អានតួអត្ថបទ
កម្ពុជា សង្គមស៊ីវិល​

ករណី លោក រ៉ុង ឈុន៖ខ្មែរនៅក្រៅស្រុកគ្រោង​ធ្វើបាតុកម្មនៅ​ចុងខែនេះ​ ខណៈខ្មែរ​ក្នុង​ស្រុក​ក៏​ត្រៀម​កម្រើក​ឡើង​វិញ

ពលរដ្ឋខ្មែរនៅប្រទេសកាណាដា បានជួបជុំគ្នាធ្វើការតវ៉ាជុំវិញករណីលោក រ៉ុង ឈុន
ពលរដ្ឋខ្មែរនៅប្រទេសកាណាដា បានជួបជុំគ្នាធ្វើការតវ៉ាជុំវិញករណីលោក រ៉ុង ឈុន © FB
ដោយ៖ អ៊ឹង ប៊ុនថន
១៥ នាទី

​ពលរដ្ឋខ្មែរ​នៅសហរដ្ឋអាមេរិក​បាន​ប្រកាស​ថា ពួកគេ​នឹង​ធ្វើ​បាតុកម្ម​នៅ​ថ្ងៃ​ចន្ទ​ ទី២៨ ខែកញ្ញា គឺ​ក្រោម​ហេតុផល«ដោះលែង​អ្នក​ទោស​មន​សិការ ចំពោះ​អ្វី​ដែល​ពួកគេហៅថា ជាពលរដ្ឋស​កម្ម​ដើម្បី​យុត្តិ​ធម៌ និង​ប្រជា​ធិបតេយ្យ ទាក់​ទង​ករណី លោក រ៉ុង ឈុន។ សម្រាប់​ពលរដ្ឋខ្មែរនៅក្នុង​ស្រុក​វិញក៏​អះអាងថា​ពួក​គេ​គ្រោង​ធ្វើ​ការ​តវ៉ា​ជា​ថ្មី​ទៀត នៅ​ក្រោយ​បញ្ចប់បុណ្យភ្ជុំបិណ្ឌនេះដែរ តែមិនទាន់កំណត់​ថ្ងៃជាក់​លាក់​នៅ​ឡើយ​។

ផ្សាយពាណិជ្ជកម្ម

គម្រោង​បាតុកម្ម​របស់​ពលរដ្ឋ​ខ្មែរ​នៅ​សហរដ្ឋ​អាមេរិក ត្រូវ​បាន​ប្រកាសឡើងដោយ​ចលនានិស្សិត​ដើម្បី​ប្រជា​ធិបតេយ្យ​។ បាតុកម្ម​ដែល​គ្រោង​ធ្វើ​នៅថ្ងៃចន្ទសប្តាហ៍ក្រោយ គឺនៅមុខក្រសួង​ការ​បរទេស​អាមេរិក និង​មុខ​ស្ថាន​ទូត​កម្ពុជា​នៅ​ទីក្រុង​វ៉ាស៊ីន​តោន គឺ​ក្រោម​ហេតុផល«ដោះលែងអ្នកទោសមន​សិការ ចំពោះ​អ្វី​ដែល​ពួក​គេ​ហៅ​ថា ជា​ពលរដ្ឋ​សកម្ម​ដើម្បី​យុត្តិធម៌ និងប្រជាធិបតេយ្យ។ បាតុកម្មនេះ​កើត​ឡើង​ក្រោយ​ពី​មាន​ការ​ចាប់​ខ្លួន​សកម្ម​ជន​សង្គម​ និង​បរិស្ថាន​យ៉ាងហោចណាស់១២នាក់ថែមទៀត បន្ទាប់ពី​ពួក​គេ​តវ៉ា​ប្រឆាំង​នឹង​ការ​ចាប់ខ្លួន លោក រ៉ុង ឈុន ។

តាមរយៈ​ខិតប័ណ្ណ​ដែល​បង្ហោះ​នៅ​លើ​ទំព័រ​ហ្វេសប៊ុក​ផ្លូវ​ការ​របស់​ខ្លួនជាច្រើនថ្ងៃមកនោះ ចលនា​និស្សិត​ដើម្បី​ប្រជា​ធិប​តេយ្យ បាន​អំពាវ​នាវ​ឲ្យ​មាន​ការ​ដោះលែងយុវជនចំនួន១១នាក់ និងអតីត​ព្រះ​សង្ឃ១​អង្គ​ផង​ដែរ ដែល​ជា​សមាជិក​របស់​ក្រុម​ខ្មែរ​ថាវរៈ​។

ដោយ​ឡែក​សម្រាប់​អ្នក​គាំ​ទ្រ​លោក រ៉ុង ឈុន នៅក្នុងស្រុក​វិញក៏អះអាងថាពួកគេមិន​បាន​បោះ​បង់​ចោល​ឡើយ​នូវ​ការ​ទាមទារ​ឲ្យ​ទម្លាក់​ចោល​ការ​ចោទ​ប្រកាន់​លើ​អ្នកអត្ថាធិប្បាយលើ​បញ្ហាព្រំដែន​រូបនេះ​។

លោក​ស្រី អ៊ុក ឆាយ៉ាវី ប្រធាន​សមាគម​គ្រូ​បង្រៀន​កម្ពុជា​ឯករាជ្យ​បាន​ប្រាប់​វិទ្យុ​បារាំង​អន្តរជាតិ​RFI​នៅ​ថ្ងៃសៅរ៍​នេះ​ថា ការ​ធ្វើ​បាតុកម្ម​ជាថ្មី​ទៀត​នៅ​ក្នុង​ស្រុក​នឹងអាចកើតឡើង​ដូចនៅក្រៅប្រទេសដែរ​ តែលោក​ស្រីមិន​បាន​បង្ហើប​ពីថ្ងៃ​ជាក់​លាក់​ទេ ដោយ​បារម្ភខ្លាចអាជ្ញាធរទប់​ស្កាត់​ជា​មុន។

គួរកត់​សំគាល់​ថា ក្រោយ​ការ​ចាប់​ឃុំខ្លួន លោក រ៉ុង ឈុន និងសកម្មជនជាង១០នាក់​បន្ថែម​ទៀត​នោះ បាន​ធ្វើ​ឲ្យ​មាន​ប្រតិកម្ម​ដូចៗគ្នាពីសហគមន៍អន្តរជាតិ។

ឧបការីរដ្ឋមន្ត្រី​ការ​បរទេស​សហរដ្ឋអាមេរិក​បាន​​ជំរុញ​ឲ្យ​មាន​ការ​ដោះលែង​ជា​បន្ទាន់​នូវ​សកម្មជន​ដែល​ត្រូវបាន​ចាប់​ខ្លួន​ជា​បន្ត​បន្ទាប់​នៅ​កម្ពុជា​ ដោយ​គូស​បញ្ជាក់​ថា​ សហរដ្ឋអាមេរិក​មាន​ការ​បារម្ភ​យ៉ាង​ខ្លាំង​ពី​ករណី​នេះ​ ខណៈ​ឧត្តម​ស្នង​ការ​អង្គការ​សហប្រជាជាតិ​ទទួល​បន្ទុក​សិទ្ធិ​មនុស្ស​ប្រចាំ​កម្ពុជា​ក៏​បាន​សំដែង​ក្តី​បារម្ភ​ដូចគ្នា​នេះ​ដែរ​។ ប៉ុន្តែ​សម្រាប់​រដ្ឋាភិបាល​កម្ពុជា អ្វី​ដែល​សកម្មជន​ទាំង​នោះ​តវ៉ា​គឺ​ជា​សកម្មភាព​ខុស​ច្បាប់ទើបនាំឲ្យមានការចាប់ខ្លួន៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ