស​ត្រូវ​បាន​ច្រៀង​ពេល​នេះ​ដោយអ្នក​ស្រី​ហ៊ន ឈឿន ។ «ខ្ញុំ​ស្រឡាញ់​បទ​នេះ​ណាស់ ព្រោះ​ស្ទឹងសែន​ជួយ​ចិញ្ចឹម​ជីវិត​ខ្ញុំ តាំង​តែ​ពី​ខ្ញុំ​កើតរហូត​ដល់​ខ្ញុំ​ជួប​ដៃ​គូ​ជីវិត​ជា​ស្រី​ដូច​គ្នា ហើយ​ពួក​យើង​ចាប់​ដៃ​គ្នា​ប្រកប​របរ​នេសាទ​តាម​រយៈស្ទឹងសែននេះ ទើប​ធ្វើ​ឲ្យ​យើង​មាន​ផ្ទះ​រស់​នៅ​សមរម្យ​មួយ​ជំនួស​ឲ្យ​ផ្ទះ​ចា​ស់។»

 

ស្ទឹងសែននៃខេត្តកំពង់ធំ ធ្លាប់ជាប្រភពចំណូលរបស់ប្តីប្រពន្ធយាយឈឿន តាចន
ស្ទឹងសែននៃខេត្តកំពង់ធំ ធ្លាប់ជាប្រភពចំណូលរបស់ប្តីប្រពន្ធយាយឈឿន តាចន © សហការី

 

នៅ​ក្នុង​វ័យ​ជាង​៦០​ឆ្នាំ​អ្នក​ស្រី ហ៊ន ឈឿន ត្រូវបាន​ក្រុម​ការងារ​សហគមន៍​ឥន្ទធនូ​កម្ពុជា​ហៅ​គាត់​ថា ម៉ែឈឿន ខណៈ​ដៃ​គូ​របស់​គាត់​ស្ត្រី​ដែល​នោះ​ត្រូវ​បាន​ក្រុម​ការងារ​ដដែល​ហៅ​ថាឪចន។  អ្វី​ជា​ការ​កត់សម្គា​ល់ ​ពួក​គេ​រាប់​អាន​គ្នា​ដូច​ម្ដាយ​ឪពុក​និងកូន តាមរយៈ​កាយ​វិការ​ស្និទ្ធស្នាល បារម្ភ និង​យក​ចិត្ត​ទុក​ដាក់ពី​គ្នា​ទៅ​វិញ​ទៅ​មក។

មាន​វ័យ​ជាង​៧០​ឆ្នាំ​តាចន ដែល​ហៅ​តាម​ទម្លាប់​អ្នកភូមិ គឺ​ជា​ប្ដី​យាយ​ឈឿន បាន​តែង​ខ្លួន​ជា​មនុស្សប្រុស​ដោយ​កាត់​សក់​ខ្លី និង​ពាក់​អាវ​ដៃ​ខ្លី​ចំហរ​ឡេវ​បាន​រៀប​រាប់​ថា ​កាល​ពី​នៅ​មាន​កម្លាំង​គាត់​ធ្វើ​ការងារគ្រប់​យ៉ាង​ដើម្បី​ចិញ្ចឹម​ជីវិត «បន្ទាប់​ពី​ចាប់​ដៃ​គ្នា​ជា​មួយ​យាយ​ឈឿន​មក ខ្ញុំ​ពីរ​នាក់​ធ្វើ​គ្រប់​យ៉ាង​ទាំង​អស់ដូច​ជា៖ ដាក់​មង​រក​ត្រី កាប់​អុស ឆ្អើរត្រី ហើយ​បើ​យើង​ធ្វើ​ប្រហុក​វិញ ធ្វើ​នៅ​ហ្នឹង​ដេក​នៅ​ហ្នឹង​តែ​ម្ដង! ព្រោះ​ប្រហុក​នេះ​ប្រៀប​ដូច​ជា​លុយ​យើង​អ៊ីចឹង! ទើប​យើង​មាន​លុយ​ធ្វើ​ផ្ទះ​នៅ​ដូច​រាល់​ថ្ងៃ​នេះ។»

សូម​ជម្រាប​ជូនថា ផ្ទះ​ដែល​ពួកគាត់​ទាំង​ពីរ​កំពុង​រស់​នៅ​ស្នាក់​អាស្រ័យ​នេះ  ជា​ប្រភេទ​ផ្ទះ​ថ្ម​ទៀម​ធ្វើផ្ទាល់​នឹ​ងដី​ដោយ​មាន​ទំហំ​សម​ល្មម និង​ទើប​បញ្ចប់​ការ​សាង​សង់​នៅ​ចុង​ឆ្នាំ​២០១៩ ​ជាមួយ​នឹង​ការចំណាយ​អស់​៤ពាន់​ដុល្លារ។

ផ្ទះរបស់យាយឈឿន របស់តាចន ដែលទើបសាងសង់ នៅចុងឆ្នាំ២០១៩
ផ្ទះរបស់យាយឈឿន របស់តាចន ដែលទើបសាងសង់ នៅចុងឆ្នាំ២០១៩ © សហការី

អ្នកនាង ជ័យ សុខដុម អ្នក​តស៊ូ​ផ្នែក​ច្បាប់​របស់​សហគមន៍​ឥន្ទធនូ​កម្ពុជា (រ៉ក) លើក​ឡើង​ថា ជីវភាព​រស់នៅ​របស់​អ្នក​ស្រឡាញ់​ភេទ​ដូច​គ្នា​មាន​ភាព​សមរម្យ​ដូច​គេ​ដូច​ឯង​ដែរ។ «ជាក់ស្ដែង​គ្រួសារ​របស់​ម៉ែឈឿ​ន និង​តាចន មាន​ជីវភាព​សមរម្យ រស់​នៅ​ជាមួយ​គ្នា​ជាង​៤០​ឆ្នាំ ដោយ​ការ ខិតខំ ប្រឹងប្រែង តស៊ូ ពួត​ដៃ​គ្នា ។ ទំាង​អស់​នេះ​ហើយ យើង​កោត​សរសើរ និង​ស្ងប់ស្ងែង​ចំពោះ​គ្រួសារ​មួយ​នេះ។»

 

អ្នកនាង ជ័យ សុខដុម អ្នកតស៊ូផ្នែកច្បាប់របស់សហគមន៍ឥន្ទធនូកម្ពុជា (រ៉ក)
អ្នកនាង ជ័យ សុខដុម អ្នកតស៊ូផ្នែកច្បាប់របស់សហគមន៍ឥន្ទធនូកម្ពុជា (រ៉ក) © សហការី

 

អ្នកនាង ជ័យ សុខដុម បានបន្តថា បើ​និយាយ​ជាទូទៅ​ចំពោះ​កម្រិត​ជីវភាព​អ្នក​ស្រឡាញ់​ភេទ​ដូច​គ្នាដែល​ជា​សមាជិក​របស់​រ៉ក ជីវភាព​របស់​ពួកគាត់​កាន់​តែ​ល្អ​ប្រសើរ​នៅ​ពេល​ដែល​មាន​ការ​គាំទ្រ​ពី​ឪពុកម្ដាយ ក្រុមគ្រួសារ និងសង្គម។ «ព្រោះ​នៅ​ពេល​ដែល​ឪពុក​ម្ដាយ ស្រឡាញ់ លើក​ទឹក​ចិត្ត​កូន​ធ្វើ​ឲ្យ​កូនមាន​ភាព​កក់ក្ដៅ និង​ពោរពេញ​ដោយ​កំលាំង​ចិត្ត​ក្នុង​ការ​ធ្វើ​ការ​ រកស៊ី ដើម្បី​ផ្គត់ផ្គង់​ជីវភាព​របស់​ខ្លួន និងមួយ​ផ្នែក​ទៀត​ក៏​ចូល​រួម​ចំណែក​អភិវឌ្ឍ​សេដ្ឋកិច្ចជាតិ​ផងដែរ។»

លោកយាយឈឿន នៅខាងមុខស្ទឹងសែន
លោកយាយឈឿន នៅខាងមុខស្ទឹងសែន © សហការី

ងាក​មក​ចាប់​អារម្មណ៍​ពី​ការ​កកើត​ឡើង​នៃ​សេចក្ដី​សេ្នហា​របស់​អ្នក​ទាំង​ពីរ​វិញ​ម្ដង អ្នក​ស្រី​ហ៊ន ឈឿន នៅ​ក្នុង​ភូមិ​ដែល​គេ​នាំ​គ្នា​ហៅ​គាត់​តាម​ក្មេង​តូចៗ​ថា យាយ​ឈឿន​នោះ​បាន​រៀបរាប់​ក្នុង​សំឡេង​ស្អក​ថា ក្ដី​ស្រឡាញ់​របស់​គាត់​ចំពោះ​មនុស្ស​ស្រី​ដូច​គ្នា កើត​ឡើង​មក​ពី​គ្មាន​និស្ស័យ​ស្រឡាញ់​មនុស្ស​ប្រុស។ ហើយ​សម្រាប់​គាត់ ក្ដី​ស្រឡាញ់​នេះ​មិន​មែន​ជា​ការ​ទទួល​ឥទ្ធិល​សង្គម​មក​ពី​ខាង​ក្រៅ​ណា​ទេ គឺ​ខ្លួន​ឯង​តែម្ដង ព្រោះ​កាល​ពី​ជំនាន់​នៅ​វ័យ​ជំទង់​នៅ​ឆ្នាំ​៨០​ជាង មិន​ទាន់​ទំនើប​ដូច​សម័យ​បច្ចុប្បន្ន​ឡើយ។ «មួយផ្នែក​អាច​ថា ខ្ញុំ​ឃើញ​ស្នេហា​ស្រី​និង​ប្រុស​គឺ​គូ​ខ្លះ​ឃើញ​តែ​វាយ​តប់​គ្នា ជេរ​ប្រទេច​គ្នា​ទៅ​វិញ​ទៅ​មក​ ដល់ថ្នាក់​ខ្ញុំ​ជួយ​ឃាត់​ទៀត​ផង ម្ល៉ោះ​ហើយ​បាន​ជា​ខ្ញុំ​គ្មាន​អារម្មណ៍​ស្រឡាញ់​មនុស្ស​ប្រុស​ទេ ហើយ​បែរ​ជា​ជួបគាត់​ចៃដ​ន្យ (តាឈឿន) បែរ​ជា​មាន​និស្ស័យ​ទៅ​វិញ។»

ជាការពិត ពីមុនឬឥលូវ ស្នេហា​ភេទ​ដូច​គ្នា​តែង​រង​ការ​ជំទាស់​ជា​មុន​សិន ទើប​មាន​ការ​ទទួល​ស្គាល់​តាមក្រោយ។«ឪពុក​ម្ដាយ​ខ្ញុំ​អត់​ពេញ​ចិត្ត​ទេ គាត់​បាន​បំបែក​និង​ថា​ឲ្យ​ខ្ញុំ​ទៀត​ផងថា កូន​ឯង​ស្រឡាញ់​ស្រី​និងស្រី​បែប​នេះ​មាន​អី​បន្ត​ពូជ បើ​ម៉ែ​កូន​ស្រី​តែ​២​នាក់​ហ្នឹង។  ហើយ​សូម្បី​គេ​ដឹង​ថា ខ្ញុំ​ស្រឡាញ់​ស្រី​និងស្រឡាញ់​ស្រី​ហើយ នៅ​មាន​គេ​ចូល​ដណ្ដឹង​ទៀត»។

នៅ​ទី​បំផុត កត្តា​ពេល​វេលា​បាន​ធ្វើ​ឲ្យ​ឪពុក​ម្ដាយ​អ្នក​ស្រី​ឈឿន​ទទួល​ស្គាល់​ជីវិត​គូ​របស់​កូន​ស្រី​មុន​ពេលគាត់​ទទួល​មរណភាព។ «គាត់​ឃើញ​យើង​រឹង​មាំ គាត់​បាន​ពោល​ពាក្យ​ថា ម៉ែ​អស់​ចិត្ត​ហើយ​កូន​ថែរ​ក្សាគ្នា​ចុះ ​ហើយ​ម៉ែ​ក៏​មិន​បាន​នៅ​ថែរក្សា​កូន​បាន​មួយ​ជីវិត​ដែរ។»

លោកជីវ គឹមអ៊ុន ចៅ​សង្កាត់​អូរ​គន្ធរ​នៃ​ក្រុង​ស្ទឹង​សែន ខេត្តកំពង់ធំ ឲ្យដឹងថា បច្ចុប្បន្ន​អ្នក​ស្រឡាញ់​ភេទដូច​គ្នា​នៅ​ក្នុង​សង្កាត់​របស់​គាត់​មាន​ចំនួន​៣​គូ។   មែនទែន​ទៅ​លោកចៅ​សង្កាត់​គឹមអ៊ុន ជា​មិត្ត​ភក្តិ​របស់យាយ​ឈឿន​ទៀត​ផង ទាំង​ពេល​អតីតកាល និងបច្ចុប្បន្ន ។ «ក្នុង​នាម​ជា​អាជ្ញាធរ ខ្ញុំ​មើល​ទៅ​គ្រួសារយាយ​ឈឿន តាចន ម្យ៉ាងដែរ អត់​ដែល​ឈ្លោះ​គ្នា ដល់​អ៊ីចឹង! ញាតិ​ក្នុង​ភូមិ​មើល​មក​គេ​ឲ្យ​តម្លៃ​គាត់​តាមហ្នឹង ហើយ​វា​ជា​រឿង​ធម្មតា​ទេ ការ​រិះគន់​រើសអើង ពី​មជ្ឈដ្ឋាន​ជុំវិញ​ខ្លួននោះ  ប៉ុន្តែ​អ្វីៗ​នឹង​ប្រែប្រួល​លែងរើស​អើង បើ​យើង​ចេះ​ឲ្យ​តម្លៃ​លើ​ខ្លួន​ឯង មិន​ថា​អ្នក​ស្រឡាញ់​ភេទ​ដូច​គ្នា​ឬ​ផ្ទុយ​គ្នា។»

 

លោកជីវ គឹមអ៊ុន ចៅសង្កាត់អូរគន្ធរនៃក្រុងស្ទឹងសែន ខេត្តកំពង់ធំ
លោកជីវ គឹមអ៊ុន ចៅសង្កាត់អូរគន្ធរនៃក្រុងស្ទឹងសែន ខេត្តកំពង់ធំ © សហការី

 

នៅ​ចំពោះ​មុខ​អ្នក​ស្រឡាញ់​ដូចគ្នា លោកជីវ គឹមអ៊ុន យល់ថា គេ​មិន​អាច​សន្មត់​ដោយ​អារម្មណ៍​ថា អ្នកស្រឡាញ់​ដូច​គ្នា​កំពុង​សាង​កំហុស​បាន​ទេ។ «យើង​សាក​គិត​លើ​និស្ស័យ​របស់​មនុស្ស ហើយ​អ្វី​ដែលសំខាន់​ពួក​គេ​មិន​បាន​ធ្វើអ្វី​ប៉ះ​ពាល់​សង្គម​ផង។»

សូម​បញ្ជាក់​ជូន​ថា ជំ​នួស​ឲ្យ​ការ​ចុះ​អេតា​ស៊ីវិល អ្នក​ស្រឡាញ់​ភេទ​ដូច​គ្នា​កំពុង​ប្រើប្រាស់​យន្តការ​នៃ​ការចុះ​សេចក្ដីថ្លែងទំនាក់ទំនងគ្រួសារដោយមានការទទួលស្គាល់ពីឪពុកម្ដាយ និងការដឹងឮពីអាជ្ញាធរសម្រាប់ទំនាក់ទំនងរបស់ពួកគេ។ បើ​តាម​សហគមន៍​ឥន្ទធនូ​កម្ពុជា (រ៉ក) បច្ចុប្បន្ន អ្នក​ស្រឡាញ់​ភេទ​ដូច​គ្នា​មានចំនួន​ជាង​២ពាន់​គូ​នៅ​កម្ពុជា

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI