កម្ពុជា-សង្គម

ក្រសួងសុខាភិបាល៖ ព្រះសង្ឃជាង ១២០អង្គ មានអាពាធជំងឺផ្តាសាយធំ តែត្រូវបានព្យាបាលជាសះស្បើយជិតអស់ហើយ

ព្រះសង្ឃនិមន្តពាក់ម៉ាស តាមទីសាធារណៈ
ព្រះសង្ឃនិមន្តពាក់ម៉ាស តាមទីសាធារណៈ AP - Heng Sinith

មាន​ព្រះសង្ឃ​ចំនួន​ជាង​ ១២០​អង្គ គង់​ក្នុង​វត្ត​នៅ​តាម​ខេត្ត​ចំនួន​ ៤ ​រួម​មាន​តាកែវ​ ត្បូងឃ្មុំ​ បាត់ដំបង​ និង​បន្ទាយមានជ័យ ​មាន​អាពាធ​ជំងឺ​ផ្តាសាយ​ធំ​ ក្នុង​អំឡុង​ខែ​សីហា និង​ខែ​កញ្ញា​ថ្មីៗ​នេះ​។ នេះ​បើ​តាម​ការ​ឲ្យ​ដឹង​ពី​អ្នក​នាំ​ពាក្យ​ក្រសួង​សុខាភិបាល​ លោក​ស្រី ឱ វណ្ណឌីន នៅ​ព្រឹក​ថ្ងៃ​ពុធ​នេះ ​ដោយ​បញ្ជាក់​បន្ថែម​ថា​ មក​ដល់​ពេល​នេះ​ ព្រះសង្ឃ​ដែល​អាពាធ ​ហើយ​ធ្លាប់​មាន​ចេញ​អាការៈ​គួរ​ឲ្យ​សង្ស័យ​ទាំងនេះ ​ត្រូវ​បាន​ព្យាបាល​ឲ្យ​ជា​សះស្បើយ​ជិត​អស់​ហើយ​។

ផ្សាយពាណិជ្ជកម្ម

លោក​ស្រី ឱ វណ្ណឌីន រដ្ឋលេខាធិការ  និងជាអ្នកនាំពាក្យក្រសួងសុខាភិបាល បានឲ្យ​ដឹងនៅ​ថ្ងៃទី ១៦ខែកញ្ញាថា ការផ្ទុះឡើងនូវការ​ឆ្លងជំងឺផ្តាសាយ​ធំ លើ​ព្រះសង្ឃ​នេះ គឺមក​ពីកត្តា​ជាច្រើន ដូចជា ការប្រែប្រួលអាកាសធាតុ  ការវិវត្តបម្រែបម្រួល​នៃវីរុស  ឫមេរោគផ្សេងៗ នៅក្នុងបរិស្ថាន។

តាម​លោក​ស្រី វណ្ណឌីន គួប​ផ្សំនឹងការ​ប្រែប្រួលនេះ ការប៉ះពាល់ ជាមួយពពួកសត្វ ដែលចិញ្ចឹមកូនដោយទឹកដោះ  និងពពួកសត្វបក្សី ឫការបរិភោគពពួកសត្វទាំងនេះដែលចម្អិនមិនបានឆ្អិន​  និងមានកង្វះអនាម័យ​ ក៏​អាច​ការ​មូលហេតុ​នៃការ​គ្រុន​ផ្តាសាសាយ​ធំតៗគ្នាផងដែរ។

គួរជម្រាបជូនថា នៅពេលថ្មីៗនេះ មាន​សេចក្តីរាយការណ៍ជាបន្ត​បន្ទាប់ថាព្រះសង្ឃជាច្រើន​អង្គ ក្នុង​ខេត្តចំនួន ៤ មានចេញអាការៈគ្រុន​ក្តៅ​លើសពី ៣៧.៥អង្សារ ព្រមទាំងមានអាការៈក្អក និង​ហៀរសំបោរជាដើម ដែល​មានកា​របារម្ភពីរោគសញ្ញានៃជំងឺកូវីដ ១៩។ ប៉ុន្តែយោង​តាមការ​យក​សំណាក​ ទៅពិនិត្យ ក្រសួងសុខាភិបាល បញ្ជាក់ថា មិន​មានឃើញ​ករណីវិជ្ជមានកូវីដទេ ដោយ​នេះជាករណីផ្តាសាយ​ធំប៉ុណ្ណោះ។​ ជាមួយគ្នា ក្រសួងសុខាភិបាល ក៏បាន​យក​ឈាម​របស់​ព្រះសង្ឃទៅពិនិត្យ​ពីជំងឺគ្រុន​ឈាម និង​គ្រុន​ឈីកដែរ។

សូម​រម្លឹកជូនថា ព្រះសង្ឃ​ដែល​ចេញ​អាការៈគ្រុន​ក្តៅ ក្អក និង​ហៀរសំបោរ នៅក្នុង​ខែកញ្ញានេះ មាន ២៦​អង្គ គង់​នៅវត្តបឹងត្រស់ ក្នុង​ឃុំភ្នំតូច ស្រុកមង្គលបូរី ខណៈ ៤៦អង្គផ្សេងទៀត​ គង់នៅវត្ត​ស្វាយ​ដង្គំ ស្រុក​ឯកភ្នំ ខេត្ត​បាត់ដំបង។ ចំណែក​កាលពីខែសីហា កន្លងទៅ មាន​ព្រះសង្ឃ ២៨អង្គ គង់នៅវត្តប្រាសាទ​នាងខ្មៅ ក្នុងខេត្ត​តាកែវ និងព្រះសង្ឃផ្សេងទៀត ក្នុងខេត្តត្បូងឃ្មុំ ត្រូវបាន​រាយការណ៍ថា មានអាការៈដូចគ្នានេះដែរ។

ដោយ​បារម្ភពីស្ថានភាពនេះ និងជាពិសេសគឺក្នុងឱកាស​ពិធីបុណ្យ​ភ្ជុំបិណ្ឌផង រដ្ឋមន្ត្រីក្រសួងសុខាភិបាល លោក​ម៉ម ប៊ុនហេង បាន​ផ្ញើលិខិត​ទៅកាន់​អភិបាល​រាជធានី ខេត្ត​ទាំងអស់ កាលពីថ្ងៃទី ១៤ខែកញ្ញា ស្នើឲ្យ​មានការពង្រឹង​ការអនុវត្ត​វិធានការ​សុខាភិបាល ដើម្បីទប់ស្កាត់​ការចម្លង​ជំងឺគ្រុន​ផ្តាសាយ​ធំ ក្នុងប្រទេសកម្ពុជា។

ក្រសួងសុខាភិបាល បានអំពាវនាវឲ្យ​ទាំង ព្រះសង្ឃ  លោកតាអាចារ្យ  លោកយាយជី  និងគណកម្មការវត្តទូទាំងប្រទេសកម្ពុជា ព្រមទាំងពលរដ្ឋទាំងអស់ផង ត្រូវ​ចូលរួមអនុវត្តន៌វិធានការអនាម័យខ្លួន ប្រាណ ជាពិសេសអនាម័យដៃឲ្យបានស្អាតជាប់ជានិច្ច ។ ត្រូវប្រើ​ម៉ាស់ក្នុងករណីចាំបាច់  ជាពិសេសត្រូវពាក់ម៉ាស់ពេលចូលក្នុងទីវត្តអារ៉ាម  ឫកន្លែងដែលមានមនុស្សម្នាច្រើន​ និង​ត្រូវចេះរក្សាគម្លាតសុវត្ថិភាពបុគ្គល។ ជាមួយគ្នា ក៏ត្រូវ​ចៀសវាងការប៉ះពាល់ជាមួយសត្វដែលបំបៅកូនដោយទឹកដោះ  និងសត្វបក្សី  ដោយផ្ទាល់ ឬ ត្រូវ​លាងសម្អាតដៃភ្លាមៗ ក្រោយ​បានប៉ះពាល់ហើយ។ ជាពិសេសផងដែរ គឺ​ត្រូវ​បរិភោគម្ហូបអាហារឆ្អិនល្អ និងគោរព​ តាមការណែនាំបច្ចេកទេសរបស់ក្រសួងសុខាភិបាល៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI